কামা গিজমছ : বন্ধ কৰি দিয়া হ’ল ভাৰতৰ প্ৰথমখন চেক্স টয়ৰ বিপণী

ভাৰতৰ প্ৰথম ‘চেক্স টয়’ (sex toy)ৰ বিপণীখন বন্ধ কৰা হৈছে।

যোৱা মাহত গোৱাত মুকলি কৰা বিপণীখনক লৈ গ্ৰাহকসকল যথেষ্ট উৎসাহী হৈ পৰিছিল।

কিন্তু ৰাজ্যখনৰ এখন স্থানীয় পঞ্চায়তে বিপণীখন বন্ধ কৰিবলৈ নিৰ্দেশ দিয়ে।

‘কামা গিজমছ’ নামৰ বিপণীখন ভেলেণ্টাইন ডে’ৰ দিনা গোৱাৰ কালানগুটে নামৰ ঠাইখনত মুকলি কৰা হৈছিল।

সংবাদ মাধ্যমত প্ৰকাশ পোৱা মতে, স্থানীয় পঞ্চায়তখনে বিপণীখনৰ অনুজ্ঞাপত্ৰ আৰু ইয়াত বিক্ৰী হোৱা চেক্স টয়সমূহক লৈ আপত্তি প্ৰদৰ্শন কৰে।

‘কামা গিজমছ’ মুকলি কৰা হৈছিল ‘কামাকাৰ্ট’ (KamaKart) আৰু ‘গিজমচৱালা’ (Gizmoswala) নামৰ দুটা অনলাইন চেক্স টয় বিপণীৰ উদ্যোগত।

স্থানীয় পঞ্চায়তখনে জানিবলৈ দিয়া মতে, বিপণীখনে স্থানীয় লোকসকলৰ মাজত বিৰূপ প্ৰতিক্ৰিয়াৰ সৃষ্টি কৰিছিল।

তদুপৰি বিপণীখন মুকলি কৰা হৈছিল এখন জনসমাগমপূৰ্ণ বজাৰ আৰু পৰ্যটন স্থানত।

সঠিক অনুজ্ঞাপত্ৰৰ অভাৱত বুধবাৰে বিপণীখন বন্ধ কৰি দিয়া হয়।

আনহাতে, ‘কামাকাৰ্টে’ জানিবলৈ দিয়া মতে, তেওঁলোক গোৱাৰ স্থানীয় বাসিন্দা নহয় বাবে বিপণীখন জোৰ কৰি বন্ধ কৰি দিয়া হৈছে।

এইক্ষেত্ৰত তেওঁলোকে বিপণীখন অহা মাহত পুনৰ মুকলি কৰিবলৈ প্ৰস্তুতি অব্যাহত ৰাখিছে।