দক্ষিণ আফ্ৰিকাত চলি থকা ১৯ বছৰ অনুৰ্ধ ক্ৰিকেট বিশ্বকাপৰ ছেমিফাইনেলত চীৰবৈৰী ভাৰত আৰু পাকিস্তান পৰস্পৰৰ মুখামুখি হ’ব।
ডেফিণ্ডিং চেম্পিয়ন ভাৰতে ৪ ফ্ৰেব্ৰুৱাৰিত পাকিস্তানৰ বিৰুদ্ধে ছেমিফাইনেলত জয়ৰ লক্ষ্যৰে অৱতীৰ্ণ হ’ব।
পাকিস্তানে শুকুৰবাৰে আফগানিস্তানক পৰাস্ত কৰি ছেমিফাইনেলত উপনীত হোৱাৰ বিপৰীতে ভাৰতে পূৰ্বেই ছেমিফাইনেলত নিজৰ স্থান সুৰক্ষিত কৰিছিল।
২৮ জানুৱাৰিত ভাৰতে অষ্ট্ৰেলিয়াক ৭৪ ৰানত পৰাস্ত কৰি ছেমিফাইনেলত উপনীত হৈছিল।
ভাৰতে প্ৰথমে বেটিং কৰি বান্ধি দিয়া ২৩৪ ৰানৰ লক্ষ্য অনুসৰণ কৰি অষ্ট্ৰলিয়ান দলটো মাত্ৰ ১৫৯ ৰানতে অলআউট হৈ যায়।
আনহাতে, শুকুৰবাৰে কোৱাৰ্টাৰ ফাইনেলত পাকিস্তানে আফগানিস্তানক ৬ উইকেটত পৰাস্ত কৰি ছেমিফাইনেলৰ পথ প্ৰশস্ত কৰে।
আফগানিস্তানে বান্ধি দিয়া ১৯০ ৰানৰ লক্ষ্য পাকিস্তানে চাৰিটা উইকেট হেৰুৱাই সংগ্ৰহ কৰে।
উল্লেখযোগ্য যে, প্ৰিয়ম গাৰ্গ নেতৃত্বাধীন ভাৰতীয় দলটো মূলত বেটিঙত যশস্বী জয়ছোৱাল আৰু বলিঙত স্পীনাৰ ৰবি বিছনোই, বেগী বলাৰ আকাশদ্বীপ সিঙ আৰু কাৰ্তিক ত্যাগীৰ ওপৰত নিৰ্ভৰশীল।
