ভাৰতীয় কূটনীতিবিদে বেইজিঙত অনুষ্ঠিত হ’বলগীয়া শীতকালীন অলিম্পিকৰ উদ্বোধনী আৰু সামৰণি অনুষ্ঠান বৰ্জন কৰাৰ সিদ্ধান্ত লৈছে।
২০২০ চনত ভাৰতীয় সৈন্যৰ বিৰুদ্ধে লাডাখৰ গালৱান উপত্যকাত যুঁজ দিয়া এজন সৈনিকক চীনে শিখাবাহক হিচাপে বাছনি কৰিছে। চীনৰ এই কাৰ্যক উচটনিমূলক বুলি গণ্য কৰিছে ভাৰতীয় কূটনীতিবিদ সকলে।
ভাৰতৰ বৈদেশিক মন্ত্ৰালয়ে আজি কূটনীতিবিদ সকলৰ সিদ্ধান্ত ঘোষণা কৰাৰ সময়ত চীনৰ এই কাৰ্যক দুখজনক বুলি অভিহিত কৰে।
“আমি এই বিষয়টোৰ প্ৰতিবেদন দেখিছো। এইটো সঁচাকৈয়ে দুখজনক যে চীনে অলিম্পিকৰ দৰে এটা অনুষ্ঠানৰ ৰাজনীতি কৰণৰ সিদ্ধান্ত লৈছে।” বৈদেশিক মন্ত্ৰালয়ে আজি কয়।
মন্ত্ৰালয়ে লগতে কয়, “আমি জনাব বিচাৰো যে বেইজিঙত থকা ভাৰতীয় দূতাবাসৰ আমাৰ চাৰ্জ ডি’এফেয়াৰসকলে বেইজিং শীতকালীন অলিম্পিকৰ উদ্বোধনী বা সামৰণি অনুষ্ঠানত উপস্থিত নাথাকিব।”
উল্লেখ্য যে যুঁজৰ সময়ত মূৰত গুৰুতৰ আঘাত পোৱা পিপলছ লিবাৰেচন আৰ্মীৰ ৰেজিমেণ্ট কমাণ্ডাৰ কি ফাবাও শীতকালীন অলিম্পিকৰ ১,২০০ জন শিখাবাহকৰ ভিতৰত এজন।
চীনা চৰকাৰী সংবাদ মাধ্যমৰ দ্বাৰা ফাবাওক নায়ক হিচাপে সন্মানিত কৰা হৈছে আৰু শিখাবাহক হিচাপে তেওঁক বাচনি কৰাৰ খবৰ প্ৰকাশ কৰিছিল।
বৈদেশিক মন্ত্ৰালয়ৰ ঘোষণাৰ কিছু পিছতে ৰাষ্ট্ৰীয় সম্প্ৰচাৰক দূৰদৰ্শনেও অলিম্পিকৰ উদ্বোধনী বা সামৰণি অনুষ্ঠান পোনপটীয়াকৈ সম্প্ৰচাৰ নকৰে বুলি ঘোষণা কৰে।
প্ৰসাৰ ভাৰতীৰ মুৰব্বী শশী শেখৰ ভেম্পতীয়ে টুইট কৰি বৈদেশিক পৰিক্ৰমা মন্ত্ৰালয় ঘোষণাৰ ফলস্বৰূপে বেইজিঙত অনুষ্ঠিত হ’বলগীয়া শীতকালীন অলিম্পিকৰ উদ্বোধনী আৰু সামৰণি অনুষ্ঠানৰ পোনপটীয়া প্ৰচাৰ নকৰে বুলি সদৰি কৰে।
উল্লেখ্য যে ২০২০ চনৰ জুন মাহত গালৱানত সংঘৰ্ষত ২০ জন ভাৰতীয় সৈনিক নিহত হৈছিল।
