ভাৰতীয় ন্যায়পালিকাৰ ইতিহাসত নতুন অধ্যায় সংযোজিত কৰি ভূষণ ৰামকৃষ্ণ গাভাই দেশৰ ৫২তম মুখ্য ন্যায়াধীশ (Chief Justice of India) হিচাপে শপত গ্ৰহণ কৰিছে। ১৯৬০ চনৰ ২৪ নৱেম্বৰত মহাৰাষ্ট্ৰৰ আমৰাৱতীত জন্মগ্ৰহণ কৰা ন্যায়াধীশ গাভাই বস্তি অঞ্চলৰ এখন পৌৰসভাৰ বিদ্যালয়ত নিজৰ শিক্ষাজীৱন আৰম্ভ কৰিছিল। তেওঁ এক ভাষণত কৈছিল, “বি আৰ আম্বেদকাৰৰ প্ৰচেষ্টাৰ বাবেই তেওঁৰ দৰে পিছপৰা পৰিৱেশৰ পৰা অহা এজন ছাত্ৰইও আজি দেশৰ উচ্চতম ন্যায়ালয়ৰ মুখ্য ন্যায়াধীশ হ’ব লৈ সক্ষম হৈছে।”
১৯৮৫ চনত বম্বে উচ্চ ন্যায়ালয়ত অধিবক্তা হিচাপে কৰ্ম জীৱন আৰম্ভ কৰা গাভাই ২০০৩ চনত বম্বে উচ্চ ন্যায়ালয়ৰ ন্যায়াধীশ হিচাপে নিযুক্তি লাভ কৰে। তাত তেওঁ প্ৰায় ১৫ বছৰ সেৱা আগবঢ়াই ২০১৯ চনৰ ২৪ মে’ত ভাৰতীয় উচ্চতম ন্যায়ালয়ৰ ন্যায়াধীশ হিচাপে নিযুক্তি লাভ কৰে।
তেওঁৰ পিতৃ আৰ এছ গাভাই এজন সমাজকৰ্মী আছিল, তেওঁ বিহাৰ আৰু কেৰালাৰ ৰাজ্যপাল হিচাপে দায়িত্ব পালন কৰিছিল। আজি মুখ্য ন্যায়াধীশ হিচাপে শপত গ্ৰহণ কৰা পিছতে তেওঁ দেশৰ দ্বিতীয়জন অনুসূচিত জাতিৰ (SC) মুখ্য ন্যায়াধীশ হিচাপে পৰিগণিত হয়। ইয়াৰ পূৰ্বে ২০০৭ চনত কে জি বালকৃষ্ণন প্ৰথম অনুসূচিত জাতিৰ ব্যক্তি মুখ্য ন্যায়াধীশ হিচাপে কাৰ্যভাৰ গ্ৰহণ কৰিছিল আৰু ২০১০ চনত অৱসৰ লৈছিল।
উল্লেখ্য যে মুখ্য ন্যায়াধীশ গাভাইৰ কাৰ্যকাল চামাহীয়া হ’ব, আৰু তেওঁ চলিত বৰ্ষৰ ২৩ নৱেম্বৰত অৱসৰ গ্ৰহণ কৰিব। গাভাইৰ এই প্ৰেৰণাদায়ক জীৱনযাত্ৰাই বহু পিচপৰা সমাজৰ লোকক আগবাঢ়িবলৈ সাহস আৰু আশাৰ সঞ্চাৰ কৰিব বুলি বহু গণ্যমান্য ব্যক্তিয়ে মত প্ৰকাশ কৰিছে।
