পূব লাডাখত ভাৰতীয় সেনা বাহিনীয়ে নিজৰ অধিকাৰ আৰু স্থিতি ধৰি ৰাখিবলৈ সম্পুৰ্ণ সাজু বুলি মন্তব্য প্ৰকাশ কৰিছে স্থল সেনা প্ৰধান এম এম নাৰাভানে।
মঙলবাৰে ভাৰত আৰু চীনৰ মাজত পূব লাডাখত চলি থকা উত্তেজনাময় পৰিস্থিতি কেতিয়া সাম কাটিব বুলি সোধা এক প্ৰশ্নৰ উত্তৰত এইদৰে মত প্ৰকাশ কৰে নাৰাভানে।
‘‘আমি এনে এক সমাধানত উপনীত হ’ব লাগিব য’ত আমাৰ সৰ্বভৌমত্ত আৰু অস্তিত্ব সুৰক্ষিত হৈ থাকিব আৰু ই গ্ৰহণযোগ্য হ’ব লাগিব……ভাৰতীয় সেনা বাহিনী ইয়াৰ বাবে প্ৰয়োজনীয় সকলো ধৰণৰি পদক্ষেপৰ বাবে সদায় সাজু,’’ নৰাভানে লগতে কয়।
মঙলবাৰে ভাৰতীয় স্থল সেনা প্ৰধান গৰাকীয়ে চীন আৰু পাকিস্তানে যুটীয়াভাৱে ভাৰতৰ ওপৰত আক্ৰমণ কৰাৰ পৰিকল্পনা সম্পৰ্কতো মত ব্যক্ত কৰি ভাৰতে এনেধৰণৰ ভবিষ্যতৰ আক্ৰমণ প্ৰতিহত কৰিবলৈ সাজু বুলি উল্লেখ কৰে।
বিগত বছৰটো সীমান্তত যথেষ্ট প্ৰত্যাহ্বানপূৰ্ণ আছিল বুলি নাৰাভানে উল্লেখ কৰি সীমান্তত দেশৰ সুৰক্ষাৰ বাবে আত্মবিসৰ্জন দিয়া বীৰ শ্বহীদকো স্মৰণ কৰে।