মেলবৰ্ণত আজিৰ পৰা আৰম্ভ হোৱা দ্বিতীয়খন টেষ্ট মেচৰ বাবে ভাৰতীয় দলৰ মূল একাদশ ঘোষণা কৰাৰ পিছতেই ক্ৰিকেট অনুৰাগী সকলৰ তীৰ্যক সমালোচনাৰ সন্মুখীন হৈছে প্ৰশিক্ষক ৰবি শাস্ত্ৰী।
বিৰাট কোহলীৰ অনুপস্থিতিত অভিজ্ঞ বেটছমেন হিচাপে কে এল ৰাহুলে দলত স্থান লাভ কৰিব লাগিছিল বুলি অনুৰাগীসকলে মত প্ৰকাশ কৰিছে।
এজন অনুৰাগীয়ে টুইটাৰৰ জৰিয়তে আক্ষেপ প্ৰকাশ কৰি কয় যে ৰবি শাস্ত্ৰীৰ বাবে ৰোহিত শৰ্মা আৰু কে এল ৰাহুলৰ কেৰিয়াৰ এতিয়া সংকটত।
ছ’চিয়েল মিডিয়াত ৰবি শাস্ত্ৰীক বিভিন্নজনে বিভিন্ন ধৰণে তথা অশালীন মন্তব্যৰে আক্ৰমণ কৰিছে।
উল্লেখ্য যে আজিৰ পৰা আৰম্ভ হোৱা দ্বিতীয়খন টেষ্ট মেচৰ বাবে ভাৰতীয় দলৰ মূল একাদশত চাৰিটা সাল-সলনি ঘটোৱা হৈছে।
একাদশত স্থান লাভ কৰিছে শুভমন গীল, ৰবিন্দ্ৰ জাদেজা, ঋষভ পণ্ট আৰু মহম্মদ ছিৰাজে।
উল্লেখ্য যে দীৰ্ঘ সময়ৰে পৰা সুন্দৰ ফৰ্মত আছে কে এল ৰাহুল। অষ্ট্ৰেলিয়াৰ বিৰুদ্ধে শেহতীয়া এদিনীয়া শৃংখলাত আকৰ্ষণীয় প্ৰদৰ্শন আগবঢ়াইছিল আৰু আই পি এলতো সৰ্বাধিক ৰান বনোৱা বেটছমেন আছিল।
