ইৰানৰ সাম্প্ৰতিক ৰাজনৈতিক সংকট আৰু গণ-বিক্ষোভে এতিয়া এক চৰম উদ্বেগজনক পৰিস্থিতিৰ সৃষ্টি কৰিছে। দেশখনৰ ধৰ্মীয় নেতৃত্বৰ বিৰুদ্ধে অব্যাহত থকা এই আন্দোলন যোৱা দুসপ্তাহত অভূতপূৰ্বভাৱে হিংসাত্মক হৈ পৰিছে। বিশেষকৈ শুকুৰবাৰে নিশা বিক্ষোভৰ মাত্ৰা অধিক বৃদ্ধি পোৱাৰ পৰিপ্ৰেক্ষিতত, চৰকাৰে কঠোৰ পদক্ষেপ গ্ৰহণ কৰি সমগ্ৰ দেশতে ইণ্টাৰনেট সেৱা কৰ্তন কৰিছে। নিৰাপত্তা বাহিনী আৰু প্ৰতিবাদকাৰীৰ মাজত হোৱা এই ৰক্তাক্ত সংঘৰ্ষৰ ফলত এতিয়ালৈকে শতাধিক লোকৰ মৃত্যু ঘটিছে।
‘টাইম মেগাজিন’কে ধৰি একাধিক আন্তঃৰাষ্ট্ৰীয় সংবাদ মাধ্যমৰ প্ৰতিবেদন অনুসৰি, কেৱল তেহৰাণৰে ছখন হাস্পতালত অন্ততঃ ২১৭ জন প্ৰতিবাদকাৰীৰ মৃত্যু হৈছে। ইয়াৰে অধিকাংশ লোকৰ মৃত্যু হৈছে নিৰাপত্তা বাহিনীৰ গুলীচালনাত। তেহৰাণৰ উপৰি মছহাদ, কোম, ইছফাহান, বুশ্বহৰ আদি ১১০খনতকৈও অধিক চহৰত হিংসাত্মক প্ৰতিবাদ অব্যাহত আছে। যোৱা ১৪ দিনতকৈ অধিক সময় ধৰি চলি থকা এই আন্দোলনত বৰ্তমানলৈকে ৫ লাখতকৈ অধিক লোকে অংশগ্ৰহণ কৰিছে বুলি দাবী কৰা হৈছে।
চৰকাৰী তথ্য মতে, এতিয়ালৈকে ২১৭ জন প্ৰতিবাদকাৰীৰ লগতে ১৪ জন নিৰাপত্তা বাহিনীৰ জোৱানৰ মৃত্যু হৈছে। ইফালে ২,০০০তকৈ অধিক লোক আহত হৈছে আৰু আৰক্ষীয়ে প্ৰায় ২,৩০০ জনক আটক কৰিছে। বহু ঠাইত বিক্ষোভকাৰীয়ে বেংকত লুটপাত চলোৱাৰ লগতে ধৰ্মীয় অনুষ্ঠান আৰু চৰকাৰী ভৱনত অগ্নিসংযোগো কৰিছে।
প্ৰথম অৱস্থাত এই আন্দোলন আকাশলংঘী মূল্যবৃদ্ধি, নিবনুৱা সমস্যা আৰু মুদ্ৰাস্ফীতিৰ বিৰুদ্ধে আৰম্ভ হৈছিল। কিন্তু কালক্ৰমত ই পোনপটীয়াকৈ দেশৰ ধৰ্মীয় শাসন আৰু চৰকাৰৰ বিৰুদ্ধে এক গণবিদ্ৰোহলৈ ৰূপান্তৰিত হয়।
এই গণবিদ্ৰোহৰ সূত্ৰপাত হৈছিল বিগত বৰ্ষৰ ২৯ ডিচেম্বৰত। ইৰানী মুদ্ৰা ‘ৰিয়াল’ৰ অভাৱনীয় পতনৰ বিৰুদ্ধে ব্যৱসায়ীসকলে তেহৰাণৰ মাজমজিয়াত দোকান-পোহাৰ বন্ধ কৰি প্ৰতিবাদ সাব্যস্ত কৰিছিল। ৩০ ডিচেম্বৰত তেহৰাণ বিশ্ববিদ্যালয়ৰ ছাত্ৰ-ছাত্ৰীসকলো এই প্ৰতিবাদত চামিল হয়। ২ জানুৱাৰীত একাংশ মুখা পৰিহিত বন্দুকধাৰী লোক ৰাজপথলৈ ওলাই অহাৰ পিছৰে পৰা প্ৰতিবাদকাৰী আৰু নিৰাপত্তা বাহিনীৰ মাজত সংঘৰ্ষ অধিক তীব্ৰতৰ হৈ পৰে।
তেহৰাণৰ মেয়ৰ আলীৰেজা জকানীয়ে চৰকাৰী সংবাদ মাধ্যমত কয় যে প্ৰতিবাদকাৰীয়ে চহৰখনৰ আন্তঃগাঁথনিৰ ব্যাপক ক্ষতি কৰিছে। তেওঁৰ মতে, বিক্ষোভকাৰীয়ে হাস্পতাল, চিকিৎসা কেন্দ্ৰ আৰু ‘ইছলামিক ৰিভল্যুশ্যনেৰী গাৰ্ড কৰ্পছ’ (IRGC)-ৰ চাউনীসমূহতো আক্ৰমণ চলাইছে।
প্ৰতিবাদ দমনৰ উদ্দেশ্যে চৰকাৰে ইণ্টাৰনেট সেৱা কৰ্তন কৰি জনসাৰণৰ যোগাযোগ বিচ্ছিন্ন কৰাৰ চেষ্টা চলোৱা বুলি মানবাধিকাৰ সংগঠনসমূহে অভিযোগ উত্থাপন কৰিছে। এই পৰিস্থিতিয়ে ইৰানক এক গভীৰ ৰাজনৈতিক আৰু মানৱীয় সংকটৰ দিশে ঠেলি দিছে বুলি বিশেষজ্ঞসকলে মত প্ৰকাশ কৰিছে।
