প্ৰথমটো ছিজনৰ অপ্ৰত্যাশিত বিতৰ্ক আৰু আইনী মেৰপেঁচৰ অন্তত জনপ্ৰিয় কৌতুক শিল্পী সময় ৰাইনায়ো তেওঁৰ বহুল চৰ্চিত ডিজিটেল শ্ব’ ‘ইণ্ডিয়াজ গট লেটেণ্ট’ৰ দ্বিতীয়টো ছিজনৰ আনুষ্ঠানিক ঘোষণা কৰিছে। এক গুৰুত্বপূৰ্ণ পৰিৱৰ্তনৰ মাজেৰে এইবাৰ নতুন ছিজনটো বিশ্বমানৰ ষ্ট্ৰীমিং প্লেটফৰ্ম নেটফ্লিক্স আৰু ইউটিউবত একেলগে সম্প্ৰচাৰ কৰা হ’ব, যাৰ ফলত দৰ্শকে নিজৰ সুবিধা অনুসৰি একে সময়তে যিকোনো এটা প্লেটফৰ্মতে অনুষ্ঠানটো উপভোগ কৰিব পাৰিব।
মূলতঃ ইউটিউবত মুক্তি পোৱা এই অনুষ্ঠানটোৰ প্ৰথম ছিজনটো ইয়াৰ অপ্ৰত্যাশিত অভিনয় আৰু স্বাভাৱিক বাৰ্তালাপৰ বাবে অতি কম সময়ৰ ভিতৰতে ভাৰতৰ অন্যতম চৰ্চিত ডিজিটেল শ্ব’ হিচাপে পৰিগণিত হৈছিল। শেহতীয়াকৈ কৌতুক শিল্পীগৰাকীয়ে বন্ধু বলৰাজ সিঙৰ সৈতে এক ভিডিঅ’ বাৰ্তাৰ জৰিয়তে দ্বিতীয় ছিজনৰ কথা সদৰী কৰি স্পষ্ট কৰিছে যে দুয়োটা প্লেটফৰ্মতে খণ্ডসমূহৰ সময়সীমা আৰু মুক্তিৰ সময়সূচী সম্পূৰ্ণ একে হ’ব। নেটফ্লিক্স ইণ্ডিয়াই ইনষ্টাগ্ৰামত প্ৰচাৰমূলক পোষ্টৰ জৰিয়তে এই ঘোষণাক অধিক আকৰ্ষণীয় কৰি তোলাৰ সময়তে জনপ্ৰিয় কণ্টেণ্ট ক্ৰিয়েটৰ আশীষ চাঞ্চলানীয়ে পূৰ্বৰ ছিজনৰ আইনী সমস্যাৰ কথা আমোদজনকভাৱে উল্লেখ কৰি মন্তব্য কৰে যে এইবাৰ অনুষ্ঠানটোত যাতে এটা সতৰ্কবাণী বা ডিচক্লেইমাৰ দিয়া হয়, যাৰ ফলত আইনী গোচৰ যুঁজিবলৈ সহজ হয়।
উল্লেখযোগ্য যে, ২০২৫ চনৰ ফেব্ৰুৱাৰী মাহত ৰণবীৰ আল্লাহবাদিয়া, আশীষ চাঞ্চলানী আৰু অপূৰ্ব মুখিজা উপস্থিত থকা এটা খণ্ডত কৰা কিছু মন্তব্যৰ বাবে অনুষ্ঠানটোৱে তীব্ৰ প্ৰতিক্ৰিয়াৰ সন্মুখীন হৈছিল। ইয়াৰ পৰিণতিত সময় ৰাইনাৰ বিৰুদ্ধে আৰক্ষী থানাত এজাহাৰ (এফ আই আৰ) দাখিল হোৱাৰ লগতে ইউটিউবৰ পৰা অনুষ্ঠানটো আঁতৰাই পেলোৱা হৈছিল, যিয়ে কৌতুক শিল্পীগৰাকীক এক দীৰ্ঘদিনীয়া বিৰতি ল’বলৈ বাধ্য কৰাইছিল। পৰৱৰ্তী সময়ত ৰাইনায়ো নিজৰ ব্যক্তিগত সংগ্ৰাম আৰু এই বিতৰ্কক সাঙুৰি ‘ষ্টিল এলাইভ’ শীৰ্ষক এক ষ্টেণ্ড-আপ বিশেষ অনুষ্ঠানৰ জৰিয়তে প্ৰত্যাৱৰ্তন কৰিছিল আৰু ই লাখ লাখ দৰ্শকৰ সমাদৰ লাভ কৰিবলৈ সক্ষম হৈছিল।
‘ইণ্ডিয়াজ গট লেটেণ্ট’ৰ দ্বিতীয় ছিজনৰ এই ঘোষণাই কৌতুক শিল্পীগৰাকীৰ পূৰ্ণপৰ্যায়ৰ প্ৰত্যাৱৰ্তনৰ সংকেত বহন কৰিছে। অৱশ্যে, নতুন ছিজনটোৰ সম্প্ৰচাৰৰ তাৰিখ আৰু অতিথিৰ তালিকা বৰ্তমানলৈকে ৰাজহুৱা কৰা হোৱা নাই যদিও নেটফ্লিক্সৰ দৰে বৃহৎ সম্প্ৰচাৰ অংশীদাৰৰ যোগদানে অনুষ্ঠানটোক অধিক দৰ্শকৰ মাজলৈ লৈ যোৱাৰ সম্ভাৱনা প্ৰকট কৰিছে। বিতৰ্কিত প্ৰথম অধ্যায়ৰ পাছত এই দ্বৈত-প্লেটফৰ্মত মুক্তিৰ কৌশলে অনুষ্ঠানটোৰ ভৱিষ্যতৰ দিশ আৰু ইয়াৰ গাঁথনি সন্দৰ্ভত দৰ্শকৰ মাজত যথেষ্ট কৌতুহলৰ সৃষ্টি কৰিছে।
