India votes to reject Russia’s demand ৰাজধানী কিয়েভৰ বিভিন্ন অংশত ৰাছিয়াৰ বৃহৎ ক্ষেপনাস্ত্ৰৰ আক্ৰমণত ইউক্ৰেইন প্ৰায় বিধ্বস্ত হৈ পৰিছে। সাত মাহ ধৰি চলি থকা যুদ্ধত ৰাছিয়াই সোমবাৰে এই মাৰাত্মক আক্ৰমণ চলাইছিল। এতিয়ালৈকে কমেও ১৯ জন লোকৰ মৃত্যু হোৱাৰ খবৰ পোৱা গৈছে। মৃত্যুৰ সংখ্যা আৰু বৃদ্ধি পাব পাৰে। আন ১০০ ৰো অধিক লোক আহত হৈছে।
ৰাছিয়াৰ এই অভূতপূৰ্ব ক্ষেপনাস্ত্ৰ আক্ৰমণক লৈ ব্যাপক উত্তেজনাৰ সৃষ্টি হৈছে। ইয়াৰ মাজতে আমেৰিকা যুক্তৰাষ্ট্ৰকে ধৰি পশ্চিমীয়া দেশসমূহে ক্ষোভ আৰু গৰিহনা প্ৰকাশ কৰিছে।
লগতে পঢ়ক: বিজেপি নেতাৰ কুকীৰ্তি! ১৬ জন দলিত শ্ৰমিকক বন্দী কৰি নিৰ্যাতন; প্ৰহাৰৰ ফলত গৰ্ভপাত মহিলাৰ
পশ্চিমীয়া দেশসমূহৰ দৰে এছিয়াৰ দেশ ভাৰতেও এই ঘটনাক লৈ “গভীৰ উদ্বেগ” প্ৰকাশ কৰি এক বিবৃতি জাৰি কৰিছিল। তাৰ কেইঘণ্টামানৰ পিছতে নতুন দিল্লীয়ে ৰাষ্ট্ৰসংঘত ৰাছিয়া বিৰোধী প্ৰস্তাৱত ভোটদান কৰে।
গণভোটৰ জৰিয়তে ইউক্ৰেইনৰ চাৰিটা অঞ্চল ৰাছিয়াত সংযুক্ত কৰাৰ এটা গৰিহনা প্ৰস্তাৱ ৰাষ্ট্ৰসংঘত প্ৰস্তুত কৰা হৈছিল। ৰাছিয়াই সেই প্ৰস্তাৱটোৰ ওপৰত ভোটদানৰ বাবে গোপন বেলটৰ দাবী কৰিছিল। ৰাছিয়াৰ দাবী নাকচ কৰি ভাৰতকে ধৰি শতাধিক দেশে গোপন ভোটদানৰ বিৰুদ্ধে ভোট দিছে।
আলবেনিয়াই ১৯৩ জনীয়া ৰাষ্ট্ৰসংঘৰ সাধাৰণ সভালৈ এই গৰিহনা প্ৰস্তাৱ আনিছিল। প্ৰস্তাৱটোৱে ৰাছিয়াৰ ইউক্ৰেইনৰ ডনেটস্ক, খেৰচন, লুহানস্ক আৰু জাপোৰিঝিয়া অঞ্চলৰ সংযুক্তি আৰু তাত “অবৈধ গণভোট”ক গৰিহণা আৰু বিৰোধিতা কৰিছিল।
ৰাছিয়াই প্ৰস্তাৱটো গ্ৰহণ কৰা আলবেনিয়াৰ সিদ্ধান্তটোৰ পুনৰীক্ষণৰ বাবে আবেদন জনাইছিল। মাত্ৰ ১৩ খন দেশে ৰাছিয়াৰ পক্ষ লৈছিল। ১০৭ খন দেশ ৰাছিয়াৰ বিৰুদ্ধে থিয় দিয়ে। ৩৯ খন দেশে ভোটদানৰ পৰা বিৰত থাকে।
লগতে পঢ়ক: গুৱাহাটীত গ্ৰেপ্তাৰ ভুৱা পৰিচয়েৰে লুটিবলৈ চেষ্টা কৰা তিনি ছদ্মবেশী দুৰ্নীতি বিৰোধী শাখাৰ বিষয়া!
কূটনৈতিক মহলৰ মতে ৰাছিয়া আৰু চীনে পৰাজয় অনিবাৰ্য জানিয়েই ইয়াত ভোট দিয়া নাছিল। ৰাষ্ট্ৰসংঘত ৰাছিয়াৰ স্থায়ী প্ৰতিনিধি ভাচিলি নেবেঞ্জিয়াই এই ভোটদানৰ প্ৰতি তীব্ৰ প্ৰতিক্ৰিয়া ব্যক্ত কৰিছে। তেওঁ নিৰাপত্তা পৰিষদত জালিয়াতি হোৱাৰ অভিযোগ কৰিছে।
