বিগত চাৰি বছৰত সমগ্ৰ দেশজুৰি মুঠ ১১১ গৰাকী সাংসদ আৰু বিধায়কে নিজৰ দল সলনি কৰিছে। ভাৰতৰ নিৰ্বাচন নিৰীক্ষণ সংস্থা ‘এছ’চিয়েশ্যন ফৰ ডেম’ক্ৰেটিক ৰিফৰ্মছ’ চমুকৈ এডিআৰৰ শেহতীয়া প্ৰতিবেদনত এই তথ্য পোহৰলৈ আহিছে। ২৪ ছেপ্টেম্বৰত প্ৰকাশিত এই প্ৰতিবেদন অনুসৰি, ২০২২ চনৰ পৰা ২০২৬ চনলৈকে হোৱা এই দলবদলৰ প্ৰক্ৰিয়াত আটাইতকৈ বেছি লাভান্বিত হৈছে নাগালেণ্ডৰ নাগা পিপলছ ফ্ৰণ্ট (এনপিএফ) আৰু কেন্দ্ৰত ক্ষমতাসীন ভাৰতীয় জনতা পাৰ্টি।
এডিআৰৰ তথ্য অনুসৰি, দলবদলৰ জৰিয়তে সৰ্বাধিক লাভান্বিত হোৱা দলটো হৈছে নাগালেণ্ডৰ এনপিএফ। ২০২৫ চনত মুখ্যমন্ত্ৰী নেফিউ ৰিঅ’ৰ দল নেচনেল ডেম’ক্ৰেটিক প্ৰগ্ৰেছিভ পাৰ্টি (এনডিপিপি) মূল দল এনপিএফৰ সৈতে চামিল হোৱাৰ ফলত একেবাৰতে ৩২ গৰাকী বিধায়কে দলটোত যোগদান কৰে, যিটো মুঠ দলবদলৰ ২৯ শতাংশ। আনহাতে, দলবদলৰ জৰিয়তে লাভান্বিত হোৱা দলৰ তালিকাত তৃতীয় স্থানত আছে এনচিপিআই। ২০২৬ চনৰ পশ্চিমবঙ্গৰ বিধানসভা নিৰ্বাচনৰ পাছতে চৰকাৰ পৰিৱৰ্তন হোৱাত তৃণমূল কংগ্ৰেছ ত্যাগ কৰা ২০ গৰাকী লোকসভাৰ সাংসদে এনচিপিআইত যোগদান কৰি বিজেপি নেতৃত্বাধীন এনডিএ মিত্ৰজোঁটক সমৰ্থন আগবঢ়াইছে।
এককভাৱে নেতাসকলৰ যোগদানৰ ক্ষেত্ৰত বিজেপি শীৰ্ষস্থানত আছে যদিও সামগ্ৰিকভাৱে দলটো দ্বিতীয় স্থানত অৱস্থান কৰিছে। যোৱা চাৰি বছৰত মুঠ ২৯ গৰাকী আইনপ্ৰণেতাই বিজেপিত যোগদান কৰিছে (মুঠ দলবদলৰ ২৬ শতাংশ), য’ত কোনো লোকসভাৰ সাংসদ নাই যদিও ৭ গৰাকী ৰাজ্যসভাৰ সাংসদ আৰু ২২ গৰাকী বিধায়ক অন্তৰ্ভুক্ত আছে। উল্লেখযোগ্য যে, ৰাজ্যসভাৰ এই সাতগৰাকী সাংসদ ক্ৰমে ৰাঘৱ চড্ডাৰ লগতে হৰভজন সিং, স্বাতী মালিৱাল, অশোক মিত্তল, সন্দীপ কুমাৰ পাঠক, বিক্ৰমজিৎ সিং আৰু ৰাজিন্দৰ গুপ্তাই আম আদমী পাৰ্টীৰ পৰা গৈ পদ্ম শিবিৰত যোগদান কৰিছে। ইয়াৰ উপৰিও গোৱাৰ ৮ গৰাকী আৰু গুজৰাটৰ ৪ গৰাকী কংগ্ৰেছ বিধায়কৰ লগতে হিমাচল প্ৰদেশৰ দুগৰাকী বিধায়কেও বিজেপিত যোগদান কৰে।
প্ৰতিবেদনখনত উল্লেখ কৰা অনুসৰি, এই ১১১ গৰাকী দলবদলকাৰীৰ ভিতৰত ২১ গৰাকী লোকসভাৰ সাংসদ (৫ শতাংশ), ৭ গৰাকী ৰাজ্যসভাৰ সাংসদ (৩ শতাংশ) আৰু ৭৮ গৰাকী বিধায়ক (২ শতাংশ) আছে। সমগ্ৰ দেশৰ ১৭ খন ৰাজ্য আৰু কেন্দ্ৰীয়শাসিত অঞ্চলত এই দলবদল সংঘটিত হৈছে। ৰাজ্যভিত্তিক হিচাপত নাগালেণ্ড (৩২ গৰাকী) শীৰ্ষত থকাৰ বিপৰীতে পশ্চিমবঙ্গ (২০ গৰাকী), তেলেংগানা (৯ গৰাকী), গোৱা (৮ গৰাকী) আৰু পঞ্জাৱ (৮ গৰাকী) পৰৱৰ্তী স্থানসমূহত আছে। আনহাতে, কংগ্ৰেছত ৯ গৰাকী, শিৱসেনাত ৮ গৰাকী, এনপিপিত ৬ গৰাকী আৰু পিপলছ পাৰ্টী অৱ অৰুণাচলত ৪ গৰাকী নেতাই যোগদান কৰিছে।
এই সময়ছোৱাত আটাইতকৈ বেছি সাংসদ আৰু বিধায়কে ত্যাগ কৰা দলকেইটা হৈছে ক্ৰমে নাগালেণ্ডৰ এনডিপিপি, তৃণমূল কংগ্ৰেছ আৰু কংগ্ৰেছ। এই পৰিসংখ্যা দাঙি ধৰি এডিআৰে দেশৰ দলবদল বিৰোধী আইনখন অধিক কঠোৰ আৰু শক্তিশালী কৰাৰ সপক্ষে যুক্তি দৰ্শাইছে। অৱশ্যে, নিৰ্বাচন আয়োগৰ তথ্যভঁৰালত পদ্ধতিগতভাৱে সংৰক্ষিত তথ্যৰ অভাৱৰ বাবে প্ৰকাশিত তালিকাত কিছু ত্ৰুটি থাকিব পাৰে বুলিও সংস্থাটোৱে স্বীকাৰ কৰিছে।
