আমেৰিকাৰ ৰাষ্ট্ৰপতি ড’নাল্ড ট্ৰাম্পে ইজৰাইলক সংযত থকাৰ পৰামৰ্শ দিছিল। ইৰাণৰ সৈতে হোৱা চুক্তি প্ৰায় চূড়ান্ত হোৱা বুলিও তেওঁ কৈছিল। এই পৰিস্থিতিত আক্ৰমণ চলালে সকলো পানী হৈ যোৱাৰ সম্ভাৱনা আছে। কিন্তু ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ট্ৰাম্পৰ পৰামৰ্শ নুশুনিলে। সোমবাৰে পুৱাই ইজৰাইলৰ সেনাই একেলগে ইৰাণৰ কেইবাটাও সামৰিক ঘাটিত আক্ৰমণ চলায়।
পশ্চিম ইৰাণত ইছলামিক ৰিভল্যুচন গাৰ্ড কৰ্পছৰ সামৰিক ঘাটি আছে। কেৱল সেয়াই নহয়, কেইবাটাও ড্ৰ’ন ঘাটি আৰু মিছাইল উৎক্ষেপণ কেন্দ্ৰও আছে। ইয়াৰ উপৰিও ইৰাণৰ সেনাৰ মধ্য ইৰাণত মিছাইল ষ্ট’ৰেজ আৰু কমাণ্ড চেণ্টাৰ আছে। আজি পুৱা ইজৰাইলৰ বায়ুসেনাই একেলগে দুয়োটা অঞ্চলতে আক্ৰমণ কৰে। ইটোৰ পিছত সিটোকৈ মিছাইল নিক্ষেপ কৰে। চাৰিওফালৰ অঞ্চলটো ক’লা ধোঁৱাই আৱৰি ধৰিছিল।
আক্ৰমণৰ পিছত ইজৰাইলৰ প্ৰতিৰক্ষা বাহিনীয়ে ছ’চিয়েল মিডিয়াত এটা পোষ্টত লিখিছে, “কিছু সময়ৰ পূৰ্বে ইজৰাইলৰ সেনাই পশ্চিম আৰু মধ্য ইৰাণৰ কেইবাটাও সামৰিক ঘাটিত আক্ৰমণ চলাইছিল।” অৱশ্যে এই ক্ষয়-ক্ষতিৰ পৰিসৰ এতিয়াও জানিব পৰা হোৱা নাই।
এই ঘটনাৰ আৰম্ভণি হৈছিল দহিয়েহত বিমান আক্ৰমণৰ জৰিয়তে। এইটো হিজবুল্লাহৰ দুৰ্গ হিচাপে পৰিচিত। ইজৰাইলে তাতেই বিমান আক্ৰমণ চলাইছিল। তেতিয়াই তেহৰানে নেতানিয়াহুৰ দেশক প্ৰত্যাক্ৰমণৰ কথা সকীয়াই দিছিল। ২৪ ঘণ্টাৰ ভিতৰতে ইছলামিক ৰিভল্যুচনেৰী গাৰ্ড কৰ্পছে হাইফাৰ পৰা প্ৰায় ২০ কিলোমিটাৰ দূৰত্বত অৱস্থিত ৰামাট ডেভিদ বিমান ঘাটিত বেলিষ্টিক মিছাইল নিক্ষেপ কৰে। যদিও এই আক্ৰমণত কোনো লোক নিহত হোৱা নাই। ইজৰাইলৰ বায়ু প্ৰতিৰক্ষা ব্যৱস্থাই আকাশত থকা ক্ষেপণাস্ত্ৰ নিষ্ক্ৰিয় কৰি পেলায়।
ইৰাণৰ আক্ৰমণৰ পিছতে আগবাঢ়ি আহে ট্ৰাম্প। তেওঁ কয়, “মই এতিয়াই বিবি (নেতানিয়াহু)ক ফোন কৰিম। মই তেওঁক ক’ম যে তেওঁ যে প্ৰত্যাক্ৰমণ নকৰে।” সেইদিনা ট্ৰাম্পৰ মাতটো অলপ ডাঙৰ ভাতৃৰ দৰে শুনা গৈছিল। তেওঁৰ ভাষাত, ‘প্ৰত্যেকেই নিজৰ নিজৰ ধৰণেৰে প্ৰত্যুত্তৰ দিছে। ইজৰাইলে আক্ৰমণ কৰিছে, ইৰাণেও আক্ৰমণ কৰিছে। এতিয়া আৰু নতুনকৈ সংঘাতৰ প্ৰয়োজন নাই।‘’
ইয়াৰ কিছু সময়ৰ পিছতে ট্ৰাম্পে নেতানিয়াহুক ফোন কৰে যদিও তেওঁলোকৰ মাজত কি আলোচনা হৈছিল সেয়া জনা নাযায়। অৱশ্যে ফোন কলৰ কিছু সময়ৰ পিছতে ট্ৰাম্পে ‘ফাইনেন্সিয়েল টাইমছ’ৰ সৈতে হোৱা এক সাক্ষাৎকাৰত কয় যে, ‘আমেৰিকাই ইৰাণৰ সৈতে কৰা যিকোনো চুক্তি ইজৰাইলে মানি লোৱাৰ বাহিৰে আন উপায় নাই। সিদ্ধান্ত মইয়েই লওঁ, তেওঁ নলয়।‘ কিন্তু ট্ৰাম্পৰ পৰামৰ্শক আওকাণ কৰি ইজৰাইলে পুনৰ আক্ৰমণ চলালে।
