বজাৰৰ পৰা গাখীৰ কিনাৰ আগত সাৱধান। যিহেতু এফ এছ এছ এ আই (Food Safety and Standards Authority of India)য়ে গাখীৰৰ ওপৰত চলোৱা চাৰ্ভেত এক ভয়ংকৰ তথ্য পোহৰলৈ আহিছে।
সমগ্ৰ দেশৰে গাখীৰৰ চেম্পল লৈ এফ এছ এছ এ আইয়ে গাখীৰৰ ওপৰত এক পৰীক্ষা চলাইছিল। আৰু পৰীক্ষাত গাখীৰৰ চেম্পল সমূহৰ ৪১ শতাংশই গাখীৰৰ গুণগত মান লাভ কৰাত ব্যৰ্থ হয়।
তাৰোপৰি ৭ শতাংশ চেম্পলত শৰীৰৰ কাৰণে বিপজ্জনক উপাদানো এফ এছ এছ এ আইয়ে লাভ কৰে।
এফ এছ এছ এ আইয়ে গাখীৰৰ চেম্পল সমূহত কৰা পৰীক্ষাৰ পৰা ওলোৱা ৰিজাল্ট অনুসৰি এই সমূহ গাখীৰে শৰীৰৰ উপকাৰৰ পৰিৱৰ্তে অপকাৰ হে কৰিব।
এফ এছ এছ এ আইৰ মুৰব্বী (CEO) পৱন কুমাৰ আগ্ৰৱালে কয় যে দেশৰ গাখীৰৰ চেম্পল সমূহৰ ৪০ শতাংশতকৈ বেছি ভাগেই গাখীৰৰ গুণগত মান লাভ কৰাত ব্যৰ্থ হয়। এক প্ৰকাৰ গুণগত মানৰ গাখীৰ পোৱাটোৱে জটিল হৈ পৰিছে বুলিও মুৰব্বী গৰাকীয়ে উল্লেখ কৰে।
আনহাতে পৰীক্ষাটোত যি ৭ শতাংশ গাখীৰৰ চেম্পল বিপদমুক্ত বুলি পোৱা গৈছে তাৰে আকৌ ৫.৭ শতাংশ গাখীৰত এফ্লেটক্সিন এম ১ (Aflatoxin M1) পোৱা গৈছে।
আনকি এই এফ্লেটক্সিন এম ১ (Aflatoxin M1) ব্ৰেণ্ডেদ গাখীৰতো পোৱা গৈছে। চিকিৎসকে জনোৱা অনুসৰি এই এফ্লেটক্সিন এম ১ (Aflatoxin M1)ৰ পৰা কৰ্কট ৰোগৰ দৰে জটিল ৰোগো হ’ব পাৰে।
শিশু ৰোগ বিশেষজ্ঞই জনোৱা অনুসৰি গাখীৰত থকা এই এফ্লেটক্সিন এম ১ (Aflatoxin M1)ৰ পৰা লিভাৰ কেন্সাৰো হ’ব পাৰে।
আৰু ইয়াৰ প্ৰভাৱ শিশুৰ ওপৰত সোনকালে পৰে। শিশুয়ে এনেধৰণৰ গাখীৰ নিয়মীয়াকৈ সেৱন কৰিলে শিশুৰ বিকাশ, লিভাৰ, গেছ আদিৰ সমস্যাত ভূগিব পাৰে।
