ইৰানত চৰকাৰ বিৰোধী আন্দোলনে তীব্ৰতৰ ৰূপ ধাৰণ কৰাৰ লগে লগে পৰিস্থিতি অধিক ভয়াৱহ হৈ পৰিছে। ইণ্টাৰনেট নিৰীক্ষণকাৰী সংস্থা ‘নেটব্লকছ’ এ প্ৰকাশ কৰা তথ্য অনুসৰি, বিক্ষোভ দমনৰ উদ্দেশ্যে ইৰান চৰকাৰে সমগ্ৰ দেশজুৰি ইণ্টাৰনেট সেৱা সম্পূৰ্ণৰূপে কৰ্তন কৰিছে। এই পদক্ষেপে ইৰানৰ জনসাধাৰণৰ মৌলিক অধিকাৰ খৰ্ব কৰাৰ লগতে চৰকাৰী বাহিনীৰ হিংসাত্মক কাৰ্যকলাপ লুকুৱাই ৰখাৰ এক প্ৰচেষ্টা বুলি সংস্থাটোৱে অভিযোগ উত্থাপন কৰিছে।
ইছলামিক গণতন্ত্ৰৰ বিৰুদ্ধে যোৱা তিনি বছৰৰ ভিতৰত গঢ়ি উঠা এইটোৱেই সৰ্ববৃহৎ আন্দোলন। উচ্চ জীৱন ধাৰণৰ ব্যয় বৃদ্ধিৰ বিৰুদ্ধে ১৩ দিনৰ পূৰ্বে আৰম্ভ হোৱা এই আন্দোলনে এতিয়া ১৯৭৯ চনৰ ইছলামিক বিপ্লৱৰ পাছৰে পৰা চলি থকা ধৰ্মীয় শাসন ব্যৱস্থাৰ অন্ত পেলোৱাৰ দাবীলৈ ৰূপান্তৰিত হৈছে। নৰৱেস্থিত এনজিঅ’, ‘ইৰান হিউমেন ৰাইটছৰ মতে, নিৰাপত্তা বাহিনীৰ গুলীত এতিয়ালৈকে নজন শিশুক ধৰি অতি কমেও ৫১ জন প্ৰতিবাদকাৰী নিহত হৈছে আৰু শ শ লোক আহত হৈছে।
এএফপি (AFP)ৰ দ্বাৰা সত্যায়িত এটা ভিডিঅ’ত দেখা গৈছে যে তেহৰাণৰ সাদাতাবাদ জিলাত একাংশ লোকে পাত্ৰ বজাই চৰকাৰ বিৰোধী শ্লোগান দিছে। তেওঁলোকে সৰ্বোচ্চ নেতা আয়াতুল্লাহ আলী খামেনেইক লক্ষ্য কৰি খামেনেইৰ মৃত্যু হওক বুলি চিঞৰিছে। একেধৰণৰ প্ৰতিবাদ মাচহাদ, তাব্ৰিজ আৰু পবিত্ৰ চহৰ কোমতো দেখা গৈছে। উল্লেখ্য যে, ২০২২-২৩ চনৰ মাহছা আমিনীৰ মৃত্যুৰ পাছত হোৱা আন্দোলনৰ পাছত এয়াই দেশখনৰ আটাইতকৈ ভয়াৱহ পৰিস্থিতি।
৩ জানুৱাৰীৰ পৰা বৃদ্ধি পোৱা প্ৰতিবাদৰ সন্দৰ্ভত প্ৰথমবাৰৰ বাবে মুখ খুলি খামেনেইয়ে প্ৰতিবাদকাৰীসকলক ধ্বংসকাৰী আৰু উগ্ৰপন্থী বুলি অভিহিত কৰিছে। তেওঁ আমেৰিকাৰ ৰাষ্ট্ৰপতি ডোনাল্ড ট্ৰাম্পৰ বিৰুদ্ধে অভিযোগ উত্থাপন কৰি কয় যে ট্ৰাম্পৰ হাত হাজাৰ হাজাৰ ইৰানীয়ানৰ তেজেৰে লুতুৰি-পুতুৰি হৈ আছে।
আনহাতে, ৰাষ্ট্ৰপতি ট্ৰাম্পে ইৰানৰ নেতাসকলক কঠোৰ সকীয়ানি দি কয়, “ইৰান চৰকাৰ ডাঙৰ বিপদত পৰা যেন দেখা গৈছে। আপোনালোকে প্ৰতিবাদকাৰীৰ ওপৰত গুলীচালনা বন্ধ কৰক, অন্যথা আমি সামৰিক ব্যৱস্থা ল’বলৈ বাধ্য হ’ম। আমেৰিকাই ইৰানৰ বিদেশ মন্ত্ৰী আব্বাছ আৰাঘচীৰ অভিযোগক ভ্ৰান্ত বুলিও প্ৰত্যাখ্যান কৰিছে।
ইৰানৰ নবেল বঁটা বিজয়ী শিৰিন ইবাদিয়ে সকীয়াই দিছে যে ইণ্টাৰনেট বন্ধ কৰি নিৰাপত্তা বাহিনীয়ে এক গণহত্যাৰ প্ৰস্তুতি চলাইছে। ফ্ৰান্স, ব্ৰিটেইন আৰু জাৰ্মানীৰ নেতাসকলেও এক যুটীয়া বিবৃতিত প্ৰতিবাদকাৰীৰ মৃত্যুক গৰিহণা দিছে। আনহাতে, এমনেষ্টি ইণ্টাৰনেচনেল আৰু হিউমেন ৰাইটছ ৱাচ্ছ-এ জনোৱা মতে, নিৰাপত্তা বাহিনীয়ে শান্তিপূৰ্ণ প্ৰতিবাদকাৰীক দমন কৰিবলৈ ৰাইফল, পানীৰ হিলৈ আৰু কন্দুৱা গেছৰ নিৰ্বিচাৰ ব্যৱহাৰ কৰিছে।
