মুখ্য মন্ত্ৰী সৰ্বানন্দ সোণোৱালে গুৱাহাটী আৰু ঢাকাৰ মাজত আৰম্ভ কৰা প্ৰথমখন আন্তৰ্জাতিক বিমান আজি লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰত আনুষ্ঠানিক ভাবে ফ্লেগ অফ কৰি এই বিমান সেৱাৰ শুভৰাম্ভ কৰে। পৰিবহন প্ৰতিষ্ঠান স্পাইচ জেটৰ অধীনৰ আন্তৰ্জাতিক বিমান সংযোগ আঁচনিৰ অধীনত গুৱাহাটী আৰু ঢাকাৰ মাজৰ এই বিমান সেৱাৰ শুভাৰম্ভ কৰে। পৰিবহন প্ৰতিষ্ঠান স্পাইচ জেটৰ অধীনৰ আন্তৰ্জাতিক বিমান সংযোগ আঁচনিৰ অধীনত গুৱাহাটী আৰু ঢাকাৰ মাজৰ এই বিমান সেৱা দৈনিক চলাচল কৰিব।
গুৱাহাটী আৰু ঢাকাৰ মাজৰ বিমান সেৱাৰ শুভাৰম্ভণি উপলক্ষে অনুষ্ঠিত সভাত ভাষণ প্ৰদান কৰি মুখ্য মন্ত্ৰী সৰ্বানন্দ সোণোৱালে কয় যে প্ৰধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে উত্তৰ-পূবৰ যোগাযোগ ব্যৱস্থা উন্নীতকৰণৰ দিশত বিভিন্ন পদক্ষেপ গ্ৰহণ কৰিছে। সোণোৱালে লগতে কয় যে অসমৰ সৈতে দক্ষিণ পূৱ এছিয়াৰ দেশসমূহৰ ৰাজধানীলৈ প্ৰত্যক্ষ বিমান সেৱা আৰম্ভ কৰাটো ৰাজ্য চৰকাৰৰ অগ্ৰাধিকাৰৰ বিষয়।
উল্লেখযোগ্য যে, আন্তৰ্জাতিক বিমান সংযোগ আঁচনিৰ অধীনত মুখ্য মন্ত্ৰী সৰ্বানন্দ সোণোৱালে কেন্দ্ৰীয় চৰকাৰক গুৱাহাটী আৰু আছিয়ান তথা বি বি এন দেশসমূহৰ ৰাজধানীৰ সৈতে উড়ানৰ লেখীয়া আঁচনিৰ জৰিয়তে বিমান সেৱাৰ প্ৰাৰম্ভণৰ বাবে আহ্বান জনাইছিল। ইয়াৰ পৰিপ্ৰেক্ষিতত প্ৰয়োজনীয় ভাইয়েবিলিটি গেপ ফাণ্ডিঙৰ বাবে অসম চৰকাৰে তিনি বছৰৰ বাবে ১০০ কোটি টকা প্ৰদানৰ প্ৰতিশ্ৰুতি প্ৰদান কৰিছে। আগন্তুক কিছু মাহৰ ভিতৰত গুৱাহাটী আৰু বেংককৰ মাজত আন এখন বিমান সেৱা আৰম্ভ হোৱাৰ উপৰি কাঠমাণ্ডু, য়াংগুণ, হানাই আৰু কুৱালালামপুৰৰ মাজতো প্ৰত্যক্ষ বিমান সেৱা আৰম্ভ হ’ব।
ভাষণ প্ৰসংগত মুখ্য মন্ত্ৰীয়ে পূৰ্বৰ চৰকাৰৰ কাৰ্যকালত সমগ্ৰ উত্তৰ-পূবক কৰি অহা বঞ্চনাৰ দিশটো উল্লেখ কৰি প্রধানমন্ত্ৰী নৰেন্দ্ৰ মোদীয়ে সমগ্ৰ উত্তৰ-পূবৰ দ্ৰুত উন্নয়নৰ দিশত লোৱা দৃষ্টান্তমূলক পদক্ষেপৰ বিষয়েও উল্লেখ কৰে।
আনহাতে, কেন্দ্ৰীয় চৰকাৰ আৰু ৰাজ্য চৰকাৰে যোগাযোগ ব্যৱস্থাৰ উত্তৰণৰ দিশত লোৱা পদক্ষেপৰ ফলশ্ৰুতিতে আজি অসমৰ কৃষকৰ উৎপাদিত সামগ্ৰীয়ে কাৰ্গো ফ্লাইটৰ জৰিয়তে ছিংগাপুৰ, আবুধাবিৰ লেখীয়া বজাৰত উপলব্ধ হোৱাৰ সুযোগ লাভ কৰিছে বুলি সোণোৱালে কয়।
অনুষ্ঠানত বক্তব্য ৰাখি বাংলাদেশৰ সহকাৰী উচ্চায়ুক্ত শ্বাহ মহম্মদ তনবীৰ মনচুৰে গুৱাহাটী আৰু ঢাকাৰ মাজত আজি আৰম্ভ কৰা প্ৰত্যক্ষ বিমান সেৱাক এক ঐতিহাসিক পদক্ষেপ হিচাপে অভিহিত কৰে। এই প্ৰত্যক্ষ বিমান সেৱাৰ ফলশ্ৰুতিত বাংলাদেশৰ ৰোগীয়ে ভাৰতৰ অন্যান্য মহানগৰীৰ পৰিৱৰ্তে গুৱাহাটীলৈ উন্নত চিকিৎসাৰ বাবে অহাৰ দিশ সূচল হোৱাৰ উপৰিও সেই দেশৰ পৰ্যটকে অসম তথা উত্তৰ পূৰ্বাঞ্চলৰ নৈসৰ্গিক দৃশ্যৰাজি উপভোগ কৰাৰ বাবে অসমলৈ অহাটো সহজ হৈ উঠিল বুলি তেওঁ কয়।
অনুষ্ঠানত উদ্যোগ আৰু বাণিজ্য মন্ত্ৰী চন্দ্ৰমোহন পাটোৱাৰী, অসামৰিক পৰিবহন বিভাগৰ সচিব প্ৰদীপ সিং খাৰোলাই বক্তব্য প্ৰদান কৰে। অনুষ্ঠানত শিক্ষান্ত্ৰী সিদ্ধাৰ্থ ভট্টাচাৰ্য্য, বিধায়ক ৰমেন্দ্ৰ নাৰায়ন কলিতা, উদ্যোগ আৰু বাণিজ্য বিভাগৰ দায়িত্বত থকা অতিৰিক্ত মুখ্য সচিব ৰবি কাপুৰৰ উপৰি অন্যান্য উচ্চপদস্থ বিষয়া সকল উপস্থিত থাকে।
ঢাকালৈ চলা আজিৰ প্ৰথমখন বিমানত স্বাস্থ্য বিভাগৰ ৰাজ্যিক মন্ত্ৰী পিযুষ হাজৰিকা, বিধায়ক কিশোৰ নাথ, প্ৰশান্ত ফুকন, অশোক শৰ্মা, ভৱেন্দ্ৰ নাথ ভৰালীৰ লগতে কেইবাগৰাকীও শীৰ্ষ পৰ্যায়ৰ বিষয়া ঢাকা অভিমুখে উৰা মাৰে।
