ভাৰতীয়সকলৰ খাদ্যপ্ৰেমৰ এক আমোদজনক ছবি দাঙি ধৰি ছুইগীয়ে তেওঁলোকৰ দশম বাৰ্ষিক হাউ ইণ্ডিয়া ছুইগিড প্ৰতিবেদন প্ৰকাশ কৰিছে। এই প্ৰতিবেদন অনুসৰি ২০২৫ চনত ভাৰতীয়সকলে কেৱল ছুইগীৰ জৰিয়তে ৯.৩ কোটি বিৰিয়ানী অৰ্ডাৰ কৰি এক অভিলেখ গঢ়িছে। ২০২৪ চনত এই সংখ্যা আছিল ৮.৩ কোটি। পৰিসংখ্যা অনুসৰি দেশত প্ৰতি মিনিটত ১৯৪ খন আৰু প্ৰতি ছেকেণ্ডত ৩.২৫ খনকৈ বিৰিয়ানীৰ প্লেট অৰ্ডাৰ কৰা হৈছে। বিৰিয়ানীৰ বিভিন্ন প্ৰকাৰৰ ভিতৰত ৫.৭৭ কোটি অৰ্ডাৰেৰে চিকেন বিৰিয়ানীয়ে জনপ্ৰিয়তাৰ শীৰ্ষস্থান দখল কৰিছে। অৱশ্যে কেৱল বিৰিয়ানীয়েই নহয়, বাৰ্গাৰ আৰু পিজ্জাৰ প্ৰতিও ভাৰতীয়ৰ আকৰ্ষণ বৃদ্ধি পাইছে। বছৰটোত ৪.৪২ কোটি বাৰ্গাৰ আৰু ৪.০১ কোটি পিজ্জাৰ অৰ্ডাৰ দিয়াৰ বিপৰীতে ২.৬২ কোটি ভেজ ড’ছাৰ অৰ্ডাৰে কৰিছে।
চহৰসমূহৰ ভিতৰত হায়দৰাবাদে ৯৭ লাখ বিৰিয়ানী অৰ্ডাৰেৰে শীৰ্ষত থকাৰ বিপৰীতে বেংগালুৰু আৰু চেন্নাইয়ে ক্ৰমে ৭৭ লাখ আৰু ৪৬ লাখ অৰ্ডাৰেৰে পৰৱৰ্তী স্থান লাভ কৰিছে। ৰমজানৰ দৰে ধৰ্মীয় পাৰ্বনৰসময়তো বিৰিয়ানীৰ চাহিদা তুংগত আছিল আৰু কেৱল সেই সময়ছোৱাতে ৬০ লাখ প্লেট বিৰিয়ানী যোগান ধৰা হৈছিল। প্ৰতিবেদনত উল্লেখ কৰা হৈছে যে এতিয়া খাদ্য অৰ্ডাৰ কৰাটো কেৱল বিলাসিতা হৈ থকা নাই, বৰঞ্চ ই এক স্বাভাৱিক প্ৰবৃত্তিত পৰিণত হৈছে। মানুহে কৰ্মক্ষেত্ৰৰ বিৰতিৰ পৰা আৰম্ভ কৰি ভাগৰুৱা দিনটোৰ অন্তত নিজকে উপহাৰ দিবলৈও অনলাইন খাদ্যৰ সহায় লৈছে। স্বাস্থ্যসন্মত খাদ্যৰ ক্ষেত্ৰতো সচেতনতা বৃদ্ধি পাইছে আৰু বেংগালুৰু, মুম্বাই তথা হায়দৰাবাদৰ দৰে চহৰত প্ৰায় ২.৩ কোটি উচ্চ প্ৰটিনযুক্ত খাদ্যৰ অৰ্ডাৰ কৰা হৈছে।
বিয়লি ৩ বজাৰ পৰা সন্ধিয়া ৭ বজালৈ সময়ছোৱা ভাৰতীয়ৰ বাবে আটাইতকৈ প্ৰিয় জলপানৰ সময় হিচাপে চিহ্নিত হৈছে। জলপানৰ ক্ষেত্ৰত ৬৩ লাখ অৰ্ডাৰেৰে চিকেন বাৰ্গাৰে আধিপত্য বিস্তাৰ কৰিছে। আনহাতে চিকেন ৰোলৰ চাহিদাও লক্ষণীয়ভাৱে বৃদ্ধি পাই ৪.১ কোটিত উপনীত হৈছে। ইয়াৰ উপৰি চাহ-জলপানৰ তালিকাত আদা দিয়া চাহ আৰু চিংৰাইবিশেষ স্থান লাভ কৰিছে, যাৰ অৰ্ডাৰৰ সংখ্যা আছিল ক্ৰমে ২৯ লাখ আৰু ৩৪.২ লাখ। মিঠাইৰ ক্ষেত্ৰত ৬৯ লাখ অৰ্ডাৰেৰে হোৱাইট চকলেট কেক শীৰ্ষত থকাৰ বিপৰীতে গুলাব জামুন, কাজু বৰফি আৰু বেছান লাডুৰ দৰে পৰম্পৰাগত মিঠাইৰ প্ৰতিও মানুহৰ তীব্ৰ হেঁপাহ দেখা গৈছে।
আন্তঃৰাষ্ট্ৰীয় খাদ্যৰ ভিতৰত মেক্সিকান, তিব্বতী আৰু কোৰিয়ান খাদ্যই ভাৰতীয়ৰ পাকঘৰত স্থান উলিয়াই লৈছে। বিশেষকৈ মাচা চাহৰ সন্ধান সৰ্বাধিক কৰা হৈছিল। আনহাতে স্থানীয় খাদ্য যেনে পাহাদী, মালাবাৰী আৰু ৰাজস্থানী ব্যঞ্জনৰ চাহিদা প্ৰায় দুগুণ বৃদ্ধি পাইছে। নিশাৰ ভাগত অৰ্ডাৰ দিয়াৰ প্ৰৱণতাও এক অভ্যাসত পৰিণত হৈছে। নিশা ১২ বজাৰ পৰা ২ বজাৰ ভিতৰত চিকেন বাৰ্গাৰ আৰু বিৰিয়ানীৰ সৰ্বাধিক অৰ্ডাৰ আহে। পুৱাৰ আহাৰৰ ক্ষেত্ৰত ১.১ কোটি অৰ্ডাৰেৰে ইডলীয়ে শীৰ্ষস্থান দখল কৰিছে। গণেশ চতুৰ্থীত ২.২৮ লাখ মডাক আৰু নৱৰাত্ৰিৰ সময়ত যথেষ্ট পৰিমাণৰ চাবুদানা খিচিৰিআৰু ৰোজা থালি ডেলিভাৰী কৰা হৈছিল। দীপাৱলী সপ্তাহত ১৭ লাখ কিলোগ্ৰাম মিঠাই আৰু ড্ৰাই ফ্ৰুটছৰ অৰ্ডাৰে উৎসৱৰ আনন্দ দুগুণ কৰি তুলিছিল।
ব্যক্তিগত পৰ্যায়ত মুম্বাইৰ এজন গ্ৰাহকে বছৰটোত ৩,১৯৬ বাৰ খাদ্য অৰ্ডাৰ কৰি চমক সৃষ্টি কৰিছে, যিটো দিনটোত প্ৰায় ৯ টা অৰ্ডাৰৰ সমান। আনহাতে হায়দৰাবাদৰ এজন গ্ৰাহকে অৰ্ডাৰৰ নামত বছৰটোত ৫০ লাখ টকা খৰচ কৰিছে। কেৱল ঘৰত বহি খোৱাই নহয়, ৰেষ্টুৰেণ্টত গৈ খোৱাৰ পৰম্পৰাও বৃদ্ধি পাইছে। ছুইগীৰ জৰিয়তে ২.৩৭ কোটি গ্ৰাহকে ৰেষ্টুৰেণ্টত টেবুল বুকিং কৰিছে, য’ত বেংগালুৰু চহৰ আগৰণুৱা হৈ আছে।
