ইৰাণত চলি থকা ইছলামী শাসন বিৰোধী আন্দোলনৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে এক চাঞ্চল্যকৰ দাবী কৰিছে। তেওঁ জনাইছে যে ইৰাণৰ সৰ্বোচ্চ নেতা আয়াতুল্লাহ খামেনেইৰ নেতৃত্বত থকা চৰকাৰে তেওঁৰ সৈতে আলোচনা কৰিবলৈ ফোন কৰিছিল।
ট্ৰাম্পৰ মতে, ইৰাণৰ নিৰাপত্তাবাহিনীয়ে এতিয়ালৈকে প্ৰায় ৫০০ জন প্ৰতিবাদকাৰীক হত্যা কৰিছে আৰু এনে পৰিস্থিতিৰ মাজতে তেওঁলোকে আলোচনাৰ বাট বিচাৰিছে। দেওবাৰে ট্ৰাম্পে ইৰাণৰ বিৰুদ্ধে সামৰিক পদক্ষেপ লোৱাৰ হুংকাৰ দিছে যদিও এটা বৈঠকৰো আয়োজন চলি থকা বুলি তেওঁ ইংগিত দিছে। অৱশ্যে তেওঁ স্পষ্ট কৰি দিছে যে বৈঠকৰ আগতেই আমেৰিকাই প্ৰয়োজন সাপেক্ষে ব্যৱস্থা গ্ৰহণ কৰিব পাৰে। ট্ৰাম্পে কয় যে ইৰাণৰ মানুহে স্বাধীনতা বিচাৰিছে আৰু আমেৰিকা তেওঁলোকক সহায় কৰিবলৈ সাজু আছে।
সংবাদ সংস্থা এপি-ৰ ৰিপৰ্ট অনুসৰি ইৰাণত এতিয়ালৈকে ৫৩৮ জন প্ৰতিবাদকাৰী নিহত হৈছে আৰু দহ হাজাৰতকৈও অধিক লোকক আটক কৰা হৈছে। এই সংকটপূৰ্ণ সময়ত ইৰাণৰ ৰাষ্ট্ৰপতি সুদ পেজেশকিয়ানে প্ৰতিবাদকাৰীসকলৰ সৈতে আলোচনাত বহাৰ ইচ্ছা প্ৰকাশ কৰিছে। তেওঁ কৈছে যে জনসাধাৰণৰ সমস্যা সমাধান কৰাটো চৰকাৰৰ কৰ্তব্য আৰু তেওঁলোকৰ জীৱন ধাৰণৰ মান উন্নত কৰাৰ বাবে চৰকাৰে প্ৰতিশ্ৰুতি দিছে। পেজেশকিয়ানে লগতে জনাইছে যে শান্তিপূৰ্ণ প্ৰতিবাদৰ অধিকাৰ সকলোৰে আছে, কিন্তু যিসকলে দেশত বিশৃংখলাৰ সৃষ্টি কৰিছে তেওঁলোকৰ বিৰুদ্ধে কঠোৰ ব্যৱস্থা লোৱা হ’ব।
ইফালে ইৰাণৰ নিৰ্বাসিত যুৱৰাজ ৰেজা পহলৱীয়ে ছচিয়েল মিডিয়াৰ জৰিয়তে ৰাষ্ট্ৰপতি ট্ৰাম্পক সহায়ৰ বাবে আবেদন জনাইছে। বৰ্তমান ইৰাণৰ ৰাজধানী তেহৰানকে ধৰি সমগ্ৰ দেশতে তীব্ৰ আন্দোলন চলি আছে। ইৰাণৰ জনসাধাৰণে আকাশলংঘী মুদ্ৰাস্ফীতি আৰু ভাঙি পৰা অৰ্থনীতিৰ বিৰুদ্ধে ৰাজপথলৈ ওলাই আহিছে। বহু ঠাইত সাধাৰণ ৰাইজে নিৰাপত্তাবাহিনীক ওলোটাই খেদি পঠোৱা দেখা গৈছে। ২০২২ চনত মাহছা আমিনীৰ মৃত্যুৰ পিছত হোৱা গণ আন্দোলনৰ পিছত এয়াই দেশখনৰ আটাইতকৈ ডাঙৰ বিদ্ৰোহ বুলি ধৰা হৈছে। প্ৰতিবাদকাৰীসকলে বহু ঠাইত নিৰ্বাসিত যুৱৰাজ ৰেজা পহলৱীৰ সমৰ্থনত শ্লোগান দিছে, যাৰ পিতৃ ১৯৭৯ চনৰ ইছলামী বিপ্লৱৰ সময়ত দেশ এৰি পলাই গৈছিল। আনহাতে ইৰাণ চৰকাৰে এই সমগ্ৰ অস্থিৰতাৰ বাবে আমেৰিকাক দোষাৰোপ কৰিছে।
