দেশৰ কৃষকসকলক বীজৰ অস্বাভাৱিক মূল্যবৃদ্ধিৰ বোজাৰ পৰা সকাহ দিয়া আৰু উন্নত মানৰ বীজ সুলভ মূল্যত উপলব্ধ কৰোৱাৰ লক্ষ্যৰে এখন সংসদীয় সমিতিয়ে চৰকাৰক এক গুৰুত্বপূৰ্ণ পৰামৰ্শ আগবঢ়াইছে। সমিতিখনে শীঘ্ৰেই এখন নতুন বীজ বিধেয়ক সংসদত উত্থাপন কৰাৰ লগতে দেশত এক ‘বীজৰ মূল্য নিয়ন্ত্ৰক’ (Seed Price Regulator) কৰ্তৃপক্ষ গঠন কৰিবলৈ দাবী জনাইছে। বৰ্তমানৰ বজাৰ ব্যৱস্থাত বীজৰ দাম নিয়ন্ত্ৰণ আৰু নিম্ন মানদণ্ডৰ বীজৰ পয়োভৰ ৰোধ কৰাৰ ক্ষেত্ৰত এই পদক্ষেপে গুৰুত্বপূৰ্ণ ভূমিকা পালন কৰিব বুলি আশা কৰা হৈছে।কৃষি খণ্ডৰ সূত্ৰ অনুসৰি, বৰ্তমান দেশত হাইব্ৰিড আৰু জিনীয়ভাৱে পৰিৱৰ্তিত বীজৰ বজাৰখন কেইটামান নিৰ্দিষ্ট ব্যক্তিগত খণ্ডৰ কোম্পানীৰ দখলত থকাৰ ফলত কৃষকসকলে প্ৰায়ে অত্যধিক দামত বীজ ক্ৰয় কৰিবলগীয়া হয়। সংসদীয় সমিতিখনে এই বিষয়টোত দৃষ্টি নিৱদ্ধ কৰি স্পষ্ট কৰি দিছে যে বীজৰ মূল্য নিয়ন্ত্ৰণ কৰিবলৈ এখন সুকীয়া আৰু সুদৃঢ় নিয়ন্ত্ৰক আয়োগৰ প্ৰয়োজন। এই আয়োগৰ জৰিয়তে বজাৰত বীজৰ এক নিৰ্ধাৰিত আৰু ন্যায্য মূল্য বৰ্তাই ৰখাৰ প্ৰয়াস কৰা হ’ব, যাতে কৃষকসকল আৰ্থিকভাৱে ক্ষতিগ্ৰস্ত নহয় আৰু বজাৰতো এক সুস্থ প্ৰতিযোগিতা বৰ্তি থাকে।উল্লেখ্য যে, কেন্দ্ৰীয় চৰকাৰে ইতিমধ্যে ছয় দশক পুৰণি ‘বীজ আইন, ১৯৬৬’ বাতিল কৰি তাৰ ঠাইত নতুন বীজ বিধেয়ক প্ৰৱৰ্তন কৰাৰ প্ৰস্তুতি চলাইছে। নতুন বিধেয়কখনত বীজৰ মানদণ্ড নিয়ন্ত্ৰণ, প্ৰতিটো বীজৰ পেকেটত কিউ-আৰ (QR) ক’ডৰ ব্যৱহাৰ আৰু পঞ্জীয়ন বাধ্যতামূলক কৰাৰ দৰে আধুনিক ব্যৱস্থা সন্নিবিষ্ট কৰা হৈছে। ইয়াৰ মূল লক্ষ্য হৈছে ভুৱা আৰু নিম্ন মানদণ্ডৰ বীজৰ বিক্ৰী সম্পূৰ্ণৰূপে বন্ধ কৰা। তদুপৰি, জৰুৰীকালীন অৱস্থাত বীজৰ দাম নিয়ন্ত্ৰণ কৰাৰ ক্ষমতা কেন্দ্ৰীয় চৰকাৰৰ হাতত ন্যস্ত কৰাৰ প্ৰস্তাৱো ইয়াত ৰখা হৈছে।অৱশ্যে, কৃষক সংগঠন আৰু একাংশ কৃষি বিশেষজ্ঞই পূৰ্বৰে পৰা দাবী কৰি আহিছিল যে কেৱল জৰুৰীকালীন অৱস্থাতেই নহয়, নিয়মীয়া মূল্য নিয়ন্ত্ৰণৰ বাবেও এক কঠোৰ ব্যৱস্থা থকা উচিত। ৰাজ্য চৰকাৰসমূহৰ হাততো বীজৰ দাম নিয়ন্ত্ৰণৰ পৰ্যাপ্ত ক্ষমতা নথকাৰ বিষয়টোৱেও ইতিমধ্যে যথেষ্ট চৰ্চা লাভ কৰিছে। এই সকলোবোৰ দিশ চালি-জাৰি চাই এতিয়া সংসদীয় সমিতিখনে এখন স্থায়ী ‘বীজৰ মূল্য নিয়ন্ত্ৰক’ গঠনৰ জৰিয়তে কৃষকৰ অধিকাৰ আৰু কৃষি খণ্ডৰ বহনক্ষমতা সুৰক্ষিত কৰাৰ ওপৰত সৰ্বাধিক গুৰুত্ব আৰোপ কৰিছে।
