ভাৰতীয় বংশোদ্ভৱ এগৰাকী চিকিৎসকে আমেৰিকা যুক্তৰাষ্ট্ৰত কৰ’না আক্ৰান্ত এগৰাকী যুৱতীৰ শৰীৰত সফলতাৰে হাঁওফাঁও প্ৰতিষ্ঠাপন কৰি বিৰল দৃষ্টান্ত গঢ়িছে।
কৰ’নাৰ সংক্ৰমণৰ ফলত যুৱতীগৰাকীৰ হাঁওফাঁও ইমান বেয়াকৈ ক্ষতিগ্ৰস্ত কৰে যে তাৎক্ষণিকভাৱে প্ৰতিষ্ঠাপন নকৰিলে যুৱতীগৰাকীৰ প্ৰাণ বচোৱা কঠিন আছিল।
এনে এক পৰিস্থিতিত ভাৰতীয় বংশোদ্ভৱ চিকিৎসক ডাঃ অংকিত ভাৰতৰ নেতৃত্বত এদল চিকিৎসকে সফলতাৰে যুৱতীগৰাকীৰ দেহত হাঁওফাঁও প্ৰতিষ্ঠাপন কৰে।
আমেৰিকা যুক্তৰাষ্ট্ৰৰ চিকিৎসাবিজ্ঞানৰ ইতিহাসত এয়া আছিল অভূতপূৰ্ব অস্ত্ৰোপচাৰ।
ছিকাগোৰ প্ৰায় কুৰি বছৰীয়া এগৰাকী যুৱতী কৰ’না আক্ৰান্ত হোৱাৰ ফলত তেওঁৰ হাঁওফাঁওৰ অৱস্থা প্ৰায় বিধ্বস্ত হৈ পৰিছিল।
যুৱতীগৰাকীক কৃত্ৰিম যন্ত্ৰৰ সহায়ত হাঁওফাঁওৰ কাৰ্যকলাপ অব্যাহত ৰখা হৈছিল।
অৱশেষত ছিকাগো নৰ্থ ৱেষ্টাৰ্ণ লাঙ্ ট্ৰেন্সপ্লেন্ট প্ৰগ্ৰামৰ থোৰাছিক ছাৰ্জাৰী এণ্ড ছাৰ্জিকেল ডাইৰেক্টৰ ডাঃ অংকিত ভাৰতে যুৱতীগৰাকীলৈ জীৱনলৈ প্ৰাণস্পন্দন কঢ়িয়াই আনে।
ডাঃ অংকিতৰ মতে এতিয়ালৈকে কৰা ট্ৰেন্সপ্লেন্টসমূহৰ ভিতৰত এইটো কঠিনতম আছিল।
জানিব পৰা মতে, যোৱা শুকুৰবাৰেই এই অস্ত্ৰোপচাৰ সফলতাৰে সম্পন্ন হয় যদিও এতিয়াহে খৱৰটো পোহৰলৈ আহিছে।
ডাঃ অংকিতৰ মতে কৰ’না সংক্ৰমণৰ ফলত যিসকলৰ হাঁওফাঁও অত্যন্ত ক্ষতিগ্ৰস্ত হৈ পৰে তেওঁলোকক ট্ৰেন্সপ্লেন্ট অবিহনে বচোৱাটো কঠিন।
বাতৰি অনুসৰি, যুৱতীগৰাকীৰ দেহত নতুনকৈ বেক্টেৰিয়া সংক্ৰমণৰ সমস্যা বৃদ্ধি পাইছিল। সেয়েহে তেওঁক বচাবলৈ প্ৰতিষ্ঠাপনৰ এই সিদ্ধান্ত গ্ৰহণ কৰা হয়।
‘ব্ৰেইন ডেড’ৰোগীৰ হাঁওফাঁও পোৱাৰ পাছত অস্ত্ৰোপচাৰ সম্পন্ন কৰা হয়।
আমেৰিকাত এয়া প্ৰথম যদিও অষ্ট্ৰিয়াত অলপতে চিকিৎসকৰ এটা দলে এগৰাকী মহিলাৰ দেহত সফলতাৰে হাঁওফাঁও প্ৰতিষ্ঠাপন কৰিছিল।