তেওঁ নিয়মিতভাৱে ছ’চিয়েল মিডিয়াত আপত্তিজনক আৰু ভাবুকিমূলক পোষ্ট দিয়ে। ইউটিউবত তেওঁৰ দুই লাখৰো অধিক চাবস্ক্ৰাইবাৰ আছে। তেওঁৰ বিৰুদ্ধে এজন ৰিয়েল এষ্টেট ব্যৱসায়ীক ‘হানিট্ৰেপ’ত পেলাই কোটি কোটি টকা আত্মসাৎ কৰাৰ অভিযোগ উঠিছে।
তেওঁৰ বিৰুদ্ধে আন কেইবাটাও অপৰাধমূলক অভিযোগো আছে। ১০ মাহ ধৰি আৰক্ষীৰ পৰা পলাই আছিল তেওঁ। অৱশেষত গ্ৰেপ্তাৰ হ’ল গুজৰাটৰ ইউটিউবাৰ কীৰ্তি পেটেল।
কীৰ্তি পেটেল কীৰ্তি আদালজা বুলিও পৰিচিত। ২০১৯ চনৰ পৰাই তেওঁ নিজৰ ইউটিউব চেনেলত ভিডিঅ’ পোষ্ট কৰিবলৈ আৰম্ভ কৰিছিল। আৰক্ষীয়ে তেওঁক বিচাৰি চলাথ কৰি থকাৰ সময়তো আনকি তেওঁ অনলাইনত ৰাজহুৱা ভাবুকি দিছিল বুলি অভিযোগ উঠিছে। নিয়মীয়াকৈ ছচিয়েল মিডিয়াত সক্ৰিয় হৈ আছিল তেওঁ। ইনষ্টাগ্ৰামতো সমানেই ‘জনপ্ৰিয়’ আছিল কীৰ্তি। তাত তেওঁৰ ১৩ লাখ অনুগামী আছিল।
কীৰ্তিয়ে চুৰাটৰ এজন ৰিয়েল এষ্টেট ব্যৱসায়ীক ‘হানিট্ৰেপ’ কৰি কোটি কোটি টকা আত্মসাৎ কৰাৰ অভিযোগ উঠিছে। এই গোচৰত আন চাৰিজন লোকৰ বিৰুদ্ধেও গোচৰ ৰুজু কৰা হৈছিল। ইতিমধ্যে তেওঁলোকক গ্ৰেপ্তাৰ কৰা হৈছে।
ইপিনে, বিভিন্ন কৌশলেৰে কেৱল পলাতক হৈ আছিল কীৰ্তি। চাইবাৰ বিশেষজ্ঞ আৰু স্থানীয় আৰক্ষীৰ সহায়ত অৱশেষত আহমেদাবাদৰ সাৰখেজ অঞ্চলৰ পৰা বিচাৰি উলিওৱা হয় কীৰ্তিক।
চুৰাটৰ ডিচিপি আলোক কুমাৰে কয় যে কীৰ্তি একেখন চহৰতে বেছি দিন নাথাকিছিল। তেওঁ মাজে মাজে ফোনৰ চিম কাৰ্ড সলনি কৰিছিল। যদিও তেওঁ ছ’চিয়েল মিডিয়াত সক্ৰিয় আছিল, তথাপিও চাইবাৰ বিশেষজ্ঞসকলে তেওঁৰ নেটৱৰ্ক অনুসৰণ কৰাত অসুবিধাৰ সন্মুখীন হৈছিল।
অৱশেষত কীৰ্তিৰ ইনষ্টাগ্ৰাম প্ৰফাইল স্ক্যানাৰৰ অধীনত অনা হয়। কাৰিকৰী দলটোৱে কীৰ্তিৰ শেষ অৱস্থান বিচাৰি উলিয়ায়। ‘হানিট্ৰেপ’ৰ জৰিয়তে প্ৰতাৰণা কৰাৰ উপৰিও কীৰ্তিৰ বিৰুদ্ধে ভূমি দখলকে ধৰি আন কেইবাটাও অভিযোগ উত্থাপন হৈছে।
