আন্তৰাষ্ট্ৰীয় পৰ্যায়ত ভাৰতৰ বিৰুদ্ধে পাকিস্তানে ‘ভিত্তিহীন আৰু ক্ষতিকাৰক প্ৰ’পাগণ্ডা’ বিয়পোৱা বুলি অভিযোগ তুলি পাকিস্তানক তুলাধুনা দিছে ভাৰতে।
বুধবাৰে ৰাষ্ট্ৰসংঘৰ মানৱাধিকাৰ পৰিষদৰ ৪৬ সংখ্যক উচ্চ-পৰ্যায়ৰ সন্মিলনত ভাৰতৰ বিৰুদ্ধে পাকিস্তানে ভিত্তিহীন আৰু ক্ষতিকাৰক প্ৰ’পাগণ্ডা প্ৰচাৰ কৰাতো কোনো নতুন কথা নহয় বুলি কৈ ভাৰতৰ প্ৰতিনিধিগৰাকীয়ে পাকিস্তানৰ অভ্যন্তৰত ঘটি থকা মানৱাধিকাৰ উলংঘনৰ বিষয়ে সবিস্তাৰে উল্লেখ কৰি চুঙা চায় সোপা দিয়ে।
জেনেভাস্থিত ৰাষ্ট্ৰসংঘৰ মানৱাঘধিকাৰ পৰিষদৰ ভাৰতীয় স্থায়ী দ্বিতীয় সচিব সীমা পূজানীয়ে কয় যে পাকিস্তানে ভাৰতৰ আভ্যন্তৰীণ বিষয়ত মাত মাতি থকাতকৈ নিজ দেশত ঘটি থকা মানৱাধিৰকাৰ ঘটনাসমূহক বন্ধ কৰক।
কাশ্মীৰ প্ৰসংগটোৰ সন্দৰ্ভত পাকিস্তান প্ৰচাৰ কৰা মিথ্যচাৰ সম্পৰ্কত সীমা পুজানীয়ে কয় যে কাশ্মীৰ আৰু লাডাখ হৈছে ভাৰতৰ অবিচ্ছেদ্য আৰু অৱিচ্ছিন্ন অংশ। আৰু ভাৰতে ইয়াত সুস্থিৰ প্ৰশাসন, উন্নয়ন তথা বিকাশ নিশ্চিত কৰিছে।
পাকিস্তানৰ অভ্যন্তৰত ঘটি থকা সন্ত্ৰাসৰ বিষয়ে উল্লেখ কৰি ভাৰতীয় কূটনীতিবিদগৰাকীয়ে কয়ে যে পাকিস্তানত সংখ্যালঘুসকলক দীৰ্ঘদিন ধৰি অত্যাচাৰ কৰি অহা হৈছে। হিন্দু, শিখ, খ্ৰীষ্টান আদিৰ ওপৰত অত্যাচাৰ কৰাৰ লগতে পাকিস্তানত প্ৰতি বছৰে ১ হাজাৰৰো অধিক সংখ্যালঘু নাৰীক অপহৰণৰ পিছত বলপূৰ্বকভাৱে ধৰ্মান্তকৰণ কৰি বিয়া কৰোৱা হয়।
“পাকিস্তানৰ মানৱ অধিকাৰ আয়োগৰ প্ৰতিবেদনৰ মতে দেশখনত প্ৰতি বছৰে ১ হাজাৰ গৰাকী সংখ্যালঘু নাৰীক অপহৰণ কৰাৰ পিছত বলপূৰ্বকভাৱে ধৰ্মান্তকৰণ কৰি বিয়া কৰোৱা হয়।” সীমা পূজানীয়ে কয়।
বালুচিস্তানত পাকিস্তানে কৰা মানৱাধিকাৰ উলংঘনৰ বিষয়ে উল্লেখ কৰি সীমা পূজানীয়ে কয় যে মানৱ অধিকাৰ হকে কাম কৰা বহু বালুচ মানৱাধিকাৰ কৰ্মীৰ ৰহস্যজনকভাৱে মৃত্যু হৈছে।
পাকিস্তানক আন্তৰাষ্ট্ৰীয়ভাৱে স্বীকৃত বহু সন্ত্ৰাসবাদী সংগঠনৰ ঘাটি বুলি অভিহিত কৰাৰ লগতে দেশখনে সন্ত্ৰাসবাদৰ পৃষ্ঠপোষকতা কৰি আহিছে বুলিও বুলি দাবী কৰে ভাৰতীয় কূটনীতিবিদগৰাকীয়ে।
বিশ্বৰ সৰ্বাধিক মানৱাধিকাৰ উলংঘন কৰা আৰু সন্ত্ৰাসবাদৰ পৃষ্ঠপোষকতা কৰা দেশ পাকিস্তানে ভাৰতত মানৱাধিকাৰ উলংঘন হোৱা বুলি ভুৱা প্ৰচাৰ কৰাতকৈ নিজৰ দেশত মানৱাধিকাৰ উলংঘনৰ দৰে ঘটনাবোৰ হ্ৰাস কৰাত গুৰুত্ব আৰোপ কৰা উচিত বুলি যথোচিত প্ৰত্যুত্তৰ দিয়ে সীমা পূজানীয়ে।
