চন্দ্ৰযান-৩-য়ে সময়ৰ আগতেই চন্দ্ৰৰ মাটিত ভৰি দিলে। বৰ্তমান এই চন্দ্ৰযান চন্দ্ৰৰ দক্ষিণ মেৰুত। ইছৰ’ৰ মুৰব্বী এছ সোমনাথে চন্দ্ৰযান-৩ৰ চন্দ্ৰত সফল মসৃন অৱতৰণৰ বিষয়ে কয় যে, “এতিয়া চন্দ্ৰযান-৩ চন্দ্ৰৰ দক্ষিণ মেৰুত আছে।” ভাৰতে ইতিহাস ৰচনা কৰিলে। চন্দ্ৰযান ৩ চন্দ্ৰত অৱতৰণ কৰিলে। চন্দ্ৰত ভৰি দিয়া বিশ্বৰ চতুৰ্থখন দেশ হিচাপে পৰিগণিত হ’ল ভাৰত। একেসময়তে চন্দ্ৰৰ দক্ষিণ মেৰুত ভৰি দিয়া বিশ্বৰ প্ৰথমখন দেশ হিচাপে পৰিগণিত হ’ল ভাৰত।
ভাৰতে মহাকাশ বিজ্ঞানৰ ইতিহাসত এক নতুন অধ্যায় সংযোজন কৰিলে। চন্দ্ৰৰ মাটিত চন্দ্ৰযান-৩ অৱতৰণ ভাৰতৰ বিজ্ঞানীসকলৰ বাবে বিশেষকৈ ইছৰোৰ বাবে এক গৌৰৱ গাথা হৈ ৰ’ব।
দীৰ্ঘদিনীয়া প্ৰস্তুতিৰ অন্তত ১৪ জুলাইত শ্ৰীহৰিকোটাৰ সতীশ ধৱন লঞ্চিং পেডৰ পৰা চন্দ্ৰযান-৩ সফলতাৰে উৎক্ষেপণ কৰা হয়। গোটেই দেশখনে সেইদিনাৰ পৰা দিন গণি আছিল। গোটেই পৃথিৱীয়ে অপেক্ষাৰে ৰৈ আছিল। আজি পুৱাৰে পৰা সেই উদ্বিগ্নতা আৰু প্ৰত্যাশা কেইবাগুণো বৃদ্ধি পাইছিল।
বুধবাৰে পুৱাৰে পৰা প্ৰাৰ্থনাত ব্যস্ত হৈ পৰিছিল দেশবাসী। দক্ষিণ আফ্ৰিকাৰ পৰা চন্দ্ৰযানৰ লাইভ সম্প্ৰচাৰত ভাৰ্চুৱেলি যোগদান কৰে প্ৰধানমন্ত্ৰী নৰেন্দ্ৰ মোদীয়ে।
এফালে দেশবাসীৰ উদ্বিগ্নতা, আনফালে কঠিন অৱতৰণৰ পৰ্যায়ৰ শেষ ১৫ মিনিট। চন্দ্ৰযান ২ৰ ফলাফলৰ কথা মনত ৰাখি এই যোৱা ১৫ মিনিটত উত্তেজনা অধিক আছিল। কিন্তু লেণ্ডাৰ বিক্ৰমে পৰিকল্পনা অনুসৰি শেষৰ ১৫ মিনিট মসৃণভাৱে পাৰ কৰিলে। ৫.৪৫ বজাৰ পৰা আৰম্ভ হৈছিল অৱতৰণৰ চূড়ান্ত প্ৰক্ৰিয়া।
প্ৰথম পৰ্যায়ত প্ৰতি ছেকেণ্ডত ৩৫৮ মিটাৰ বেগত বিক্ৰমক ৭.৪ কিলোমিটাৰ উচ্চতালৈ নমাই দিয়া হৈছিল। দ্বিতীয় পৰ্যায়ত গতি আৰু লেহেমীয়া হয়। সেই পৰ্যায়ত অলপ বেছিকৈ বিক্ৰম মাতিলে। কেইবাটাও ঢাপৰ মাজেৰে পাৰ হৈ যোৱাৰ পিছত একেবাৰে শেষ পৰ্যায়ত লাহে লাহে অতি বেমসৃন বেগেৰে চন্দ্ৰৰ মাটিত ভৰি দিলে। অৱতৰণৰ শেষ মুহূৰ্তত ইয়াৰ গতিবেগ আছিল প্ৰতি ছেকেণ্ডত ১.৬৮ কিলোমিটাৰ। ভাৰতৰ চন্দ্ৰযান-৩ পৰিকল্পনা অনুসৰি চন্দ্ৰৰ মাটিত ভৰি দিলে। বিশ্বত ইতিহাস ৰচনা কৰিলে ভাৰতে।
চন্দ্ৰৰ দক্ষিণ মেৰুত মহাকাশযানখন সফলতাৰে মসৃন অৱতৰণ কৰা প্ৰথমখন দেশ ভাৰত। ইয়াৰ আগতে কোনো মহাকাশযান চন্দ্ৰৰ দক্ষিণ মেৰুত সফলতাৰে অৱতৰণ কৰা নাছিল। গতিকে সেই অংশটোৰ প্ৰতি কৌতুহল ইমানেই বেছি। সম্পূৰ্ণ অচিনাকি ঠাই হোৱাৰ বাবে বিক্ৰমৰ অৱতৰণো যথেষ্ট কঠিন আছিল। সফল অৱতৰণৰ পিছত ভাৰতৰ চন্দ্ৰযানে জানি ল’ব তাত কি আছে আৰু কি নাই। আনহাতে, আমেৰিকা, ৰাছিয়া আৰু চীনৰ পিছত চন্দ্ৰত অৱতৰণ কৰা ভাৰত চতুৰ্থখন দেশ হিচাপে পৰিগণিত হয়।
চন্দ্ৰৰ মাটিত অৱতৰণ কৰাৰ পিছত বিক্ৰমৰ এটা অংশ খোল খাব। তাৰ পৰা ৰ’ভাৰ প্ৰজ্ঞান লেণ্ডাৰৰ পেটৰ পৰা চন্দ্ৰৰ মাটিলৈ নামি আহিব। তেতিয়া চন্দ্ৰৰ ঘৰত তেওঁৰ বিচৰণ আৰম্ভ হ’ব। ছয় চকাৰ প্ৰজ্ঞান কেইঘণ্টামান জিৰণি লৈ ঘূৰিব। ই প্ৰতি ছেকেণ্ডত এক চেণ্টিমিটাৰ দূৰত্ব অতিক্ৰম কৰিব। ইয়াৰ লগত একাধিক ডিভাইচ থাকিব। সেইবোৰৰ সহায়ত ই তথ্য সংগ্ৰহ কৰিব। চন্দ্ৰত কি আছে, কি নাই, ভালদৰে চাব।
আনহাতে ৰম্ভা, চাষ্ট, ইলছা, আৰে চন্দ্ৰত প্ৰৱেশৰ পিছতে কাম আৰম্ভ কৰিব। এই চাৰিটা পেলোড বিক্ৰমৰ সৈতে জড়িত। প্ৰত্যেকৰে নিজৰ নিজৰ কাম আছে। ৰম্ভাই সূৰ্য্যৰ পৰা অহা প্লাজমা কণিকাৰ ঘনত্ব, পৰিমাণ আৰু তাৰতম্যৰ বিষয়ে অধ্যয়ন কৰিব। ইলছাই চন্দ্ৰ পৃষ্ঠৰ কম্পন নিৰীক্ষণ কৰিব, চাষ্টে ইয়াৰ উষ্ণতা জুখিব আৰু আৰে চন্দ্ৰৰ গতিশীলতা বুজিবলৈ চেষ্টা কৰিব।
