২০২০ চনত আমেৰিকাই ইৰাণৰ শীৰ্ষ সামৰিক সেনাধ্যক্ষ কাছেম ছোলেমনীক হত্যা কৰিছিল। প্ৰতিশোধ লোৱাৰ উদ্দেশ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ কন্যা ইভাংকা ট্ৰাম্পক হত্যা কৰাৰ পৰিকল্পনা ৰচনা কৰা হৈছিল।
ইভাংকাক হত্যা কৰিবলৈ মহম্মদ বাকৰ ছাদ দাউদ আল-ছাদি নামৰ এজন ইৰাকী নাগৰিকে সকলো ধৰণৰ পৰিকল্পনা কৰিছিল। ইৰাণৰ ৰিভল্যুচনেৰী গাৰ্ড (আৰ জি চি)ৰ দ্বাৰা তেওঁক প্ৰশিক্ষণ দিয়া হৈছিল। আমেৰিকাৰ সংবাদ মাধ্যম ‘নিউয়ৰ্ক পোষ্ট’ৰ এক প্ৰতিবেদনত এই কথা দাবী কৰা হৈছে।
আঠ দিন পূৰ্বে তুৰস্কত গ্ৰেপ্তাৰ কৰা হৈছে ৩২ বছৰীয়া আল-ছাদিক। পিছত তেওঁক আমেৰিকালৈ লৈ যোৱা হয়। বৰ্তমান তেওঁ ব্ৰুকলিনৰ জেলত আছে।
সংবাদ মাধ্যমৰ বাতৰি অনুসৰি আল-ছাদি ইভাংকাক হত্যা কৰিবলৈ দৃঢ়প্ৰতিজ্ঞ বুলি অভিযোগ উত্থাপন হৈছে। ট্ৰাম্পৰ পৰা ট্ৰাম্পৰ কন্যাৰ ফ্ল’ৰিডা বাসগৃহৰ ব্লুপ্ৰিণ্টো উদ্ধাৰ কৰা হয়।
ৱাশ্বিংটনত থকা ইৰাকৰ দূতাবাসৰ এজন বিষয়াই সংবাদ মাধ্যমৰ আগত কয় যে, “ছোলেমানীক হত্যা কৰাৰ পিছত আল ছাদিয়ে ইভাংকাক হত্যা কৰিব লাগে আৰু ট্ৰাম্পৰ ঘৰ জ্বলাই দিব লাগে বুলি বিভিন্ন স্থানত কৈ ফুৰিছিল।”
নিউয়ৰ্ক পোষ্টৰ বাতৰি অনুসৰি আল ছাদিয়ে নিজৰ হেণ্ডেল এক্সত ইভাংকা আৰু তেওঁৰ স্বামী জেৰেড কুছনাৰৰ ফ্ল’ৰিডাৰ বাসগৃহৰ মানচিত্ৰ পোষ্ট কৰিছিল। সেই পোষ্টটোত তেওঁ আৰবী ভাষাত লিখিছে, “মই আমেৰিকানসকলক ক’ব বিচাৰো, ছবিখন চাওক। এই ৰাজপ্ৰসাদ বা ছিক্ৰেট চাৰ্ভিচে আৰু কোনেও আপোনাক বচাব নোৱাৰে। আমি আপোনালোকৰ ওপৰত তীক্ষ্ণ দৃষ্টি ৰাখিছো। প্ৰতিশোধ মাথোঁ সময়ৰ কথা।”
প্ৰতিবেদন অনুসৰি আল ছাদিৰ জন্ম হৈছিল ইৰাকত। পিছত তেওঁ তেহৰাণলৈ গুচি যায়। তাতেই তেওঁ আই আৰ জি চিৰ পৰা প্ৰশিক্ষণ লয়। সশস্ত্ৰ সংগঠন কাটাইব হিজবুল্লাহৰ সৈতেও তেওঁৰ সম্পৰ্ক আছে। আমেৰিকান আৰু ইহুদীক লক্ষ্য কৰি লোৱা কেইবাটাও আক্ৰমণত আল ছাদি জড়িত বুলি অভিযোগ উত্থাপন কৰিছে আমেৰিকা প্ৰশাসনে। কাকতলীয়াভাৱে ২০০৯ চনত কুছনাৰৰ সৈতে বিবাহপাশত আবদ্ধ হোৱাৰ পিছত ইভাংকাই ইহুদী ধৰ্ম গ্ৰহণ কৰে।
মাৰ্চ মাহত আমষ্টাৰডামৰ বেংক অৱ নিউয়ৰ্ক মেলন বিল্ডিঙত সংঘটিত হোৱা ফায়াৰ বোম্বিং আক্ৰমণৰ সৈতে ছাদি জড়িত হৈ পৰিছে। এপ্ৰিল মাহত লণ্ডনত দুজন ইহুদীক ছুৰীৰে আঘাত কৰা আৰু শেহতীয়াকৈ টৰন্টোত আমেৰিকাৰ কনছুলেটৰ ওচৰত গুলীচালনাৰ অভিযোগো আছে আল-ছাদিৰ বিৰুদ্ধে।
