১৫ মাহতকৈ অধিক দীঘলীয়া মাহৰ পাছত শেহতীয়াকৈ পেলেষ্টাইনৰ গাজাত বহু প্ৰত্যাশিত যুদ্ধবিৰতি চুক্তি কাৰ্যকৰী হৈছে। ঘৰলৈ উভতি আহিছে স্থানচ্যুত পেলেষ্টাইনীসকল। আৰু তাৰ পাছত, গাজাত ইজৰাইলী আগ্ৰাসনৰ ভয়ানক ছবিবোৰ ক্ৰমান্বয়ে উন্মোচিত হৈছে।
১৫ মাহ ধৰি গাজাৰ বিৰুদ্ধে চলি থকা আগ্ৰাসনে এই ভূখণ্ডৰ ৩৮ হাজাৰৰো অধিক শিশু অনাথ কৰি তুলিছে। আৰু প্ৰায় ১৪ হাজাৰ মহিলাই স্বামী হেৰুৱাই বিধৱা হৈ পৰিছে। যোৱা বৃহস্পতিবাৰে (২৩ জানুৱাৰী) আনাডোলু সংবাদ সংস্থাই এক প্ৰতিবেদনত এই তথ্য প্ৰকাশ কৰিছে।
গাজা স্বাস্থ্য মন্ত্ৰালয়ৰ এজন বিষয়াই বৃহস্পতিবাৰে কয় যে ২০২৩ চনৰ অক্টোবৰৰ পৰা গাজা ষ্ট্ৰিপত ইজৰাইলৰ গণহত্যাৰ আগ্ৰাসনৰ ফলত ৩৮ হাজাৰতকৈ অধিক পেলেষ্টাইনী শিশু অনাথ হৈ পৰিছে। ইজৰাইলৰ এই নিষ্ঠুৰতাৰ বাবে কমেও ১৩,৯০১ গৰাকী মহিলাও বিধৱা হৈছে বুলি বিষয়াগৰাকী জাহেৰ আল ৱাহিদীয়ে আনাডোলুক জনায়।
পেলেষ্টাইনৰ বিষয়াগৰাকীয়ে কয় যে এই দীৰ্ঘদিনীয়া আগ্ৰাসনত প্ৰায় ৩২,১৫১টা শিশুৱে পিতৃ হেৰুৱাইছে। তদুপৰি ৪৪১৭টা শিশুৱে মাতৃ হেৰুৱাই আৰু ১৯১৮টা শিশুৱে পিতৃ-মাতৃ দুয়োকে হেৰুৱাইছে।
এই পৰিসংখ্যাই গাজাৰ জনসাধাৰণৰ দুখ-কষ্টৰ তীব্ৰতাক প্ৰতিফলিত কৰে বুলিও তেওঁ কয়।
গাজাত ছয় সপ্তাহজোৰা যুদ্ধবিৰতি চুক্তিৰ প্ৰথম পৰ্যায় ১৯ জানুৱাৰীৰ পৰা কাৰ্যকৰী হয়। সেইদিনাৰ পৰাই গাজাত ইজৰাইলৰ আগ্ৰাসন বন্ধ হৈ পৰিছে। ইয়াৰ উপৰিও ১ লাখ ১১ হাজাৰ ১৬০ জনতকৈ অধিক লোক আহত হৈছে।
তিনি পৰ্যায়ৰ যুদ্ধবিৰতি চুক্তিত বন্দী বিনিময় আৰু স্থায়ী শান্তি, স্থায়ী যুদ্ধবিৰতি আৰু গাজাৰ পৰা ইজৰাইল বাহিনী প্ৰত্যাহাৰৰ লক্ষ্যও অন্তৰ্ভুক্ত কৰা হৈছে।
ইফালে যদিও গাজাত ইজৰাইলৰ বৰ্বৰ আগ্ৰাসনৰ অন্ত পৰিছে যদিও এই ভূখণ্ডত ইজৰাইলৰ আক্ৰমণত ১১ হাজাৰৰো অধিক লোক নিৰুদ্দেশ হৈ আছে। গাজাত তাৎক্ষণিক যুদ্ধবিৰতিৰ আহ্বান জনোৱা ৰাষ্ট্ৰসংঘৰ নিৰাপত্তা পৰিষদৰ প্ৰস্তাৱৰ পাছতো ইজৰাইলে দীৰ্ঘদিনীয়া ঘেৰাও কৰা ভূখণ্ডত নিৰ্মম আক্ৰমণ অব্যাহত ৰাখিছে।
ৰাষ্ট্ৰসংঘৰ তথ্য অনুসৰি ইজৰাইলৰ নৃশংস আক্ৰমণৰ ফলত গাজাত প্ৰায় ৮৫ শতাংশ পেলেষ্টাইনী লোক স্থানচ্যুত হৈছে। তদুপৰি এই অৱৰোধ ভূখণ্ডৰ ৬০ শতাংশ আন্তঃগাঁথনি ক্ষতিগ্ৰস্ত বা ধ্বংস হৈছে। ইতিমধ্যে ইজৰাইলৰ বিৰুদ্ধে আন্তঃৰাষ্ট্ৰীয় ন্যায়ালয়ত গণহত্যাৰ অভিযোগ উত্থাপন হৈছে।
