আমেৰিকাৰ জৰ্জিয়াত তিনি সন্তানৰ সন্মুখতে এজন ভাৰতীয় লোকে পত্নী আৰু তিনিজন আত্মীয়ক গুলীয়াই হত্যা কৰে। ইতিমধ্যে আৰক্ষীয়ে অভিযুক্তক গ্ৰেপ্তাৰ কৰিছে। অভিযুক্ত ব্যক্তিজনৰ নাম বিজয় কুমাৰ।
বাতৰি অনুসৰি, শুকুৰবাৰে পুৱা সংঘটিত হৈছে এই কাণ্ড। ঘটনাৰ সময়ত বিজয়ৰ তিনিটা সন্তান ঘৰতে আছিল। বিজয়ে পত্নী আৰু সন্তানৰ সৈতে লৰেন্সভিল চহৰত বাস কৰিছিল।
প্ৰাথমিকভাৱে পৰিয়ালকেন্দ্ৰিক বিবাদৰ বাবেই এই হত্যাকাণ্ড সংঘটিত হোৱা বুলি সন্দেহ কৰিছে আৰক্ষীয়ে। ঘটনাটো পোহৰলৈ অহাৰ পাছত আটলান্টাত থকা ভাৰতৰ কনছুলেট জেনেৰেলে শোক প্ৰকাশ কৰাৰ লগতে পৰিয়ালক সম্ভৱপৰ সকলো সহায়ৰ আশ্বাস দিয়ে।
আৰক্ষীয়ে জনোৱা মতে, নিহত কেইজন হৈছে বিজয়ৰ পত্নী মিমু ডোগ্ৰা (৪৩), তিনিজন আত্মীয় গৌৰৱ কুমাৰ (৩৩), নিধি চন্দ্ৰ (৩৭) আৰু হৰিশ চন্দ্ৰ (৩৮)।
প্ৰত্যক্ষদৰ্শীৰ বক্তব্য অনুসৰি তেওঁলোকে চিঞৰ-বাখৰ শুনিছিল। ইয়াৰ পিছতে বন্দুকৰ গুলী ফুটাৰ শব্দ ভাহি আহে। বন্দুকৰ গুলীৰ শব্দত চুবুৰীয়াসকল ওলাই আহে। আৰক্ষী উপস্থিত হৈ বিজয়ক গ্ৰেপ্তাৰ কৰে। ঘৰৰ ভিতৰৰ পৰা উদ্ধাৰ হৈছে চাৰিটা মৃতদেহ।
আৰক্ষীয়ে জনোৱা মতে, শুকুৰবাৰে স্থানীয় সময় অনুসৰি পুৱতি নিশা প্ৰায় ২:৩০ বজাত ব্ৰুক আইভী ক’ৰ্টত সংঘটিত হয় এই ঘটনা। ঘৰত প্ৰৱেশ কৰি চাৰিজন লোকক গুলীৰ আঘাতত পৰি থকা অৱস্থাত উদ্ধাৰ কৰে।
ঘটনাৰ সময়ত বিজয়ৰ সন্তানকেইটা ঘৰতে আছিল। ভয় আৰু জীয়াই থকাৰ তাড়নাত তিনিওজনেই আলমাৰীৰ ভিতৰত লুকাই থাকে। ইয়াৰে এজনে ৯১১ নম্বৰত ফোন কৰে।কল পোৱাৰ পিছতে ঘটনাস্থলীত উপস্থিত হয় আৰক্ষী।
