বাংলাদেশৰ সমীপৱৰ্তী অসমৰ ধুবুৰী আৰু পশ্চিম বংগৰ উত্তৰ দিনাজপুৰৰ চোপ্ৰাত দুটা নতুন সেনা ঘাটি নিৰ্মাণ কৰি আছে ভাৰতে। ইতিমধ্যে চোপ্ৰাত থকা সেনা ঘাটিটোৰ প্ৰাৰম্ভিক কাম আৰম্ভ হৈছে।
আনহাতে, ভাৰতীয় সেনাৰ পূব অঞ্চলৰ মুৰব্বী তথা জিঅ’চি-ইন-চি লেফটেনেণ্ট জেনেৰেল আৰ চি তিৱাৰীয়ে ধুবুৰীত নতুন সেনা ঘাটি লাচিত বৰফুকন সামৰিক ঘাটিৰ আধাৰশিলা স্থাপন কৰে। ধুবুৰীৰ নতুন সেনা ঘাটিও পৰিদৰ্শন কৰে। দুয়োটা স্থানতে সেনা বিষয়াৰ সৈতে দীঘলীয়া বৈঠকত মিলিত হয়।
যোৱা বছৰ বাংলাদেশত পট পৰিৱৰ্তন হোৱাৰ পিছত ভাৰতীয় সেনাৰ সীমান্ত অঞ্চলত নতুন সেনা ঘাটি নিৰ্মাণৰ সিদ্ধান্তক সংশ্লিষ্ট মহলে বিশেষ গুৰুত্ব প্ৰদান কৰিছে। জনা গৈছে যে অতি শীঘ্ৰে নতুন ঘাটি দুটা সম্পূৰ্ণ কৰাৰ প্ৰচেষ্টা চলোৱা হৈছে। দুয়োটা ঘাটি উত্তৰ বংগৰ শিলিগুৰিৰ ওচৰৰ স্পৰ্শকাতৰ অঞ্চল চিকেন নেকৰ পৰা অলপ দূৰত। স্থল আৰু বায়ুপথেৰে যাৰ দূৰত্ব বৰ বেছি নহয়।
যোৱা বছৰ বাংলাদেশত শ্বেখ হাছিনা চৰকাৰৰ পতনৰ পিছত সেই দেশৰ সামৰিক কাৰ্যকলাপ নতুন স্তৰত উপনীত হৈছে। বিশেষকৈ দেশৰ উত্তৰ অংশৰ পৰিত্যক্ত বিমান ঘাটি দুটা কাৰ্যকৰী কৰাৰ সিদ্ধান্ত ভাৰতে যথেষ্ট সন্দেহৰ দৃষ্টিৰে চাইছে।
বাংলাদেশ সেনাৰ জ্যেষ্ঠ বিষয়াসকলে দুটা পৰ্যায়ত লালমণিৰহাট আৰু ঠাকুৰগাঁৱত অৱস্থিত সামৰিক বিমানবন্দৰ পৰিদৰ্শন কৰি আছে। বাংলাদেশৰ সেনা প্ৰধান ৱাকাৰ উজ জামানে দুসপ্তাহ পূৰ্বে এই দুটা বিমান ঘাটি পৰিদৰ্শন কৰিছিল।
ইয়াৰ সমান্তৰালকৈ নতুন দিল্লীয়েও সন্দেহৰ দৃষ্টিৰে চাই আছে চীন আৰু পাকিস্তানী সামৰিক বিষয়াৰ সঘনাই বাংলাদেশ ভ্ৰমণৰ ঘটনা। জেট বিমানৰ গতিবেগেৰে এই তিনিখন দেশৰ সেনাৰ মাজৰ সম্পৰ্ক আগবাঢ়িছে যিটোভাৰতৰ বাবে নতুন সামৰিক প্ৰত্যাহ্বান হিচাপে বিবেচিত হৈছে।
ভাৰতীয় সামৰিক বিশেষজ্ঞসকলৰ মতে বাংলাদেশৰ এই কাৰ্যকলাপৰ আঁৰত চীন আৰু পাকিস্তানৰ লক্ষ্য ভাৰত। তেওঁলোকৰ কৌশল হৈছে ভাৰতৰ পূব অঞ্চলক সামৰিকভাৱে অধিক ব্যস্ত কৰি ৰখা। সেই কৌশলত বাংলাদেশে সহযোগিতামূলক ভূমিকা ল’বলৈ গৈ আছে।
চুবুৰীয়া তিনিখন দেশৰ এই মনোভাৱে আজি ভাৰতীয় সেনাবাহিনীকো পৰিকল্পনা পুনৰ সংগঠিত কৰিবলৈ বাধ্য কৰাইছে। ইতিমধ্যে ভাৰতীয় সেনাই ত্ৰিপুৰাত পৰিত্যক্ত বিমান ঘাটি পুনৰ মুকলি কৰাৰ প্ৰস্তুতি আৰম্ভ কৰিছে।
ভাৰতীয় সেনাৰ বিষয়াসকলৰ মতে পাকিস্তানৰ সৈতে পৰৱৰ্তী যুদ্ধত বাংলাদেশে গুৰুত্বপূৰ্ণ ভূমিকা ল’ব পাৰে। শ্বেখ হাছিনা ক্ষমতাত থকা সময়ত বাংলাদেশ সন্দৰ্ভত ভাৰতীয় সেনাৰ কাৰ্যকলাপ বেলেগ আছিল। পূব অঞ্চলটোক লৈ সেনাবাহিনী যথেষ্ট শিথিল আছিল। কিন্তু হাছিনা চৰকাৰ সলনি হোৱাৰ পিছত এফালে বাংলাদেশৰ ভিতৰত চৰকাৰৰ মনোভাৱ সলনি হৈছে, আনফালে ভাৰত বিৰোধী শক্তিয়েও দেশখনত মুৰ দাঙি উঠিছে। যিটো ভাৰতৰ নিৰাপত্তাৰ বাবে এক নতুন প্ৰত্যাহ্বান হৈ পৰিছে।
ইষ্টাৰ্ণ আৰ্মিৰ মুখ্য কাৰ্যালয় ফ’ৰ্ট উইলিয়ামে এক বিবৃতিত প্ৰকাশ কৰে যে ইষ্টাৰ্ণ কমাণ্ডৰ আৰ্মী কমাণ্ডাৰ লেফটেনেণ্ট জেনেৰেল আৰ চি তিৱাৰীয়ে চোপ্ৰা সামৰিক ঘাটিটোত নিয়োজিত ব্ৰহ্মাস্ত্ৰ কৰ্পছৰ জোৱানসকলক সাক্ষাৎ কৰে। কম সময়ৰ ভিতৰতে ঘাটিটো নিৰ্মাণ আৰু পৰিচালনাৰ ক্ষেত্ৰত জোৱানসকলৰ পেছাদাৰিত্ব, উৎসাহ আৰু অদম্য প্ৰচেষ্টাক তেওঁ প্ৰশংসা কৰে।
লেফটেনেণ্ট জেনেৰেল তিৱাৰীয়ে জোৱানসকলক সৰ্বাধিক প্ৰস্তুতি বজাই ৰাখিবলৈ আৰু উদীয়মান নিৰাপত্তাজনিত প্ৰত্যাহ্বানৰ সন্মুখীন হোৱাৰ ক্ষেত্ৰত সক্ৰিয় হৈ থাকিবলৈ আহ্বান জনায়।
