আগন্তুক বৰ্ষত অনুষ্ঠিত হ’বলগীয়া ইণ্ডিয়ান প্ৰিমিয়াৰ লীগ, চমুকৈ আইপিএল- ৰ ১৬ তম সংস্কৰণৰ বাবে আজি খেলুৱৈৰ নিলামত অংশ লৈছে ফ্ৰেন্সাইজি সমূহে। আজি অনুষ্ঠিত হোৱা নিলামত ভংগ হয় পূৰ্বৰ সকলো অভিলেখ।
প্ৰত্যাশিতভাৱেই আজিৰ নিলামত চাৰিগৰাকী ক্ৰিকেটাৰৰ বিপৰীতে সোঁত বয় অৰ্থৰ। ইংলেণ্ডৰ তিনি খেলুৱৈ ক্ৰমে চেম কোৰান, বেন ষ্ট’কছ, হেৰী ব্ৰুক আৰু অষ্ট্ৰেলিয়াৰ কেমেৰ’ন গ্ৰীনে নিলামত লাভ কৰে বিপুল পৰিমাণৰ দৰ।
অলৰাউণ্ডাৰ চেম কোৰানক সৰ্বাধিক ১৮.৫ কোটি টকাত ক্ৰয় কৰে পঞ্জাব কিংছে। এইদৰে কোৰান আইপিএল- ৰ ইতিহাসত সৰ্বাধিক দৰত বিক্ৰী হোৱা খেলুৱৈত পৰিণত হয়।
আনহাতে অষ্ট্ৰেলিয়ান অলৰাউণ্ডাৰ গ্ৰীনে লাভ কৰে নিলামৰ দ্বিতীয় সৰ্বাধিক দৰ। গ্ৰীনক ১৭.৫ কোটি টকাত ক্ৰয় কৰিছে মুম্বাই ইণ্ডিয়ানছে। ইফালে ইংলেণ্ডৰ তাৰকা অলৰাউণ্ডাৰ বেন ষ্ট’কছক ১৬.২৫ কোটি টকাত চেন্নাই ছুপাৰ কিংছ আৰু হেৰী ব্ৰুকক ছানৰাইজাৰ্ছ হায়দৰাবাদে ১৩.২৫ কোটি টকাত ক্ৰয় কৰে।
ৱেষ্ট ইণ্ডিজৰ উইকেটকীপাৰ বেটাৰ নিকোলাছ পুৰাণক ১৬ কোটি টকাত লক্ষ্ণৌ ছুপাৰজায়েণ্টছে ক্ৰয় কৰাৰ বিপৰীতে দক্ষিণ আফ্ৰিকাৰ হেনৰিক ক্লাচেনক ছানৰাইজাৰ্ছ হায়দৰাবাদে ৫.২৫ কোটি টকাত ক্ৰয় কৰিছে। ৱেষ্ট ইণ্ডিজৰে জেচন হ’ল্ডাৰে ৰাজস্থান ৰয়েলছৰ দ্বাৰা লাভ কৰে ৫.৭৫ কোটি টকাৰ দৰ।
বৰ্তমানলৈকে এই পাঁচগৰাকী খেলুৱৈৰ দৰ ১০ কোটি টকাতকৈ অধিক পৰিমাণলৈকে উঠিছে। ইফালে নিলামত হঠাতে দৰ বৃদ্ধি পায় আনকেপড অল ৰাউণ্ডাৰ বিভ্ৰান্ত শৰ্মাৰ। খেলুৱৈ গৰাকীক ছানৰাইজাৰ্ছ হায়দৰাবাদে ২.৬০ কোটি টকাত ক্ৰয় কৰে।
আনহাতে ভাৰতীয় তাৰকা খেলুৱৈ মায়াংক আগৰৱালাকো ৮.২৫ কোটি টকাত ক্ৰয় কৰিছে হায়দৰাবাদে। ইংলেণ্ডৰ বেগী বলাৰ ৰিচ টপলীক ১.৯০ কোটি টকাত ৰয়েল চেলেঞ্জাৰছ বেংগালুৰুৱে ক্ৰয় কৰে।
ইংলেণ্ডৰ লেগ-স্পিনাৰ আদিল ৰছিদক ছানৰাইজাৰ্ছ হায়দৰাবাদে ২ কোটি টকাৰ বিনিময়ত দলত অন্তৰ্ভুক্ত কৰে। আনহাতে যোৱাবাৰৰ ছিজনত ১৬ কোটি টকা লাভ কৰা কেন উইলিয়ামচনক ২ কোটি টকাত ক্ৰয় কৰিছে গুজৰাট টাইটানছে।
নিলামত ৫ কোটিতকৈ অধিক দৰ লাভ কৰি বিশেষভাৱে চৰ্চালৈ আহিছে দুগৰাকী যুৱ ভাৰতীয় পেচাৰ। পেচাৰ শিৱম মাভিক গুজৰাট টাইটানছে ৬ কোটি টকাত আৰু মুকেশ কুমাৰক ৫.৫ কোটি টকাত ক্ৰয় কৰে দিল্লী কেপিটেলছে।
