ইৰাণত দেশজুৰি চলি থকা চৰকাৰবিৰোধী প্ৰতিবাদক দমন কৰিবলৈ চৰকাৰে গ্ৰহণ কৰা কঠোৰ পদক্ষেপৰ ফলত ৪,০২৯ জন লোকৰ মৃত্যু হোৱাৰ এক চাঞ্চল্যকৰ তথ্য পোহৰলৈ আহিছে। আমেৰিকা যুক্তৰাষ্ট্ৰৰ এক মানৱ অধিকাৰ সংস্থাৰ মতে, এই অভিযানত কেৱল প্ৰাণহানি হোৱাই নহয়, বৰঞ্চ ২৬,০০০ তকৈও অধিক লোকক আটক কৰা হৈছে। এই হিংসাত্মক দমনৰ পৰিপ্ৰেক্ষিতত গোলকীয় পৰ্যায়ত ইৰাণ চৰকাৰ তীব্ৰ সমালোচনাৰ সন্মুখীন হৈছে, যাৰ ফলত বিশ্বৰ কেইবাখনো গুৰুত্বপূৰ্ণ সন্মিলনৰ পৰা ইৰাণৰ প্ৰতিনিধিক বহিষ্কাৰ কৰা হৈছে।
সংস্থাটোৰ তথ্য অনুসৰি, মৃতকৰ ভিতৰত ৩,৭৮৬ জন প্ৰতিবাদকাৰী, ১৮০ জন নিৰাপত্তা বাহিনীৰ লোক, ২৮ টা শিশু আৰু ৩৫ জন প্ৰতিবাদত অংশ নোলোৱা সাধাৰণ ব্যক্তি।
উল্লেখ্য যে, ইৰাণৰ পূৰ্বৰ আন্দোলনসমূহৰ ক্ষেত্ৰতো সঠিক তথ্য যোগান ধৰা এই মানৱ অধিকাৰ সংস্থাটোৱে তেওঁলোকৰ মাটিত থকা সক্ৰিয় কৰ্মীসকলৰ এক নেটৱৰ্কৰ জৰিয়তে প্ৰতিটো মৃত্যুৰ খবৰ নিশ্চিত কৰিছে। অৱশ্যে তেওঁলোকে আশংকা কৰিছে যে প্ৰকৃত মৃত্যুৰ সংখ্যা চৰকাৰী তথ্যতকৈ বহুত বেছি হ’ব পাৰে। উল্লেখ্য যে আন্তৰ্জাতিক সংবাদ সংস্থা ‘এপি‘য়ে (AP) এতিয়ালৈকে স্বতন্ত্ৰভাৱে এই পৰিসংখ্যা নিশ্চিত কৰিব পৰা নাই।
এই বৰ্বৰ হত্যাকাণ্ড আৰু দমনমূলক নীতিৰ বাবে আন্তৰ্জাতিক মঞ্চত ইৰাণ তীব্ৰ প্ৰত্যাহ্বানৰ সন্মুখীন হৈছে। চুইজাৰলেণ্ডৰ ডাভোসত অনুষ্ঠিত হ’বলগীয়া ‘ৱৰ্ল্ড ইক’নমিক ফ’ৰাম‘ৰ (World Economic Forum) এক গুৰুত্বপূৰ্ণ অনুষ্ঠানত ভাষণ দিবলৈ ইৰাণৰ বৈদেশিক মন্ত্ৰী আব্বাছ আৰাগচিলৈ প্ৰেৰণ কৰা আমন্ত্ৰণ ইতিমধ্যে বাতিল কৰা হৈছে। ফ’ৰামৰ তৰফৰ পৰা স্পষ্টকৈ জনোৱা হৈছে যে পূৰ্বে তেওঁক আমন্ত্ৰণ জনোৱা হৈছিল যদিও শেহতীয়াভাৱে ইৰাণত যিদৰে নিৰপৰাধ অসামৰিক লোকৰ প্ৰাণহানি হৈছে, তেনে পৰিপ্ৰেক্ষিতত ডাভোসত ইৰাণ চৰকাৰৰ প্ৰতিনিধিত্ব গ্ৰহণযোগ্য নহয়।
লক্ষ্যনীয় যে ইৰাণৰ চৰকাৰী পক্ষই এতিয়ালৈকে নিৰ্দিষ্টকৈ মৃত্যুৰ কোনো সংখ্যা ৰাজহুৱা কৰা নাই। অৱশ্যে, দেশখনৰ সৰ্বোচ্চ নেতা আয়াতুল্লাহ আলী খামেনেইয়ে প্ৰথমবাৰৰ বাবে এক ইংগিতপূৰ্ণ মন্তব্য কৰি কয় যে এই বিক্ষোভত “কেইবা হাজাৰ” লোকৰ মৃত্যু হৈছে। উল্লেখ্য যে, যোৱা ২৮ ডিচেম্বৰৰ পৰা দেশখনৰ দুৰ্বল অৰ্থনীতিৰ বিৰুদ্ধে আৰম্ভ হোৱা এই প্ৰতিবাদৰ পৰিণতি সন্দৰ্ভত ইৰাণৰ কোনো শীৰ্ষ নেতাৰ ফালৰ পৰা এয়াই আছিল প্ৰথম আনুষ্ঠানিক মন্তব্য। অৱশ্যে তেওঁ এই ভয়াৱহ প্ৰাণহানিৰ বাবে আমেৰিকা যুক্তৰাষ্ট্ৰকহে পোনপটীয়াকৈ দোষাৰোপ কৰে।
চৰকাৰী বিষয়াসকলৰ শেহতীয়া মন্তব্যই আটক কৰা প্ৰতিবাদকাৰীসকলৰ ভৱিষ্যতক লৈ অধিক শংকাৰ সৃষ্টি কৰিছে। দেশখনৰ ৰাষ্ট্ৰপতি, ন্যায়পালিকাৰ মুৰব্বী আৰু সংসদৰ অধ্যক্ষই যুটীয়াভাৱে প্ৰদান কৰা এক বিবৃতিত কঠোৰ সকীয়নি দিছে। তেওঁলোকে জনোৱা মতে, এই ঘটনাত জড়িত “হত্যাকাৰী” আৰু “বিদ্ৰোহী সন্ত্ৰাসবাদী”সকলক দৃষ্টান্তমূলক শাস্তি প্ৰদান কৰা হ’ব। অৱশ্যে তেওঁলোকে এইটোও লগতে কয় যে যিসকল লোক প্ৰতাৰিত হৈ বিক্ষোভত অংশ লৈছিল বা যাৰ কোনো সক্ৰিয় ভূমিকা নাছিল, তেওঁলোকৰ প্ৰতি ইছলামিক দয়া আৰু উদাৰতা প্ৰদৰ্শন কৰা হ’ব।
