দেওবাৰে ছুইজাৰলেণ্ডত পাকিস্তান আৰু কাটাৰৰ মধ্যস্থতাত আমেৰিকা আৰু ইৰাণৰ শান্তি বৈঠক অনুষ্ঠিত হৈছিল। প্ৰথম পৰ্যায়ৰ বৈঠক অনুষ্ঠিত হৈ গৈছে। কিন্তু ই কিমান ইতিবাচক আছিল সেই লৈ ইতিমধ্যে প্ৰশ্ন উত্থাপন হ’বলৈ আৰম্ভ কৰিছে। কাৰণ, একাধিক সংবাদ মাধ্যমৰ সূত্ৰৰ মতে, আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ভাবুকিৰ বাবে ইৰাণৰ প্ৰতিনিধিসকলে ৮০ মিনিটৰ পিছত বৈঠকৰ পৰা ওলাই গৈছিল। এই সমগ্ৰ ঘটনাত পাকিস্তানও স্তম্ভিত হৈ পৰিছে।
কিছুদিন পূৰ্বে ইৰাণ আৰু আমেৰিকাই পশ্চিম এছিয়াত স্থায়ীভাৱে শান্তি ঘূৰাই অনাৰ বাবে বুজাবুজি চুক্তি স্বাক্ষৰ কৰিছিল। কিন্তু চুক্তিখনৰ ১৪ দফীয়া চৰ্ত কাৰ্যকৰী আৰু পুনৰীক্ষণৰ বাবে দেওবাৰে ছুইজাৰলেণ্ডৰ বাৰ্গেনষ্টৰ এখন ৰিজ’ৰ্টত দুয়োখন দেশৰ প্ৰতিনিধিয়ে মুখামুখিকৈ বৈঠকত মিলিত হয়।
আমেৰিকাৰ প্ৰতিনিধি দলটোৰ নেতৃত্বত আছিল আমেৰিকাৰ উপ-ৰাষ্ট্ৰপতি জে ডি ভেন্স। আনহাতে, ইৰাণৰ প্ৰতিনিধি দলটোৰ নেতৃত্বত আছিল সেই দেশৰ বৈদেশিক মন্ত্ৰী আব্বাছ আৰাঘচি।
সূত্ৰসমূহৰ পৰা জানিব পৰা মতে, আলোচনাৰ প্ৰথম ৮০ মিনিট মসৃণভাৱে সমাপ্ত হয়। কিন্তু তাৰ পিছত বিৰতি লোৱা হয় । বিৰতিৰ পিছত পুনৰ দুয়োপক্ষৰ সাক্ষাৎ হোৱাৰ কথা আছিল। কিন্তু ইয়াৰ মাজতে আমেৰিকাৰ ৰাষ্ট্ৰপতিয়ে লেবাননৰ বিষয়টো উত্থাপন কৰি তেহৰাণক ভাবুকি প্ৰদান কৰে। তেওঁ কয়, “ইৰাণ সমৰ্থিত হিজবুল্লাহ আৰু লেবাননৰ অন্যান্য গোটসমূহে যদি অশান্তি বন্ধ নকৰে তেন্তে ইৰাণক পুনৰ আক্ৰমণ কৰা হ’ব। আৰু এই আক্ৰমণ পূৰ্বতকৈ ডাঙৰ আৰু শক্তিশালী হ’ব।”
ট্ৰাম্পৰ এনেকুৱা আক্ৰমণৰ পিছতে ক্ষুব্ধ ইৰাণৰ প্ৰতিনিধিয়ে বৈঠক এৰি গুচি যায়। কিন্তু শান্তি বৈঠকখন সম্পূৰ্ণৰূপে বাতিল হৈ যোৱা নাই বুলি জনা গৈছে। সোমবাৰে পুনৰ দুয়োপক্ষ মুখামুখি আলোচনাত মিলিত হ’ব।
শেহতীয়া সংঘাতৰ পৰিৱেশত এই বৈঠক অতি উল্লেখযোগ্য আছিল। ইৰাণৰ প্ৰতিনিধিৰ সৈতে সাক্ষাৎ কৰি আমেৰিকাৰ উপ-ৰাষ্ট্ৰপতি ভেন্সে দাবী কৰে যে বৈঠকত বিভিন্ন ক্ষেত্ৰত যথেষ্ট অগ্ৰগতি লাভ কৰা হৈছে। যদিও লেবানন আৰু হৰমুজ প্ৰণালীৰ দৰে বিষয়ত মতানৈক্য থাকি গ’ল। কেৱল সেয়াই নহয়, তেওঁ ট্ৰাম্পৰ বাৰ্তাও প্ৰেৰণ কৰে। তেওঁ কয়, “কূটনীতিৰ জৰিয়তে আলোচনা আগবাঢ়িলে তেহৰাণৰ সৈতে সম্পৰ্ক উন্নত কৰিবলৈ ৱাশ্বিংটন সাজু। অৰ্থপূৰ্ণ কূটনৈতিক চুক্তিৰ বাবে আপোচ আৰু নিৰন্তৰ প্ৰচেষ্টাৰ প্ৰয়োজন।”
মন কৰিবলগীয়া যে ইৰাণ-আমেৰিকাৰ শান্তিৰ বাবে ১৪টা চৰ্তত এই বুজাবুজি চুক্তি স্বাক্ষৰিত হৈছিল। ইয়াৰ ভিতৰত আটাইতকৈ উল্লেখযোগ্য হ’ল ইৰাণ, লেবানন আৰু বাকী মধ্যপ্ৰাচ্যৰ যুদ্ধ বন্ধ হ’ব। ইজৰাইল আৰু আমেৰিকাই নিশ্চয়তা দিব যে নতুনকৈ আৰু কোনো যুদ্ধ নহ’ব। আমেৰিকাই হৰমুজৰ অৱৰোধ উঠাই ল’ব। ইৰাণেও হৰমুজ মুকলি কৰিব। সেইদৰে ইৰাণৰ জাহাজৰ ওপৰত থকা নিষেধাজ্ঞা প্ৰত্যাহাৰ কৰা হ’ব।
আনহাতে, ইৰাণৰ জব্দ কৰা ২৪ মিলিয়ন ডলাৰ ঘূৰাই দিয়া হ’ব। ইৰাণৰ ওপৰত থকা নিষেধাজ্ঞা প্ৰত্যাহাৰ কৰা হ’ব। ৩০ দিনৰ ভিতৰত ইৰাণৰ আশে পাশে থকা অঞ্চলৰ পৰা সৈন্য প্ৰত্যাহাৰ কৰা হ’ব। আৰু আটাইতকৈ ডাঙৰ কথাটো হ’ল ইৰাণে পাৰমাণৱিক অস্ত্ৰ নিৰ্মাণ নকৰে। ৬০ শতাংশ সমৃদ্ধ ইউৰেনিয়ামৰ ভৱিষ্যত সন্দৰ্ভত আলোচনা অব্যাহত থাকিব।
