বিশ্বব্যাপী আতংকৰ সৃষ্টি কৰা ক’ৰ’না ভাইৰাছৰ ফলত ভাৰতত আজি আৰু এগৰাকী লোকৰ চিকিৎসা চলি থকাৰ সময়তে মৃত্যু হয়। এই ঘটনাটো গুজৰাটৰ ছুৰটত সংঘটিত হৈছে।
ক’ৰ’নাৰ ফলত ভাৰতত এয়া সপ্তমটো আৰু গুজৰাটত প্ৰথমটো মৃত্যুৰ ঘটনা।
জানিব পৰা মতে ৬৭ বছৰীয়া লোকজনৰ ছুৰটস্থিত এখন ব্যক্তিগত চিকিৎসালয়ত মৃত্যু হয়। মৃত্যু হোৱা লোকজন দিল্লী আৰু জয়পুৰৰ পৰা ৰেইলেৰে যাত্ৰা কৰি ছুৰটলৈ আহিছিল।
মৃত্যু হোৱা লোকজন ক’ৰ’নাৰ উপৰি কিডনি আৰু এজমা ৰোগতো আক্ৰান্ত আছিল।
উল্লেখ্য যে দেওবাৰৰ দিনটোত ভাৰতত ক’ৰ’নাত আক্ৰান্ত তিনিজন লোকৰ মৃত্যু হয়।
ইয়াৰ পূৰ্বে বিহাৰৰ ৰাজধানী পাটনাত এগৰাকী ৩৮ বছৰীয়া আৰু মহাৰাষ্ট্ৰৰ এগৰাকী ৬৩ বছৰীয়া লোকৰ মৃত্যু হৈছিল।
ইফালে দেশৰ ভিতৰতে মহাৰাষ্ট্ৰত দ্ৰুতগতিত বৃদ্ধি পাবলৈ ধৰিছে ক’ৰ’নাত আক্ৰান্তৰ সংখ্যা। ৰাজ্যখনত এই পৰ্যন্ত ৭৪ গৰাকী লোক এই ভাইৰাছবিধৰ কৱলত পৰিছে।
আনহাতে ভাৰতত এই পৰ্যন্ত ৩৫৫ গৰাকী লোক এই ভাইৰাছত আক্ৰান্ত হৈছে।
