দেশত দৈনিক কৰ’না সংক্ৰমণৰ ঘটনাৰ ক্ষেত্ৰত বিশ্বৰেকৰ্ডৰ ধাৰা অব্যাহত আছে। কৰ’নাৰ দ্বিতীয়টো ঢৌত ভাৰতত কেবল আক্ৰান্তৰ সংখ্যাই নহয়, মৃত্যুৰ সংখ্যাও দ্ৰুত হাৰত বৃদ্ধি পাইছে।
যোৱা বুধবাৰে বিশ্বৰ সকলো ৰেকৰ্ড ভংগ কৰি প্ৰথমবাৰৰ বাবে প্ৰায় ৩লাখ ১৫হাজাৰ লোক কৰ’নাত আক্ৰান্ত হৈছিল।
মাত্ৰ ২১ দিনৰ ভিতৰতেই দেশত কৰ’না আক্ৰান্তৰ সংখ্যা ১লাখৰ পৰা বৃদ্ধি পাই চাৰে তিনি লাখ অতিক্ৰম কৰিলে।
সোমবাৰে পুৱা দাঙি ধৰা কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি বিগত ২৪ ঘন্টাত দেশত ৩লাখ ৫২হাজাৰ ৯৯১ জন লোক কৰ’নাত আক্ৰান্ত হৈছে। এয়া দৈনিক সংক্ৰমণৰ ক্ষেত্ৰত বিশ্বৰ ভিতৰতে সৰ্বাধিক।
আনহাতে, দেশত এই সংখ্যা পূৰ্বৰ দিনৰ তুলনাত প্ৰায় ৪হাজাৰ অধিক।
দেশত এতিয়া মুঠ আক্ৰান্তৰ সংখ্যা হৈছেগৈ ১কোটি ৭৩লাখ ১৩হাজাৰ ১৬৩জন।
বিগত ২৪ ঘন্টাত দেশত ২হাজাৰ ৮১২ জন লোকৰ কৰ’নাত মৃত্যু হৈছে। দেশত এতিয়া মুঠ মৃত্যুৰ সংখ্যা ১লাখ ৯৫হাজাৰ ১২৩ জনলৈ বৃদ্ধি পাইছে।
ইপিনে, বিগত ২৪ ঘন্টাত দেশত কৰ’নাৰ পৰা আৰোগ্য লাভ কৰিছে ২লাখ ১৯হাজাৰ ২৭২ জন লোকে। এয়া দৈনিক আক্ৰান্তৰ সংখ্যাতকৈ বহু কম।
ইপিনে দেশত মুঠ সক্ৰিয় কৰ’না ৰোগীৰ সংখ্যা ২৮ লাখ ১৩হাজাৰ ৬৫৮জনলৈ বৃদ্ধি পালে।
দেশত এতিয়ালৈকে মুঠ ১কোটি ৪৩লাখ ৪হাজাৰ ৩৮২জন লোক কৰ’নাৰ পৰা আৰোগ্য লাভ কৰিছে।
আনহাতে, দেশত এতিয়ালৈ মুঠ ১৪ কোটি ১৯ লাখ ১১হাজাৰ ২২৩ জন লোকে কৰ’নাৰ ভেকচিন লাভ কৰিছে।
দেশত কৰ’নাৰ সংক্ৰমণ ৰোধ কৰিবলৈ কেন্দ্ৰীয় চৰকাৰে টীকাকৰণৰ গতি বৃদ্ধি কৰাৰ সিদ্ধান্ত লৈছে। অহা ১ মে’ৰ পৰা ১৮ বছৰৰ উৰ্ধৰ প্ৰত্যেককে কৰ’নাৰ ভেকচিন দিয়া হ’ব।
উল্লেখ্য যে ইয়াৰ ভিতৰত মহাৰাষ্ট্ৰ আৰু দিল্লীত সংক্ৰমণ নিম্নমুখী হোৱাৰ ইংগিত দেখা গৈছে। কিন্তু উত্তৰ প্ৰদেশ আৰু ছত্তীশগড়ত নতুনকৈ সংক্ৰমণে উদ্বিগ্নতাৰ সৃষ্টি কৰিছে।