বিয়াৰ সপোন লৈ বিদেশলৈ যাত্ৰা। কিন্তু, ডিঙিত মংগলসূত্ৰ আৰু শিৰত সেন্দুৰ পিন্ধাৰ আগতেই ছিন্নভিন্ন হৈ পৰিল সেই সপোন। বিয়াৰ পূৰ্বে ‘ট্ৰাম্পৰ নীতি’ৰ বাবেই আমেৰিকাৰ পৰা বিতাড়িত কৰা হ’ল বিয়াৰ কইনা সুখজিত কৌৰক। ২৬ বছৰীয়া যুৱতীগৰাকীৰ ভৱিষ্যতক লৈ এতিয়া সমগ্ৰ পৰিয়ালটো চিন্তিত হৈ পৰিছে।
অবৈধ বুলি অভিহিত কৰি এশৰো অধিক অনুপ্ৰৱেশকাৰীক ভাৰতলৈ বিতাড়িত কৰিছে ট্ৰাম্প প্ৰশাসনে। হোয়াইট হাউছলৈ অহাৰ পিছত ড’নাল্ড ট্ৰাম্পে অবৈধ অনুপ্ৰৱেশকাৰীক নিজৰ দেশলৈ ঘূৰাই পঠিয়াবলৈ সময় নষ্ট কৰা নাই।
বুধবাৰে ১০৪ জন অবৈধ অনুপ্ৰৱেশকাৰীক লৈ অমৃতসৰ বিমানবন্দৰত চি-১৭ নামৰ আমেৰিকাৰ সামৰিক বিমান অৱতৰণ কৰে। আমেৰিকাৰ পৰা বলপূৰ্বকভাৱে ভাৰতলৈ প্ৰেৰণ কৰা এই ১০৪ জন অনুপ্ৰৱেশকাৰীৰ পৰিয়াল চিন্তিত হৈ পৰিছে। এই গ্ৰুপত আছিল ২৬ বছৰীয়া সুখজিত।
পঞ্জাৱৰ বীৰপাল গাঁৱৰ বাসিন্দা সুখজিত লাখ লাখ টকা খৰচ কৰি প্ৰেমিকক বিয়া কৰাবলৈ আমেৰিকাত উপস্থিত হৈছিল। কিন্তু বিয়াৰ আগতে তেওঁক আমেৰিকাত গ্ৰেপ্তাৰ কৰা হয়। সেয়ে সেই বিয়া আৰু নহ’ল। তাৰ বিপৰীতে ট্ৰাম্পে ভাৰতলৈ প্ৰেৰণ কৰা প্ৰথমখন বিমানতেই সুখজিত নামৰ কইনাগৰাকীক পঠাই দিয়া হৈছিল।
এজেন্টৰ সহায়ত মাত্ৰ স্কুলীয়া শিক্ষা সমাপ্ত কৰা সুখজিত আমেৰিকাত উপস্থিত হয়। লাখ লাখ টকা খৰচ কৰিও একো লাভ নহ’ল। তেওঁৰ মাক আৰু ককায়েকে এতিয়া ছোৱালীজনীৰ ভৱিষ্যত কি হ’ব তাক লৈ উদ্বিগ্ন হৈ পৰিছে।
কেৱল সুখজিতে নহয়, আমেৰিকাৰ পৰা ঘূৰাই পঠোৱা আন ১০৩ জন অনুপ্ৰৱেশকাৰীৰ কাহিনীও কম বেছি পৰিমাণে একেই। কোনোৱে আমেৰিকালৈ যাবলৈ এজন এজেণ্টক ৩০ লাখ টকা, কোনোৱে ৫০ লাখ টকা, আৰু কোনোৱেবা কোটি টকা দিছিল। পঞ্জাৱৰ কৃষক স্বৰ্ণ সিঙে নিজৰ প্ৰায় ৩ একৰ মাটি বন্ধকত ৰাখি পুত্ৰ আকাশদীপক বিদেশলৈ পঠিয়াই দিয়ে। কিন্তু ষ্টুডেন্ট ভিছা লাভ কৰিব নোৱাৰা আকাশদীপে ধন সঞ্চয়ৰ বাবে ডুবাইত ট্ৰাক চালকৰ কাম কৰিছিল। ইয়াৰ পিছত তেওঁ টকাখিনি এজন এজেণ্টলৈ পঠিয়াই আমেৰিকা পায়হি। মুঠ খৰচ ষাঠি লাখতকৈও অধিক। সকলো হেৰুৱাই স্বৰ্ণ সিং এতিয়া পুত্ৰৰ ভৱিষ্যতক লৈ অধিক চিন্তিত।
একেদৰে বাছ চালক ডালেৰ সিং আৰু অজয়দীপ সিংও এজেণ্টৰ জৰিয়তে ‘ডাংকি’ পথেৰে আমেৰিকালৈ গৈছিল। ট্ৰাম্প প্ৰশাসনৰ নীতিয়ে সকলোৰে একে ভাগ্যই নিৰ্ধাৰণ কৰে।
ইপিনে, আমেৰিকাৰ ৰাষ্ট্ৰপতি ড’নাল্ড ট্ৰাম্পে কিয় সামৰিক বিমান ব্যৱহাৰ কৰি প্ৰব্ৰজনকাৰীক নিজৰ দেশলৈ ঘূৰাই পঠিয়াইছে সেই লৈ প্ৰশ্ন উত্থাপন হৈছে। তথ্য অনুসৰি আমেৰিকাৰ বায়ুসেনাৰ চি-১৭ গ্ল’বমাষ্টাৰ বিমানৰ খৰচ যিকোনো চাৰ্টাৰ্ড বিমানতকৈও বেছি, আনকি ব্যৱসায়িক শ্ৰেণীতকৈও বেছি। তেন্তে এনে সিদ্ধান্ত কিয়?
দৰাচলতে আমেৰিকাৰ ৰাষ্ট্ৰপতি ট্ৰাম্পে খৰচৰ কথা চিন্তা নকৰি সামৰিক বিমানত প্ৰব্ৰজনকাৰীক ঘূৰাই পঠিয়াই এক শক্তিশালী বাৰ্তা প্ৰেৰণ কৰিবলৈ চেষ্টা কৰিছে। প্ৰতিবেদনত কোৱা হৈছে যে ইয়াৰ খৰচ পাঁচগুণ বেছি। বাতৰি অনুসৰি ট্ৰাম্প প্ৰশাসনে প্ৰতিজন অনুপ্ৰৱেশকাৰীৰ বাবে কমেও ৪ লাখ টকা ব্যয় কৰিছে।
