ইৰাণৰ সৰ্বোচ্চ নেতা আলী খামেনেইৰ মৃত্যুৰ ফলত পশ্চিম এছিয়া অস্থিৰ হৈ পৰিছে। এই পৰিবেশত হিজবুল্লাহ উগ্ৰপন্থী সংগঠনটোৱেও ইৰাণৰ হৈ যুদ্ধত প্ৰৱেশ কৰিছে। ইতিমধ্যে ইজৰাইলৰ ওপৰত ক্ষেপণাস্ত্ৰ আৰু ৰকেট আক্ৰমণ চলাইছে হিজবুল্লাই।
ইয়াৰ পিছতে এইবাৰ ইজৰাইলে তীব্ৰ প্ৰত্যুত্তৰ দিছে। ইজৰাইলৰ বাহিনীয়ে লেবাননত থকা হিজবুল্লাহৰ ঘাটিত প্ৰচণ্ড আক্ৰমণ চলায়। জানিব পৰা মতে বেইৰুটত ইজৰাইলে বিমান আক্ৰমণ চলাইছে।
উল্লেখ্য যে আমেৰিকা আৰু ইজৰাইলে ইৰাণক অহৰহ আক্ৰমণ চলাই আছে। একে সময়তে ইৰানে উপসাগৰীয় দেশসমূহত আমেৰিকাৰ ঘাটিসমূহক লক্ষ্য কৰি লৈছে। ইফালে হিজবুল্লাই ইজৰাইলৰ বিৰুদ্ধেও যুদ্ধ আৰম্ভ কৰিছে। দেওবাৰৰ পৰা হিজবুল্লাহৰ ক্ষেপণাস্ত্ৰই ইজৰাইলত আঘাত কৰিবলৈ আৰম্ভ কৰে।
ইয়াৰ বাবেই সমগ্ৰ ইজৰাইলত চাইৰেন বজোৱা হয়। ইজৰাইলৰ উত্তৰ সীমান্ত অঞ্চলত সংঘটিত হয় হিজবুল্লাহৰ এই আক্ৰমণ। যদিও এতিয়ালৈকে জনা গৈছে যে হিজবুল্লাহৰ ক্ষেপণাস্ত্ৰৰ দ্বাৰা ইজৰাইলৰ বিশেষ ক্ষতি হোৱা নাই। হিজবুল্লাই কয় যে তেওঁলোকে ইৰাণক মুকলিকৈ সমৰ্থন কৰিব আৰু এই যুদ্ধতো অংশগ্ৰহণ কৰিব।
প্ৰসংগক্ৰমে ইজৰাইলৰ সৈতে হিজবুল্লাহৰ সংঘাত দীৰ্ঘদিন ধৰি চলি আহিছে। ইজৰাইলে এই মৌলবাদী সংগঠনটোৰ মেৰুদণ্ড ভাঙি পেলাইছে। যুদ্ধবিৰতি চুক্তিৰ পিছতো ইজৰাইলে প্ৰতিদিনে হিজবুল্লাহক লক্ষ্য কৰি লৈছিল। ইজৰাইলৰ এই আক্ৰমণত নিহত হৈছে তেওঁলোকৰ শীৰ্ষ কমাণ্ডাৰ। অৱশ্যে এইবাৰ ইৰাণৰ হৈ যুঁজ দি প্ৰতিশোধ ল’বলৈ চেষ্টা কৰিছে হিজবুল্লাই।
ইফালে সাম্প্ৰতিক পৰিস্থিতিৰ প্ৰতি লক্ষ্য ৰাখি দেওবাৰে নিশা প্ৰধানমন্ত্ৰী নৰেন্দ্ৰ মোডীৰ অধ্যক্ষতাত নিৰাপত্তা সম্পৰ্কীয় কেবিনেট কমিটীৰ বৈঠক অনুষ্ঠিত হয়। সেই বৈঠকতে পশ্চিম এছিয়াৰ বৰ্তমানৰ পৰিস্থিতিৰ বিষয়ে আলোচনা কৰা হৈছিল বুলি ধাৰণা কৰা হয়। চিচিএছৰ বৈঠকত প্ৰতিৰক্ষা মন্ত্ৰী ৰাজনাথ সিং, গৃহমন্ত্ৰী অমিত শ্বাহ, বৈদেশিক পৰিক্ৰমা মন্ত্ৰী এছ জয়শংকৰ আৰু বিত্তমন্ত্ৰী নিৰ্মলা সীতাৰমণ উপস্থিত থাকে।
বৈঠকত শীৰ্ষ বিষয়াসকলে প্ৰধানমন্ত্ৰী মোডীক পশ্চিম এছিয়াৰ সাম্প্ৰতিক পৰিস্থিতি আৰু ভাৰতত ইয়াৰ প্ৰভাৱৰ বিষয়ে অৱগত কৰে। বৈঠকত ৰাষ্ট্ৰীয় নিৰাপত্তা উপদেষ্টা অজিত ডোভাল, প্ৰধানমন্ত্ৰীৰ প্ৰধান সচিব পি কে মিশ্ৰ আৰু শক্তিকান্ত দাস, প্ৰতিৰক্ষা মুৰব্বী জেনেৰেল অনিল চৌহান, কেবিনেট সচিব টিভি সোমনাথন আৰু বৈদেশিক সচিব বিক্ৰম মিশ্ৰী উপস্থিত থাকে।
সূত্ৰ অনুসৰি মধ্যপ্ৰাচ্যত বসবাস কৰা ভাৰতীয় নাগৰিকৰ নিৰাপত্তাৰ বিষয়টো বৈঠকত আলোচনা কৰা হয়। তদুপৰি মধ্যপ্ৰাচ্যত আবদ্ধ ভাৰতীয়সকলৰ নিৰাপত্তা আৰু পৰিস্থিতিৰ অৱনতি ঘটিলে ইয়াৰ সৈতে মোকাবিলা কৰাৰ উপায়ৰ বিষয়েও বৈঠকত আলোচনা কৰা হয়।
ইপিনে, মধ্যপ্ৰাচ্যত বৃদ্ধি পোৱা সামৰিক উত্তেজনাৰ বাবে বিমান সেৱা ব্যাহত হৈ পৰিছে। পশ্চিম এছিয়াৰ ডুবাই আৰু অন্যান্য বিমানবন্দৰত আবদ্ধ হৈ আছে বহু ভাৰতীয়।আনহাতে, ইৰাণীসকলে হৰমুজ প্ৰণালী বন্ধ কৰি দিছে। ইয়াৰ ফলত বিশ্বৰ বজাৰত তেলৰ মূল্য বৃদ্ধি পাব পাৰে। সেইদৰে ভাৰতৰ তেল যোগান শৃংখলতো ব্যাঘাত জন্মাব পাৰে। গতিকে এই পৰিস্থিতিৰ বিষয়েও বৈঠকত আলোচনা কৰা হয়।
ইৰাণত প্ৰায় ১০ হাজাৰ ভাৰতীয় নাগৰিক আৰু ইজৰাইলত ৪০ হাজাৰৰো অধিক ভাৰতীয় নাগৰিকে বাস কৰে। পশ্চিম এছিয়া আৰু উপসাগৰীয় দেশসমূহত বসবাস কৰা ভাৰতীয়ৰ সংখ্যা প্ৰায় ৯০ লাখ। বৈদেশিক পৰিক্ৰমা মন্ত্ৰালয়ে জনোৱা মতে, অঞ্চলটোত থকা ভাৰতীয় দূতাবাসসমূহে নিজৰ নাগৰিকৰ সৈতে নিয়মীয়াকৈ যোগাযোগ কৰি আছে আৰু হেল্পলাইন সক্ৰিয় কৰা হৈছে।
