২০২১ বৰ্ষত ক্ৰিকেট অনুৰাগীয়ে এখন বিশেষ ক্ৰিকেট মেচ উপভোগ কৰিবলৈ পাব য’ত সমুখ সমৰত নামিব বিৰাট কোহলী নেতৃত্বাধীন ভাৰতীয় ক্ৰিকেট দল আৰু ভাৰত এ দলে।
এই মেচখন জুলাইত খেলা হ’ব যেতিয়া ভাৰতীয় ক্ৰিকেট দলে টেষ্ট শৃংখলা খেলিবলৈ ইংলেণ্ডলৈ যাব।
ভাৰতে নিজৰেই এ দলৰ বিৰুদ্ধে চাৰিদিনীয়া অনুশীলনমূলক মেচখনত অংশ লোৱাৰ পিছত ইংলেণ্ডৰ বিৰুদ্ধে টেষ্ট শৃংখলাত অৱতীৰ্ণ হ’ব।
ক্ৰিকেট অনুৰাগীৰ বাবে বহু প্ৰত্যাশিত এই মেচখন নৰ্থহেম্পটনশ্বায়াৰ কাউণ্টি গ্ৰাউণ্ডত ২১ৰ পৰা ২৪ জুলাইত অনুষ্ঠিত হ’ব।
উল্লেখ্য যে ভাৰতে আগষ্ট-ছেপ্টেম্বৰ মাহত পাঁচখনীয়া টেষ্ট শৃংখলাৰ বাবে ইংলেণ্ড ভ্ৰমণত যাব। শৃংখলাৰ প্ৰথমখন টেষ্ট ৪ আগষ্টৰ পৰা নটিংহমত অনুষ্ঠিত হ’ব।
বুধবাৰে ৰ্থহেম্পটনশ্বায়াৰ কাউণ্টি ক্ৰিকেট ক্লাবে এক বিবৃতিত কয়, ‘গ্ৰীষ্ম কালত বিশ্বৰ কিছু শ্ৰেষ্ঠ আন্তঃৰাষ্ট্ৰীয় ক্ৰিকেটাৰক দ্যা কাউণ্টি গ্ৰাউণ্ডত দেখা পোৱা যাব আৰু আমি ভাৰত আৰু ভাৰত এ দলক স্বাগতম জনাম’।
‘আগষ্টত ইংলেণ্ডৰ বিৰুদ্ধে টেষ্ট শৃংখলাত ভাগ লোৱাৰ পূৰ্বে ভাৰতীয় দলে তেওঁলোকৰ নিজৰ এ দলৰ বিৰুদ্ধে চাৰিদিনীয়া ৱাৰ্মআপ মেচ খেলিব’, বিবৃতিটোত কোৱা হয়।
উল্লেখ্য যে ভাৰত আৰু ইংলেণ্ডৰ মাজৰ দ্বিতীয়খন টেষ্ট (১২ৰ পৰা ১৬ আগষ্ট) আৰু চতুৰ্থখন টেষ্ট (২ৰ পৰা ৬ ছেপ্টেম্বৰ) লণ্ডনত অনুষ্ঠিত হ’ব।
আনহাতে তৃতীয় (২৫ ৰ পৰা ২৯ আগষ্ট) আৰু পঞ্চম (১০ ৰ পৰা ১৪ ছেপ্টেম্বৰ) টেষ্ট লিডছ আৰু মেনচেষ্টাৰত নিৰ্ধাৰণ কৰা হৈছে।
ইংলেণ্ড বৰ্তমান চাৰিখন টেষ্ট মেচৰ শৃংখলা, পাঁচখন টি-২০ মেচৰ শৃংখলা আৰু তিনিখন এদিনীয়া মেচৰ শৃংখলাৰ বাবে ভাৰতত আছে। ভ্ৰমণৰ আৰম্ভণি ৫ ফেব্ৰুৱাৰি অৰ্থাৎ চেন্নাই টেষ্ট মেচেৰে হ’ব।
