চাকৰিৰ প্ৰলোভন দি ভাৰতীয় যুৱকক বিদেশলৈ সৰবৰাহ কৰাৰ এক বৃহৎ আন্তঃৰাষ্ট্ৰীয় চক্ৰ শেহতীয়াকৈ পোহৰলৈ আহিছে। গুৰুত্বপূৰ্ণ কথাটো হ’ল যে এই সমগ্ৰ ঘটনাৰ নেপথ্যত পাকিস্তানৰ যোগসূত্ৰ থকাৰ গুৰুতৰ তথ্য পোৱা গৈছে। মূলতঃ উত্তৰ প্ৰদেশ, পঞ্জাৱ, মুম্বাই, তেলেংগানা আৰু কেৰালাৰ দৰে ৰাজ্যসমূহক লক্ষ্য কৰি চলোৱা এই প্ৰতাৰণা চক্ৰটোৰ বিৰুদ্ধে চিবিআই আৰু এনআইএৰ দৰে কেন্দ্ৰীয় সংস্থাসমূহে ইতিমধ্যে তদন্ত আৰম্ভ কৰিছে।
তদন্তকাৰী সংস্থাসমূহৰ মতে, এই চক্ৰটোৱে ভাৰতীয় যুৱকসকলক উচ্চ দৰমহাৰ চাকৰিৰ প্ৰলোভন দি কম্বোডিয়ালৈ লৈ যায়। তাত তেওঁলোকক বন্দী কৰি বিভিন্ন চাইবাৰ অপৰাধমূলক কামত লিপ্ত হ’বলৈ বাধ্য কৰোৱা হয়। অভিযোগ অনুসৰি, কেইবাশ ভাৰতীয় যুৱকক ফান্দত পেলোৱা এই চক্ৰটোৰ মূল পৰিচালকৰ ভিতৰত একাংশ পাকিস্তানী এজেণ্ট জড়িত আছে।
উল্লেখ্য যে, এই বৃহৎ মানুহ সৰবৰাহৰ ঘটনাটো ২০২৪ চনত প্ৰথমবাৰৰ বাবে পোহৰলৈ আহিছিল। প্ৰায় ৫,০০০ ভাৰতীয়ক চাকৰিৰ প্ৰতিশ্ৰুতি দি কম্বোডিয়ালৈ নিয়া হৈছিল আৰু পৰৱৰ্তী সময়ত তেওঁলোকক জোৰকৈ চাইবাৰ ডকাইতি তথা অন্যান্য ডিজিটেল অপৰাধত জড়িত কৰোৱা হৈছিল।
‘দ্য ইণ্ডিয়ান এক্সপ্ৰেছ’ৰ এক প্ৰতিবেদন অনুসৰি, উদ্ধাৰ হোৱা যুৱকসকলে তদন্তকাৰী বিষয়াক জনাইছে যে তেওঁলোকৰ নিযুক্তিৰ প্ৰক্ৰিয়াটো পাকিস্তানী এজেণ্টৰ জৰিয়তে সম্পন্ন হৈছিল।
তদন্তকাৰী সূত্ৰই প্ৰকাশ কৰা মতে, প্ৰতাৰিত ব্যক্তিসকলৰ সৈতে হোৱা বাৰ্তালাপৰ বিশ্লেষণত পাকিস্তান জড়িত থকাৰ সাক্ষ্য পোৱা গৈছে।ডিজিটেল নথি আৰু ফোন কলপৰীক্ষা কৰি দেখা গৈছে যে সেইবোৰ পাকিস্তানৰ চাৰ্ভাৰ আৰু হেণ্ডলাৰৰ সৈতে সংযুক্ত।
