ভাৰতৰ পৰমাণু নীতিত এক ডাঙৰ পৰিৱৰ্তন দেখা গৈছে। প্ৰতিৰক্ষা বিভাগে প্ৰথমবাৰৰ বাবে ১২টা পৰমাণু অস্ত্ৰ পোনপটীয়াকৈ যুদ্ধৰ বাবে মোতায়েন কৰিছে। আন্তঃৰাষ্ট্ৰীয় অস্ত্ৰ গৱেষণা সংস্থা চিপ্ৰি চমুকৈ এছ আই পি আৰ আইৰ এক শেহতীয়া প্ৰতিবেদনত এই দাবী কৰা হৈছে।
ইমান দিনে ভাৰতৰ নীতি আছিল যে পৰমাণু বোমা আৰু সেইবোৰ নিক্ষেপ কৰা মিছাইলসমূহ বেলেগ বেলেগ ঠাইত সংৰক্ষণ কৰি ৰখা হৈছিল। কিন্তু চিপ্ৰিৰ প্ৰতিবেদন অনুসায়ী, এইবাৰ ভাৰতে সেই পুৰণি নীতি সলনি কৰিছে। এই প্ৰথমবাৰৰ বাবে দেশে পৰমাণু অস্ত্ৰ কেৱল জমা কৰি ৰখাৰ পৰিৱৰ্তে ব্যৱহাৰৰ বাবে সম্পূৰ্ণ সাজু কৰি ৰাখিছে।
মাটিৰ তলৰ মিছাইল ঘাটি আৰু পৰমাণু চাবমেৰিনত এই যুদ্ধাস্ত্ৰসমূহ সাজু কৰি ৰখাৰ অৰ্থ হ’ল ভাৰত এতিয়া যিকোনো পৰিস্থিতিৰ বাবে সম্পূৰ্ণৰূপে প্ৰস্তুত। প্ৰতিবেদনত কোৱা হৈছে যে এই ১২টা পৰমাণু বোমাক ইতিমধ্যে মিছাইলৰ সৈতে সংযোগ কৰা হৈছে অথবা পোনপটীয়াকৈ সেনা ঘাটিলৈ প্ৰেৰণ কৰা হৈছে।
ইয়াৰ লগতে যোৱা এটা বছৰত ভাৰতৰ পৰমাণু অস্ত্ৰৰ সংখ্যাও কিছু বৃদ্ধি পাইছে। চাবমেৰিনত পৰমাণু অস্ত্ৰ লৈ সাগৰত ভাৰতীয় সেনাই নিয়মীয়াকৈ পহৰা দি থকাৰ কথাও প্ৰতিবেদনত উল্লেখ কৰা হৈছে। হিচাপ অনুসায়ী, ২০২৬ চনৰ জানুৱাৰী মাহলৈকে ভাৰতৰ হাতত প্ৰায় ১৯০টা পৰমাণু অস্ত্ৰ মজুত আছে। জল, স্থল আৰু আকাশ এই তিনিওটা পথৰেই পৰমাণু আক্ৰমণ চলোৱাৰ ক্ষমতা এতিয়া ভাৰতৰ হাতত আছে।
বিশেজ্ঞসকলৰ মতে, শান্তিপূৰ্ণ পৰিৱেশৰ সময়তো মিছাইলৰ ভিতৰত পৰমাণু বোমা ভৰাই ৰখা আৰু সাগৰত চাবমেৰিনেৰে নিয়মীয়াকৈ চকু ৰখাটোৱে প্ৰমাণ কৰে যে ভাৰতে নিজৰ সামৰিক ৰণনীতি বহু পৰিমাণে সলনি কৰি পেলাইছে।
অৱশ্যে এই পৰিৱৰ্তনৰ পাছতো ভাৰতে নিজৰ প্ৰথমে পৰমাণু আক্ৰমণ নকৰাৰ নীতিত অটল আছে। অৰ্থাৎ ভাৰতে নিজে কেতিয়াও কোনো দেশৰ ওপৰত প্ৰথম পৰমাণু বোমা নিক্ষেপ নকৰে। যদি কোনো দেশে ভাৰতৰ মাটিত বা ভাৰতীয় সেনাৰ ওপৰত পৰমাণু আক্ৰমণ কৰে, তেন্তেহে ভাৰতে ইয়াৰ উপযুক্ত প্ৰত্যুত্তৰ দিব। এই অস্ত্ৰ ভাণ্ডাৰ কোনো দেশৰ সৈতে প্ৰতিযোগিতা কৰিবলৈ নহয়, বৰঞ্চ দেশৰ সুৰক্ষা কৱচ হিচাপেহে সাজু কৰি ৰখা হৈছে।
