আমেৰিকান সংবাদ প্ৰতিষ্ঠান ‘এক্সিয়োচ’ (Axios)-ৰ এক শেহতীয়া প্ৰতিবেদন অনুসৰি, চিনেটৰ টেড ক্ৰুজে পুঁজি প্ৰদানকাৰীসকলৰ সৈতে হোৱা এক ব্যক্তিগত বৈঠকত আমেৰিকাৰ শীৰ্ষ নেতৃত্বৰ বিৰুদ্ধে গুৰুতৰ অভিযোগ উত্থাপন কৰিছে। ক্ৰুজৰ মতে, ভাৰতৰ সৈতে প্ৰস্তাৱিত বাণিজ্যিক চুক্তিখন আগবঢ়াই নিবলৈ তেওঁ হোৱাইট হাউচৰ সৈতে ‘সংগ্ৰাম’ কৰিবলগীয়া হৈছে। সংবাদ প্ৰতিষ্ঠানটোৱে দাবী কৰা মতে, এজন ৰিপাব্লিকান সূত্ৰৰ পৰা লাভ কৰা প্ৰায় ১০ মিনিট জোৰা এটা অডিঅ‘ ৰেকৰ্ডিংত এই কথোপকথন স্পষ্টকৈ ধৰা পৰিছে।
প্ৰতিবেদনখনত উল্লেখ কৰা অনুসৰি, যেতিয়া এজন পুঁজি প্ৰদানকাৰীয়ে এই বাণিজ্যিক চুক্তিৰ বিৰোধিতা কৰা লোকসকলৰ নাম জানিব বিচাৰিছিল, তেতিয়া ক্ৰুজে পোনপটীয়াকৈ অৰ্থনৈতিক উপদেষ্টা পিটাৰ নাভাৰো, উপ-ৰাষ্ট্ৰপতি জেডি ভেন্স আৰু ‘কেতিয়াবা’ ৰাষ্ট্ৰপতি ট্ৰাম্পৰ নাম লৈছিল। এই কথোপকথনসমূহ ২০২৫ চনৰ আৰম্ভণিৰ পৰা মধ্যভাগৰ বুলি অনুমান কৰা হৈছে।
২০২৮ চনৰ ৰাষ্ট্ৰপতি নিৰ্বাচনৰ দৌৰত থকা টেক্সাছৰ প্ৰভাৱশালী চিনেটৰ টেড ক্ৰুজে সতৰ্কবাণী শুনাইছে যে ট্ৰাম্পে আৰোপ কৰা শুল্কই আমেৰিকান অৰ্থনীতিৰ অপূৰণীয় ক্ষতি কৰিব পাৰে। আনকি ইয়াৰ পৰিণতিত ৰাষ্ট্ৰপতিৰ বিৰুদ্ধে ‘মহাভিযোগ’ উত্থাপনৰ দৰে পৰিস্থিতিও সৃষ্টি হ’ব পাৰে বুলি তেওঁ মন্তব্য কৰে। ক্ৰুজৰ দাবী অনুসৰি, ২০২৫ চনৰ এপ্ৰিলত শুল্ক আৰোপৰ বিষয়টো পুনৰ বিবেচনা কৰিবলৈ তেওঁ ট্ৰাম্পক ফোন কৰিছিল, কিন্তু সেই আলোচনা অত্যন্ত তিক্ত আছিল। তেওঁ অভিযোগ কৰা মতে, কথা-বতৰাৰ মাজতে ট্ৰাম্পে তীব্ৰ চিঞৰ-বাখৰ কৰাৰ লগতে কটু ভাষাৰো প্ৰয়োগ কৰিছিল।
বিগত কেইবামাহো ধৰি ভাৰত আৰু আমেৰিকাৰ কূটনৈতিক সম্পৰ্কত কিছু স্থবিৰতা পৰিলক্ষিত হৈছে। ইয়াৰ অন্যতম কাৰণ হ’ল ট্ৰাম্প প্ৰশাসনে ভাৰতীয় সামগ্ৰীৰ ওপৰত আৰোপ কৰা উচ্চ শুল্ক। বিশেষকৈ ৰাছিয়াৰ পৰা তেল আমদানি কৰাৰ বাবে আৰোপ কৰা ২৫ শতাংশ অতিৰিক্ত শুল্কই সামগ্ৰিক শুল্কৰ হাৰ ৫০ শতাংশলৈ বৃদ্ধি কৰিছে। ইয়াৰ উপৰিও, আমেৰিকাৰ বাণিজ্য সচিব হাৱাৰ্ড লুটনিকে শেহতীয়াকৈ এক বিতৰ্কিত মন্তব্য কৰি কৈছিল যে প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰপতি ট্ৰাম্পৰ সৈতে ফোনত বাৰ্তালাপ নকৰাৰ বাবেই বাণিজ্যিক চুক্তিখন চূড়ান্ত হোৱাত পলম হৈছে।
ইমানবোৰ ৰাজনৈতিক আৰু বাণিজ্যিক তিক্ততাৰ মাজতো ভাৰতৰ ৭৭ সংখ্যক গণতন্ত্ৰ দিৱস উপলক্ষে ৰাষ্ট্ৰপতি ট্ৰাম্পে ভাৰতবাসীক অভিনন্দন জনাইছে। তেওঁ উল্লেখ কৰে যে বিশ্বৰ পুৰণি আৰু বৃহত্তম গণতন্ত্ৰ হিচাপে আমেৰিকা আৰু ভাৰতৰ মাজত এক ঐতিহাসিক সম্পৰ্ক আছে। একেদৰে আমেৰিকাৰ বিদেশ সচিব মাৰ্কো ৰুবিঅ‘ আৰু ভাৰতত নিযুক্ত আমেৰিকাৰ ৰাষ্ট্ৰদূত চাৰ্জিও গোৰেও ভাৰতক শুভেচ্ছা জ্ঞাপন কৰিছে।
শেহতীয়াকৈ ৰাষ্ট্ৰদূত চাৰ্জিও গোৰৰ ভাৰত ভ্ৰমণৰ পিছত দুয়োখন দেশৰ মাজত সম্পৰ্ক পুনৰ স্বাভাৱিক কৰাৰ চেষ্টা চলিছে। ইয়াৰ অংশ হিচাপে ভাৰতক আমেৰিকাৰ গুৰুত্বপূৰ্ণ খনিজ কৌশলগত পদক্ষেপ ‘পেক্স চিলিকা’ (Pax Silica)-ত অংশগ্ৰহণৰ বাবে আমন্ত্ৰণ জনোৱা হৈছে।
