অলাভজনক সংস্থা জনশ্ৰুতিয়ে ভাৰতীয় দণ্ডবিধিৰ ৪৯৮এ ধাৰাত দাখিল কৰা ভুৱা অভিযোগৰ বিৰুদ্ধে আইনী সুৰক্ষাৰ দাবী জনাই আৱেদন দাখিল কৰিছিল। এই আৱেদনৰ প্ৰতি সঁহাৰি জনাই মঙলবাৰে উচ্চতম ন্যায়ালয়ে ৰায় দান কৰি কয় যে ভাৰতীয় দণ্ডবিধিৰ (আইপিচি) ৪৯৮এ ধাৰা, য’ত স্বামী বা তেওঁৰ আত্মীয়ৰ দ্বাৰা মহিলাৰ ওপৰত নিষ্ঠুৰতাক অপৰাধ হিচাপে গণ্য কৰা হয়, সেয়া ভাৰতীয় সংবিধানৰ ১৪ নং অনুচ্ছেদৰ উলংঘন নকৰে।
ন্যায়াধীশ সূৰ্য্য কান্ত আৰু এন কোটিশ্বৰ সিঙৰ বিচাৰপীঠে বৈবাহিক বিবাদত যৌতুক বিৰোধী আইনৰ অধীনত প্ৰথম এফআইআৰ পঞ্জীয়নৰ পূৰ্বে আৰক্ষীৰ প্ৰাথমিক তদন্তৰ দাবী খাৰিজ কৰি এই ৰায়দান কৰে। বিচাৰপীঠে কয়, ধাৰা ৪৯৮এ সংবিধানৰ ১৪ নং অনুচ্ছেদৰ উলংঘন কৰে বুলি কৰা যুক্তি সম্পূৰ্ণ ভুল আৰু বিভ্ৰান্তিকৰ।
সংবিধানৰ ১৫ নং অনুচ্ছেদে মহিলাৰ সুৰক্ষাৰ বাবে বিশেষ আইন প্ৰণয়নৰ ক্ষমতা ৰাষ্ট্ৰক প্ৰদান কৰিছে। এনে আইনৰ অপব্যৱহাৰৰ বিষয় ক্ষেত্ৰভিত্তিকভাৱে পৰীক্ষা কৰা উচিত।উল্লেখ্য যে, ভাৰতীয় দণ্ডবিধিৰ ৪৯৮এ ধাৰাৰ ঠাইত এতিয়া ভাৰতীয় ন্যায় সংহিতাৰ ৮৫ নং ধাৰা প্ৰযোজ্য হৈছে।
জনশ্ৰুতিৰ অধিবক্তাই আদালতত যুক্তি দাঙি ধৰে যে বহু দেশত ঘৰুৱা হিংসাৰ ক্ষেত্ৰত লিংগ নিৰ্বিশেষে সকলোৱে আইনী সুৰক্ষা লাভ কৰিব পাৰে, কিন্তু ভাৰতত এই অধিকাৰ কেৱল মহিলাৰ বাবেই সীমাবদ্ধ। ইয়াৰ উত্তৰত উচ্চতম ন্যায়ালয়ে কয়, আমি আমাৰ সাৰ্বভৌমত্ব বজাই ৰাখিছো। আমি কিয় আনৰ অনুসৰণ কৰিব লাগে? তেওঁলোকেই আমাৰ অনুসৰণ কৰক। বিচাৰপীঠে আৰু কয়, প্ৰতিটো আইনৰ অপব্যৱহাৰ হ’ব পাৰে। এনে বহু ক্ষেত্ৰ আছে য’ত মহিলাৰ ওপৰত অত্যাচাৰ হৈছে। আদালতে গোচৰ অনুসৰি এনে অভিযোগৰ তদন্তৰ ওপৰত নজৰ ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰে।
