এখন ৰাজহুৱা লেখ আবেদনৰ শুনানিৰ সময়ত খঙত জ্বলি পকি উঠিল দেশৰ উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচূড়। সমগ্ৰ দেশতে প্ৰতিবন্ধী লোকৰ অধিকাৰৰ বাবে নিৰ্মিত আইন কাৰ্যকৰী কৰাত পলম কৰাৰ বাবে ৰাজ্য চৰকাৰৰ সমূহক কঠোৰভাবে সমালোচনা কৰি সোনকালে ব্যৱস্থা গ্ৰহণৰ বাবে নিৰ্দেশ দিয়ে ন্যায়াধীশগৰাকীয়ে।
সোমবাৰে উচ্চতম ন্যায়ালয়ত চন্দ্ৰচূড়ে কয় যে প্ৰতিবন্ধী ব্যক্তিৰ অধিকাৰ আইন, ২০১৬ (আৰ পি ডব্লিউ ডি আইন) বলবৎ হোৱা পাঁচ বছৰতকৈও অধিক পাৰ হৈ গ’ল যদিও সমগ্ৰ ভাৰততে এই আইনৰ ৰূপায়ণ হতাশাজনক হৈয়ে আছে।
মুখ্য ন্যায়াধীশ ডি ৱাই চন্দ্ৰচূড় আৰু ন্যায়াধীশ জে বি পাৰ্ডিৱালাৰ বিভাগীয় বিচাৰপীঠে জনস্বাৰ্থৰ গোচৰৰ শুনানি গ্ৰহণ কৰি মন্তব্য কৰে যে প্ৰতিবন্ধীসকলৰ অধিকাৰ সম্পৰ্কীয় আইনখন প্ৰণয়ন হোৱাৰ পাঁচ বছৰ হ’ল যদিও এতিয়ালৈকে বহু ৰাজ্য চৰকাৰ অচল হৈ বহি আছে। বহু ৰাজ্যই এতিয়াও আয়ুক্তও নিয়োগ কৰা নাই।
বাৰ এণ্ড বেঞ্চৰ এক প্ৰতিবেদন অনুসৰি মুখ্য ন্যায়াধীশ ডি ৱাই চন্দ্ৰচূড়ে কয় যে বহু ৰাজ্যই এই আইন কাৰ্যকৰীকৰণৰ বাবে প্ৰয়োজনীয় নীতিও নিৰ্ধাৰণ কৰা নাই, যিটো ৬ মাহৰ ভিতৰতে সম্পূৰ্ণ হ’ব লাগিছিল।
ইয়াৰ লগতে মুখ্য ন্যায়াধীশ গৰাকীয়ে কয় যে যি সমূহ ৰাজ্যই প্ৰতিবন্ধীসকলৰ অধিকাৰৰ সৈতে জড়িত বিষয়সমূহ চোৱাচিতা কৰিবলৈ আয়ুক্ত নিযুক্তি দিয়া নাই, সেই সমূহ ৰাজ্যই তৎক্ষণাত নিযুক্তি দিব লাগিব।
ৰাজ্যসমূহৰ বৰ্তমানৰ পৰিস্থিতি আলোকপাত কৰি চন্দ্ৰচূড়ে কয় যে, “অন্ধ্ৰ প্ৰদেশ, ছত্তীশগড়, ঝাৰখণ্ড, পঞ্জাৱ, উত্তৰ প্ৰদেশ আৰু কেন্দ্ৰীয় শাসিত অঞ্চল আন্দামান আৰু নিকোবৰত এতিয়াও এই আইনৰ বাবে আয়ুক্ত নিযুক্তি দিয়া হোৱা নাই। লগতে গুজৰাট, হিমাচল প্ৰদেশ, কেৰালা, মিজোৰাম, পশ্চিম বংগ, দিল্লী, আৰু কেন্দ্ৰীয় শাসিত অঞ্চল দমন দিউ, জম্মু-কাশ্মীৰ আৰু লাডাখৰ চৰকাৰে এই আইনৰ ধাৰা ৮৮ৰ অধীনত এতিয়াও পৃথকে পৃথকে ধন আবণ্টন কৰা নাই।
