ভাৰতৰ দ্বিতীয় চন্দ্ৰ অভিযানৰ দুবছৰৰ পিছত আন এক অভিযানৰ বাবে সাজু হৈছে ভাৰতীয় মহাকাশ আৰু গৱেষণা সংস্থা (ইছৰো)। চলিত বৰ্ষৰ আগষ্টত চন্দ্ৰযান-৩ ৰ উৎক্ষেপণৰ দ্বাৰা তৃতীয় চন্দ্ৰ অভিযানৰ লক্ষ্য লোৱা হৈছে বুলি মহাকাশ মন্ত্ৰালয়ে কয়।
লোকসভাত এক প্ৰশ্নৰ লিখিত উত্তৰত কেন্দ্ৰীয় ৰাজ্যিক (স্বতন্ত্ৰ) বিজ্ঞান আৰু প্ৰযুক্তি মন্ত্ৰী ড০ জিতেন্দ্ৰ সিঙে কয় যে চন্দ্ৰযান-২ৰ অভিজ্ঞতা আৰু ৰাষ্ট্ৰীয় পৰ্যায়ৰ বিশেষজ্ঞসকলে দিয়া পৰামৰ্শৰ ওপৰত আধাৰিত কৰি চন্দ্ৰযান-৩ৰ প্ৰস্তুতি চলি আছে।
“বহুতো সম্পৰ্কিত হাৰ্ডৱেৰ বিশেষ পৰীক্ষা সফলতাৰে সম্পূৰ্ণ হৈছে আৰু ২০২২ চনৰ আগষ্টত মুকলি কৰাৰ সময় সূচী আছে।” মন্ত্ৰীগৰাকীয়ে কয়।
তেওঁ লগতে জানিবলৈ দিয়ে যে ইছৰোৱে ২০২২ চনৰ জানুৱাৰীৰ পৰা ডিচেম্বৰৰ ভিতৰত আন ১৯ টা অভিযান আৰম্ভ কৰাৰ পৰিকল্পনা কৰিছে। ইয়াৰ ভিতৰত আছে– আঠটা উৎক্ষেপণ বাহন অভিযান, সাতখন মহাকাশযান অভিযান আৰু চাৰিটা প্ৰযুক্তি প্ৰদৰ্শক অভিযান।
“কোভিড-১৯ মহামাৰীৰ ফলত কেইবাটাও নিৰ্ধাৰিত অভিযান প্ৰভাৱিত হৈছিল। লগতে মহাকাশ খণ্ডৰ সংস্কাৰ আৰু নতুনকৈ প্ৰৱৰ্তন কৰা চাহিদা-চালিত আৰ্হিৰ পটভূমিত প্ৰকল্পসমূহৰ পুনৰ অগ্ৰাধিকাৰ দিয়া হৈছে।” তেওঁ লগতে কয়।
উল্লেখ্য যে চন্দ্ৰযান-3 অভিযান যোৱা বৰ্ষতে আৰম্ভ হোৱাৰ কথা আছিল যদিও ক’ভিদৰ বাবে বিলম্বিত হৈছিল। ২০০৮ চনৰ অক্টোবৰত উৎক্ষেপণ কৰা প্ৰথম চন্দ্ৰযান অভিযানে চন্দ্ৰত পানীৰ প্ৰমাণ বিচাৰি পোৱাকে ধৰি বহুতো গুৰুত্বপূৰ্ণ আৱিষ্কাৰ কৰিছিল।
অৱশ্যে ভাৰতৰ দ্বিতীয় চন্দ্ৰ অভিযান প্ৰথম অভিযানৰ দৰে সফল হোৱা নাছিল। চন্দ্ৰযান-২ দুৰ্ঘটনাৰ পিছত ইয়াৰ লেণ্ডাৰ আৰু ৰোভাৰ দুৰ্ঘটনাগ্ৰস্ত হৈছিল, কিন্তু অৰ্বিটাৰটো এতিয়াও চন্দ্ৰপৃষ্ঠৰ ওপৰত ঘূৰি আছে।
ইছৰোৱে চন্দ্ৰযান-৩ ৰ বাবে দ্বিতীয় অভিযানৰ কক্ষপথ ব্যৱহাৰ কৰাৰ পৰিকল্পনা কৰিছে।
ইছৰোৰ প্ৰাক্তন মুৰব্বী কে শিৱানৰ মতে, চন্দ্ৰযান-৩ৰ বিন্যাস চন্দ্ৰযান-২ৰ সৈতে প্ৰায় একে হ’ব। কিন্তু অৰ্বিটাৰ, লেণ্ডাৰ আৰু ৰোভাৰ কনফিগাৰেচনৰ পৰিৱৰ্তে নতুন অভিযানত এটা প্ৰপালচন মডিউলৰ সৈতে লেণ্ডাৰ আৰু ৰোভাৰ থাকিব।
চন্দ্ৰযান-৩ ৰ লেণ্ডাৰ আৰু ক্ৰাফ্টৰ ব্যয় প্ৰায় ২৫০ কোটি টকা, আনহাতে উৎক্ষেপণ ব্যয় হ’ব প্ৰায় ৩৫০ কোটি টকা নিৰ্ধাৰণ কৰা হৈছে।