লেবাননৰ হিজবুল্লাহ দুৰ্গত ইজৰাইলৰ আক্ৰমণত মঙলবাৰে বিয়লি (ভাৰতৰ সময় অনুসৰি) অৰ্ধশতাধিক শিশু, ৯৪ গৰাকী মহিলাকে ধৰি কমেও ৫৫৮ জন লোক নিহত হৈছে। আকাশী বোমা বিস্ফোৰণ আৰু ৰকেট আক্ৰমণত কমেও ১৮৩৫ জন লোক আহত হৈছে। আহত লোকসকল ৫৪খন চিকিৎসালয়ত চিকিৎসাধীন হৈ আছে। গুৰুতৰভাৱে আঘাতপ্ৰাপ্ত হোৱা বহু শিশুক চিকিৎসালয়ত ভৰ্তি কৰোৱা হৈছে।
লেবাননৰ স্বাস্থ্য মন্ত্ৰালয়ে জনাইছে যে ইজৰাইলী বাহিনীয়ে দেশখনৰ বিভিন্ন অঞ্চলত অভিযান চলাইছে। আনহাতে, ইজৰাইলৰ আক্ৰমণ ৰোধ কৰিবলৈ হিজবুল্লাহ গোটেও ক্ষেপণাস্ত্ৰ নিক্ষেপ কৰিছে। মূলতঃ ইজৰাইলৰ বিমানবন্দৰক লক্ষ্য কৰি লোৱা হৈছে। ইফালে ইজৰাইল-হিজবুল্লাহ সংঘাতক লৈ চিন্তিত হৈ পৰিছে ৰাষ্ট্ৰসংঘৰ বিশ্ব শক্তিসমূহ। ৰাষ্ট্ৰসংঘই দুয়োপক্ষক শীঘ্ৰে যুদ্ধবিৰতিৰ আহ্বান জনাইছে।
ইজৰাইলৰ সেনা প্ৰধান হাৰ্জেই হালেভিয়ে কয় যে তেওঁলোকে সকলো ইউনিট নিয়োগ কৰি অধিক শক্তিশালী আক্ৰমণ চলাবলৈ ওলাইছে। আমি হিজবুল্লাহক শুবলৈ নিদিওঁ। বাহিনীটোৱে সম্পূৰ্ণ শক্তি প্ৰয়োগ কৰিব।
আমেৰিকাৰ ৰাষ্ট্ৰীয় নিৰাপত্তা উপদেষ্টা জেক চুলিভানে কয় যে আজিৰ দিনটোত বাইডেনে শান্তি ঘূৰাই অনাৰ চেষ্টা কৰিছে।
আল জাজিৰাৰ সংবাদদাতাই প্ৰকাশ কৰা অনুসৰি দক্ষিণ লেবাননৰ পৰা হাজাৰ হাজাৰ লোকে ঘৰ এৰি পলায়ন কৰিছে। এটা আন্তঃৰাষ্ট্ৰীয় স্বেচ্ছাসেৱী সংস্থাই ইজৰাইলৰ এই আচৰণক আন্তঃৰাষ্ট্ৰীয় আইন উলংঘা বুলি অভিহিত কৰিছে।
বেইৰুটৰ পৰা আল জাজিৰাৰ আন এজন সংবাদদাতাই লিখিছে, “স্থানীয় বিদ্যালয়সমূহত সাহায্য আৰু আশ্ৰয় শিবিৰ মুকলি কৰা হৈছে, কিন্তু বৰ্তমান কোনো আশ্ৰয় শিবিৰ নাই। প্ৰায় ১২০টা পৰিয়ালে দুখন বিদ্যালয়ত আশ্ৰয় লৈছে। ইয়াৰে অধিকাংশই শিশু। গৃহহীন লোকে লাভ কৰিছে পানী আৰু বিদ্যুতৰ সেৱা। বিচনাৰ ব্যৱস্থা কৰা হৈছে।
ৰাষ্ট্ৰপতি মাছুদ পেজেস্কিয়ানে কয়, আমি শান্তিৰে জীয়াই থাকিব বিচাৰো। আমি যুদ্ধ নিবিচাৰো। কিন্তু ইজৰাইলে ইয়াক লৈ পূৰ্ণাংগ সংঘাত বিচাৰে। আৰব জগতত যদি পূৰ্ণাংগ যুদ্ধ হয়, তেন্তে সেয়া কাৰো বাবে ভাল নহ’ব। আমি লেবাননক ইজৰাইলৰ হাতত আন এখন গাজা হ’বলৈ নিদিওঁ।
