ইৰাণত খামেনেই চৰকাৰৰ বিৰুদ্ধে ৰাজপথলৈ ওলাই আহিছিল এৰফান ছলতানী নামৰ ২৬ বছৰীয়া যুৱক। যোৱা ৮ জানুৱাৰীত আৰক্ষীয়ে তেওঁক গ্ৰেপ্তাৰ কৰিছিল। দেওবাৰে ইৰাণৰ আদালতে তেওঁক মৃত্যুদণ্ডৰ শাস্তি ঘোষণা কৰে। কেইবাটাও আন্তঃৰাষ্ট্ৰীয় সংবাদ মাধ্যমে প্ৰকাশ কৰিছে যে যিকোনো মুহূৰ্ততে এৰফানক ফাঁচী দিয়া হ’ব পাৰে।
ইৰাণত মৃত্যুদণ্ডক বিৰোধী মত দমনৰ আহিলা হিচাপে ব্যৱহাৰ কৰা হৈছে। অৱশ্যে গুলী কৰি মৃত্যুদণ্ড কাৰ্যকৰী কৰাৰ প্ৰথা। সাম্প্ৰতিক প্ৰতিবাদৰ পৰিপ্ৰেক্ষিতত দাবী কৰা হৈছে যে ফাঁচীত ওলোমাই মৃত্যুদণ্ড দিয়াৰ এইটোৱেই প্ৰথম ঘটনা। কিন্তু নৰৱেত পঞ্জীয়নভুক্ত কুৰ্দি মানৱ অধিকাৰ সংস্থা হেংগা অৰ্গেনাইজেচন ফৰ হিউমেন ৰাইটছে এৰফানৰ বিচাৰ প্ৰক্ৰিয়াত স্বচ্ছতাৰ অভাৱত উদ্বেগ প্ৰকাশ কৰিছে।
অভিযোগ অনুসৰি গ্ৰেপ্তাৰৰ পিছত এৰফানক কোনো অধিবক্তা দিয়া হোৱা নাছিল। আনকি তেওঁক ৰক্ষা কৰাৰ সুযোগো দিয়া নহ’ল। হেংগাই দাবী কৰে যে তেওঁৰ পৰিয়ালেও নাজানে কোনে এৰফানক গ্ৰেপ্তাৰ কৰিছিল। এৰফানৰ ভনীয়েক তেওঁৰ উকীল। কিন্তু অভিযোগ উত্থাপন হৈছে যে তেওঁক গোচৰৰ নথি-পত্ৰও চাবলৈ দিয়া হোৱা নাছিল। আনকি তেওঁক ৰায়ক প্ৰত্যাহ্বান জনোৱাৰ সুযোগো দিয়া নহ’ল।
আন্তঃৰাষ্ট্ৰীয় সংবাদ মাধ্যমৰ বাতৰি অনুসৰি ইৰাণ চৰকাৰে এৰফানৰ মৃত্যুদণ্ডৰ বিষয়ে পৰিয়ালক অৱগত কৰিছিল ১১ জানুৱাৰীত। অৰ্থাৎ গ্ৰেপ্তাৰৰ মাত্ৰ দুদিনৰ ভিতৰতে সমগ্ৰ বিচাৰ প্ৰক্ৰিয়া সম্পূৰ্ণ হৈছিল। জানিব পৰা মতে, মৃত্যুদণ্ড ঘোষণা হোৱাৰ পিছতে এৰফানৰ পৰিয়ালৰ লোকক মাত্ৰ দহ মিনিটৰ বাবে সাক্ষাৎ কৰিবলৈ দিয়া হৈছিল।
২৮ ডিচেম্বৰৰ পৰা সমগ্ৰ ইৰাণতে প্ৰতিবাদ চলি আহিছে। সাধাৰণ লোকে ৰাজপথলৈ ওলাই আহি আৰ্থিক সংকট আৰু আইন-শৃংখলাৰ অৱনতিকে ধৰি একাধিক অভিযোগ উত্থাপন কৰিছে। ই ক্ৰমান্বয়ে চৰকাৰ বিৰোধী আন্দোলনৰ ৰূপ লৈছে। চৰকাৰী কাৰ্যালয় আৰু অট্টালিকাত জুই লগাই দিছে প্ৰতিবাদকাৰীয়ে। আৰক্ষীয়েও প্ৰতিশোধ ল’বলৈ আৰম্ভ কৰিছে। আনকি প্ৰতিবাদ দমনৰ বাবে ইৰাণৰ আৰক্ষী আৰু নিৰাপত্তাৰক্ষীৰ বিৰুদ্ধেও গুলীচালনাৰ অভিযোগ উত্থাপন হৈছে। আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি এই প্ৰতিবাদত এই পৰ্যন্ত ৬৪৮ জন লোকৰ মৃত্যু হৈছে।
