দেশত কৰ’না ভাইৰাছত আক্ৰান্ত লোকৰ সংখ্যা ক্ৰমাৎ বৃদ্ধি পাইছে। এতিয়ালৈ কৰ’না আক্ৰান্তৰ সংখ্যা বৃদ্ধি পাই ৯,১৫২জন হৈছে।
আনহাতে, যোৱা ২৪ ঘন্টাত দেশত আৰু ৩৫ জন লোকৰ মৃত্যু ঘটিছে। ইয়াৰ ফলত কৰ’না ভাইৰাছৰ ফলত দেশত মৃত্যুৰ সংখ্যা সৰ্বমুঠ ৩০৮জনলৈ বৃদ্ধি পালে।
স্বাস্থ্য মন্ত্ৰ্যালয়ৰ ফালৰ পৰা জনোৱা মতে দেশৰ ভিতৰত কৰ’না ভাইৰাছৰ ফলত আটাইতকৈ বেছি ক্ষতিগ্ৰস্ত ৰাজ্য হৈছে মহাৰাষ্ট্ৰ। ৰাজ্যখনত আক্ৰান্তৰ সংখ্যা ১,৯৮৫জন হৈছেগৈ।
মহাৰাষ্ট্ৰৰ পাছতে দিল্লীত ১,১৫৪জন, তামিলনাডুত ১,০৭৫জন, ৰাজস্থানত ৮০৪জন, মধ্য প্ৰদেসত ৫৩২জন, গুজৰাটত ৫১৬জন লোক কৰ’না ভাইৰাছৰ দ্বাৰা আক্ৰান্ত হৈছে।
ইপিনে, প্ৰধান মন্ত্ৰী নৰেন্দ্ৰ মোদীয়ে ঘোষণা কৰা ২১ দিনীয়া লকডাউনৰ ম্যাদ মঙলবাৰে অন্ত পৰিব।
শনিবাৰে মুখ্য মন্ত্ৰীসকলৰ সৈতে প্ৰধান মন্ত্ৰীৰ ভিডিঅ’ কনফাৰেন্সিঙৰ যোগেদি সম্পন্ন হোৱা বৈঠকত লকডাউন বৃদ্ধিৰ ক্ষেত্ৰত সকলোবোৰ ৰাজ্যই কেন্দ্ৰৰ সৈতে সহমত পোষণ কৰিছে।
লকডাউন বৃদ্ধিৰ বিষয়টো চূড়ান্ত কৰাৰ বাবে সোমবাৰে নতুন দিল্লীত প্ৰধান মন্ত্ৰী মোদীয়ে বিশেষ বৈঠকৰ আহ্বান কৰিছে।
ভাৰতত আগন্তুক কিছুদিনত আক্ৰান্ত সংখ্যা বৃদ্ধি পোৱাৰ ইংগিত স্বাস্থ্য মন্ত্ৰ্যালয়ে ইতিমধ্যে ব্যক্ত কৰিছিল। মন্ত্ৰ্যালয়ে জানিবলৈ দিয়া মতে দেশত কৰ’না ভাইৰাছৰ দ্বাৰা আক্ৰান্তৰ ভিতৰত ৯২জন চিকিৎসক তথা স্বাস্থ্যকৰ্মী আছে।
