যোৱা ৮ এপ্ৰিলত কাৰ্যকৰী হোৱা যুদ্ধবিৰতি ভংগ কৰি সোমবাৰে পুনৰ ইজৰাইল আৰু ইৰাণৰ মাজত মিছাইল আক্ৰমণৰ ঘটনা সংঘটিত হৈছে। এই সাম্প্ৰতিক সংঘাতৰ প্ৰতি লক্ষ্য ৰাখি ইৰাণত থকা ভাৰতীয় দূতাবাসে সোমবাৰে ভাৰতীয় নাগৰিকসকলক উপলব্ধ যিকোনো ব্যৱস্থাৰে দেশখন ত্যাগ কৰিবলৈ পৰামৰ্শ দিছে আৰু তালৈ ভ্ৰমণ নকৰিবলৈ পূৰ্বৰ নিৰ্দেশনা পুনৰাবৃত্তি কৰিছে। সমান্তৰালভাৱে, ইজৰাইলত থকা ভাৰতীয় দূতাবাসৰ ফালৰ পৰাও নাগৰিকসকলক অপ্ৰয়োজনীয় ভ্ৰমণৰ পৰা বিৰত থাকিবলৈ, স্থানীয় বাতৰিৰ ওপৰত চকু ৰাখিবলৈ আৰু ইজৰাইল কৰ্তৃপক্ষৰ সুৰক্ষা নিৰ্দেশনাৱলী কঠোৰভাৱে পালন কৰিবলৈ আহ্বান জনোৱা হৈছে।
সোমবাৰে ইৰাণত ইজৰাইলৰ দ্বিতীয় লানি আক্ৰমণৰ মাজতেই ভাৰতীয় কূটনৈতিক নিয়ন্ত্ৰণ কক্ষৰ পৰা এই সতৰ্কবাণী জাৰি কৰা হয়। বাতৰি সংস্থা এ এফ পিৰ সূত্ৰ অনুসৰি, ইৰাণৰ ৰাজধানী তেহৰাণৰ মধ্যভাগত এক বৃহৎ বিস্ফোৰণৰ শব্দ শুনা গৈছিল আৰু ইয়াৰ পাছতেই ধাৰাবাহিকভাৱে কেইবাটাও বিস্ফোৰণ ঘটে যিবোৰ ইৰাণৰ আকাশমাৰ্গ প্ৰতিৰক্ষা ব্যৱস্থাৰ পৰা হোৱা বুলি ধাৰণা কৰা হৈছে। ইৰাণৰ চৰকাৰী বাতৰি সংস্থা মেহৰে প্ৰকাশ কৰা অনুসৰি ইৰাণৰ সামৰিক বাহিনীয়ে তেহৰাণৰ আকাশত এখন শত্ৰুৰ ড্ৰোন ধ্বংস কৰিবলৈ সক্ষম হয়। এই পৰিস্থিতিৰ প্ৰতি লক্ষ্য ৰাখি তেহৰাণৰ মেহৰাবাদ আৰু কেৰমানশ্বাহ বিমান বন্দৰৰ সকলো বিমানৰ উৰণ পৰৱৰ্তী নিৰ্দেশ নিদিয়ালৈকে বাতিল কৰা বুলি আল জাজিৰাই প্ৰকাশ কৰিছে।
এই দ্বিতীয় লানি আক্ৰমণৰ কেইঘণ্টামানৰ পাছতে আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে ইজৰাইল আৰু ইৰাণক তাৎক্ষণিকভাৱে গুলীচালনা বন্ধ কৰিবলৈ আহ্বান জনায়। পৰৱৰ্তী সময়ত তেওঁ স্পষ্ট কৰে যে দুয়োপক্ষই এক তাৎক্ষণিক যুদ্ধবিৰতিৰ দিশে অগ্ৰসৰ হৈছে আৰু চূড়ান্ত আলোচনা অব্যাহত আছে। তেওঁ লগতে উল্লেখ কৰে যে ইৰাণৰ বন্দৰসমূহত আমেৰিকাৰ সামৰিক বাহিনীয়ে আৰোপ কৰা অৱৰোধ এক চূড়ান্ত চুক্তি নোহোৱা পৰ্যন্ত বাহাল থাকিব। ইয়াৰ পূৰ্বে ট্ৰাম্পে প্ৰকাশ কৰিছিল যে এই নতুন আক্ৰমণে তেহৰাণৰ সৈতে চলি থকা শান্তি আলোচনাত কোনো প্ৰভাৱ নেপেলায় আৰু ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে এই ক্ষেত্ৰত একতৰ্ফা সিদ্ধান্ত ল’ব নোৱাৰে।
ইজৰাইলে প্ৰকাশ কৰা অনুসৰি, ইৰাণে দেশখনৰ ওপৰত চলোৱা মিছাইল আক্ৰমণৰ প্ৰত্যুত্তৰত সোমবাৰে পুৱাৰ ভাগত তেওঁলোকে ইৰাণৰ পশ্চিম আৰু মধ্য অংশৰ সামৰিক লক্ষ্যস্থানসমূহত আক্ৰমণ চলায়। আমেৰিকাৰ আহ্বান স্বত্বেও দেওবাৰে ইজৰাইলে লেবাননৰ ৰাজধানী বেইৰুটৰ দক্ষিণ প্ৰান্ততো আক্ৰমণ সংঘটিত কৰিছিল, যাৰ পৰিপ্ৰেক্ষিতত ইৰাণে প্ৰত্যুত্তৰ দিয়াৰ সকিয়নি দিছিল। ইজৰাইলৰ দাবী অনুসৰি দেওবাৰে ইৰাণ সমৰ্থিত সন্ত্ৰাসবাদী গোট হিজবুল্লাই উত্তৰ ইজৰাইলত আক্ৰমণ চলোৱাৰ সমান্তৰালকৈ য়েমেনৰ ফালৰ পৰা অহা আন এক মিছাইল ইজৰাইলে আকাশতে ধ্বংস কৰে। উল্লেখযোগ্য যে ৩ জুনত ইজৰাইল আৰু লেবাননে যুদ্ধবিৰতি নবীকৰণৰ বাবে এক চুক্তিত সন্মত হৈছিল যদিও লেবানন চৰকাৰৰ অংশ নোহোৱা হিজবুল্লাই এই চুক্তি প্ৰত্যাখ্যান কৰিছিল।
স্মৰ্তব্য যে, যোৱা ২৮ ফেব্ৰুৱাৰীত ইৰাণৰ পৰা ইজৰাইললৈ অস্তিত্বৰ সংকট নামি অহা বুলি দাবী কৰি আমেৰিকা আৰু ইজৰাইলে ইৰাণৰ ওপৰত যুটীয়াভাৱে আক্ৰমণ চলাইছিল। ইয়াৰ প্ৰত্যুত্তৰত ইৰাণেও উপসাগৰীয় দেশসমূহৰ প্ৰধান চহৰ আৰু জাহাজৰ লগতে ইজৰাইল আৰু আমেৰিকাৰ সামৰিক ঘাটিত আক্ৰমণ কৰিছিল আৰু হৰমুজ প্ৰণালী অৱৰোধ কৰি গোলকীয় শক্তি সংকটৰ সৃষ্টি কৰিছিল। যোৱা ১২ এপ্ৰিলত পাকিস্তানৰ ইছলামাবাদত অনুষ্ঠিত ইৰাণ আৰু আমেৰিকাৰ মাজৰ শান্তি আলোচনা ব্যৰ্থ হোৱাৰ পাছতো অঞ্চলটোত যুদ্ধবিৰতি অটুট আছিল যদিও সোমবাৰৰ এই শেহতীয়া আক্ৰমণ-প্ৰত্যাক্ৰমণে পৰিস্থিতি পুনৰ অস্থিৰ কৰি তুলিছে আৰু ইয়াৰ পৰৱৰ্তী প্ৰভাৱৰ প্ৰতি সমগ্ৰ বিশ্বই দৃষ্টি নিৱদ্ধ ৰাখিছে।
