বিশ্বৰ ভূ-ৰাজনীতিত এক গুৰুত্বপূৰ্ণ পাক! শেহতীয়াকৈ ইৰানত চৰকাৰ বিৰোধী প্ৰতিবাদকাৰীৰ ওপৰত চলোৱা কঠোৰ দমন-নীতিক গৰিহণা জনাই ৰাষ্ট্ৰসংঘৰ মানৱাধিকাৰ পৰিষদে গ্ৰহণ কৰা এক প্ৰস্তাৱৰ বিৰুদ্ধে ভোটদান কৰিছে ভাৰতে। হাজাৰ হাজাৰ লোকৰ মৃত্যু আৰু মানৱাধিকাৰ উলংঘনৰ গুৰুতৰ অভিযোগৰ মাজতে ভাৰতৰ এই স্থিতিয়ে আন্তঃৰাষ্ট্ৰীয় পৰ্যায়ত বিশেষ চৰ্চা লাভ কৰিছে।
৪৭ জনীয়া এই সদস্য পৰিষদত ইৰান চৰকাৰৰ “নিৰ্মম দমন” বন্ধ কৰাৰ দাবী জনাই উত্থাপন কৰা এই প্ৰস্তাৱটো গৃহীত হয়। পৰিষদৰ ২৫ খন সদস্য ৰাষ্ট্ৰই এই প্ৰস্তাৱৰ সপক্ষে ভোটদান কৰাৰ বিপৰীতে ১৪ খন সদস্য ৰাষ্ট্ৰই ভোটদানৰ পৰা বিৰত থাকে। আনহাতে, ভাৰত আৰু চীনকে ধৰি সাতখন দেশে এই প্ৰস্তাৱৰ বিৰোধিতা কৰি বিপক্ষে ভোটদান কৰে।
উল্লেখ্য যে, যোৱা ২৮ ডিচেম্বৰৰ পৰা ইৰানত এই প্ৰতিবাদ আৰম্ভ হৈছিল। প্ৰথম অৱস্থাত আকাশলংঘী মূল্যবৃদ্ধিৰ বিৰুদ্ধে এই অসন্তুষ্টি আৰম্ভ হৈছিল যদিও পৰৱৰ্তী সময়ত ইয়াৰ পৰিসৰ বৃদ্ধি পায়। এতিয়া দেশখনৰ ১০০ৰো অধিক চহৰত হাজাৰ হাজাৰ প্ৰতিবাদকাৰীয়ে ইৰানৰ ধৰ্মীয় শাসনৰ অন্ত পেলোৱাৰ দাবীত ৰাজপথলৈ ওলাই আহিছে।
পৰিষদৰ প্ৰস্তাৱত শান্তিপূৰ্ণ প্ৰতিবাদৰ ওপৰত চলোৱা “হিংসাত্মক দমন-নীতি”ৰ তীব্ৰ বিৰোধিতা কৰা হৈছে। এই হিংসাত হাজাৰ হাজাৰ লোকৰ মৃত্যু হৈছে। ৰাষ্ট্ৰসংঘই ইৰানক তেওঁলোকৰ মানৱাধিকাৰ সুৰক্ষাৰ দায়িত্ব পালন কৰিবলৈ আৰু বিচাৰবহিৰ্ভূত হত্যাকাণ্ড, বলপূৰ্বক অন্তৰ্ধান তথা স্বেচ্ছাচাৰী গ্ৰেপ্তাৰ বন্ধ কৰিবলৈ আহ্বান জনাইছে।
এচ’চিয়েটেড প্ৰেছ (AP)-এ সক্ৰিয়কৰ্মীৰ উদ্ধৃতি দি প্ৰকাশ কৰা অনুসৰি, এই দমন-নীতিত মৃত্যু হোৱা লোকৰ সংখ্যা অতি কমেও ৫,০০০ জনলৈ বৃদ্ধি পাইছে। আমেৰিকা যুক্তৰাষ্ট্ৰস্থিত ‘হিউমেন ৰাইটছ এক্টিভিষ্ট নিউজ এজেন্সী‘ৰ মতে, মৃতকৰ ভিতৰত ৪,৭০০ৰো অধিক প্ৰতিবাদকাৰী, ২০০ৰো অধিক চৰকাৰপন্থী প্ৰদৰ্শনকাৰী, ৪৩টি শিশু আৰু ৪০ গৰাকী সাধাৰণ নাগৰিক অন্তৰ্ভুক্ত আছে। যোৱা কেইবা দশকৰ ভিতৰত ইৰানত সংঘটিত হোৱা এয়া আটাইতকৈ ভয়াবহ হিংসাত্মক ঘটনা। ইয়াৰ উপৰি প্ৰায় ২৬,৮০০ৰো অধিক লোকক গ্ৰেপ্তাৰ কৰা হৈছে বুলিও সংস্থাটোৱে জানিবলৈ দিছে।
আনহাতে, ইৰান চৰকাৰে যোৱা বুধবাৰে প্ৰকাশ কৰা তথ্য অনুসৰি মৃত্যু হোৱা লোকৰ সংখ্যা ৩,১০০ জন। তেওঁলোকৰ দাবী অনুসৰি ইয়াৰে ২,৪০০ জন সাধাৰণ নাগৰিক আৰু নিৰাপত্তাকৰ্মী, আনহাতে বাকীসকল “সন্ত্ৰাসবাদী”।
প্ৰতিবাদকাৰীৰ মাত স্তব্ধ কৰিবলৈ যোৱা ৮ জানুৱাৰীত কৰ্তৃপক্ষই দেশখনত ইন্টাৰনেট আৰু টেলিফোন সেৱা কৰ্তন কৰিছিল। এই অশান্তিৰ বাবে ইৰান চৰকাৰে আমেৰিকা আৰু ইজৰাইলক দোষাৰোপ কৰিছে। ১৩ জানুৱাৰীৰ পৰা নিষেধাজ্ঞাসমূহ কিছু শিথিল কৰা হৈছে যদিও এতিয়াও মেছেজ সেৱা বন্ধ হৈ আছে আৰু কেৱল চৰকাৰ অনুমোদিত স্থানীয় চাইটসমূহহে চলি আছে।
ইন্টাৰনেট সেৱা বন্ধ হৈ থকাৰ বাবে আন্তঃৰাষ্ট্ৰীয় মানৱাধিকাৰ গোটসমূহে স্বতন্ত্ৰভাৱে তথ্য সংগ্ৰহ কৰাত বাধাৰ সন্মুখীন হৈছে। ইফালে, মানৱাধিকাৰ উলংঘনৰ তথ্য সংগ্ৰহ আৰু দায়বদ্ধতা নিশ্চিত কৰিবলৈ ৰাষ্ট্ৰসংঘই এটা স্বতন্ত্ৰ তদন্তকাৰী দলৰ কাৰ্যকাল আৰু দুবছৰৰ বাবে বৃদ্ধি কৰিছে।
