আমাৰ মাজৰ বহুতৰে এটা অভ্যাস আছে যে ৰাতিপুৱাৰ আহাৰত গাখীৰ আৰু ফল একেলগে খায়। বহুতে ভাবে যে এনেদৰে খালে শৰীৰে অধিক পুষ্টি পায়। কিন্তু আন বহু লোকৰ মনত আকৌ এটা ভয় থাকে যে ফলত থকা এচিডৰ বাবে গাখীৰ ফাটি যাব পাৰে আৰু ই শৰীৰৰ বাবে ক্ষতিকৰ হ’ব পাৰে। এই বিষয়টো লৈ জনমানসত চলি থকা ভুল ধাৰণা ভাঙিবলৈ আগবাঢ়ি আহিছে ফিটনেছ কোচ ৰালষ্টন ডি’ছুজা। শেহতীয়াকৈ তেওঁ এই বিষয়ত এটা গুৰুত্বপূৰ্ণ ব্যাখ্যা আগবঢ়াই মানুহৰ মনৰ পৰা পুৰণি ভয় দূৰ কৰিবলৈ চেষ্টা কৰিছে।
সাধাৰণতে মানুহে ভাবে যে ভিটামিন চি থকা টেঙা ফলৰ সৈতে গাখীৰ খালে গাখীৰ নষ্ট হৈ যায় আৰু ইয়াৰ ফলত পেটৰ বিভিন্ন সমস্যা হ’ব পাৰে। কিন্তু ৰালষ্টনে স্পষ্ট কৰি দিছে যে গাখীৰ ফাটি যোৱা বা জমাট বন্ধা প্ৰক্ৰিয়াটো কোনো অস্বাভাৱিক কথা নহয়। তেওঁৰ মতে আমাৰ শৰীৰৰ ভিতৰতো এই প্ৰক্ৰিয়াটো অতি স্বাভাৱিকভাৱেই ঘটে। গাখীৰত কেচিন নামৰ এবিধ প্ৰ’টিন থাকে যিটো সাধাৰণতে তৰল অৱস্থাত থাকে। কিন্তু যেতিয়াই গাখীৰৰ সৈতে নেমুৰ ৰস বা ফলৰ দৰে এচিডিক উপাদান মিহলি কৰা হয়, তেতিয়াই ইয়াৰ গুণাগুণ সলনি হয় আৰু গাখীৰ ফাটিবলৈ আৰম্ভ কৰে।
বহুতেই ভাবে যে গাখীৰ ফাটি গ’লে সেয়া স্বাস্থ্যৰ বাবে বেয়া, কিন্তু আচলতে আমি খোৱা পনীৰো এই একেটা পদ্ধতিৰে তৈয়াৰ কৰা হয়। ৰালষ্টনৰ মতে আমাৰ পাকস্থলীত থকা এচিডেও হজম প্ৰক্ৰিয়াৰ অংশ হিচাপে গাখীৰক জমাট বন্ধায়। গতিকে আপুনি যদি কেৱল গাখীৰো খায়, সেই গাখীৰখিনিও পাকস্থলীলৈ যোৱাৰ পিছত ফাটি যাবই। সেয়েহে ভিটামিন চি থকা ফলৰ সৈতে গাখীৰ খালে সি স্বাস্থ্যৰ ক্ষতি কৰে বুলি ভবা কথাষাৰৰ কোনো বৈজ্ঞানিক ভিত্তি নাই।
শেষত বিশেষজ্ঞজনে জনাইছে যে যদিহে কাৰোবাৰ আগৰে পৰা হজমৰ বিশেষ সমস্যা নাই অথবা গাখীৰ খালে গা বেয়া নাপায়, তেন্তে তেওঁলোকে অনায়াসে ফল আৰু গাখীৰ একেলগে খাব পাৰে। ইয়াক লৈ ভয় কৰাৰ কোনো কাৰণ নাই কিয়নো এই খাদ্যৰ সংমিশ্ৰণে সাধাৰণতে শৰীৰৰ কোনো ক্ষতি নকৰে। কেৱল যিসকলৰ লেক্টোজ ইনটলাৰেন্স আছে বা পেটৰ সমস্যা আছে, তেওঁলোকেহে এনে খাদ্য খোৱাৰ আগতে সাৱধান হোৱা প্ৰয়োজন।
