স্বামীৰ পৰা দূৰত বসবাস কৰি থকা দিব্যা চৌধুৰীয়ে আজমীৰৰ কেন্দ্ৰীয় কাৰাগাৰত জেইলাৰ হিচাপে কৰ্মৰত আছিল। তাত তেওঁ নিজৰ সৰু ছোৱালী দুজনীক চোৱাচিতা কৰি আৰু অকলে ভাড়াঘৰত থকাৰ দৰে বিষয়বোৰত তেওঁ যথেষ্ট হায়ৰান হৈ পৰিছিল। ইয়াৰ পিছতে ৩৭ বছৰীয়া দিব্যাই এটা উপায় বিচাৰি পালে। কেন্দ্ৰীয় কাৰাগাৰৰ ভিতৰত থকা ‘মহিলা সংশোধনী কেন্দ্ৰ’ৰ দুগৰাকী কয়দীৰ তেওঁ সহায় লয়।
১২ জুলাইত দিব্যাই দুই বন্দী – কিৰণ ওৰফে ছেঠা নামৰ এগৰাকী যাৱজ্জীৱন শাস্তিপ্ৰাপ্ত কাৰাবন্দী আৰু ছানা নামৰ এগৰাকী বিচাৰাধীন বন্দীক জেলৰ পৰা উলিয়াই আনিবলৈ চেষ্টা কৰিছিল। এই ঘটনাৰ বাবে দিব্যা চৌধুৰী এতিয়া কাৰাগাৰতে বন্দী হৈ আছে। য’ত এসময়ত বন্দীসকলৰ নিৰাপত্তা আৰু তত্বাৱধানৰ দায়িত্ব তেওঁৰ কান্ধত আছিল। আৰক্ষীৰ অভিযোগ যে জেলৰ কৰ্মচাৰীৰ আপত্তি সত্ত্বেও তেওঁ নিজৰ পদৰ অপব্যৱহাৰ কৰি মহিলা দুগৰাকীক ঘৰুৱা কামত বাহিৰলৈ নিয়াৰ চেষ্টা কৰিছিল।
ৰাজস্থান কাৰাগাৰ নিয়ম, ২০২২ অনুসৰি কয়দীসকলৰ জিম্মা, নিৰাপত্তা আৰু অনুশাসন বজাই ৰখা আৰু নিৰাপত্তাৰ ক্ষেত্ৰত যিকোনো ভুল বা অনিয়ম হ’লে অধীক্ষকক জনোৱাটো জেইলাৰৰ (কাৰাৰক্ষক) দায়িত্ব।
কাৰাগাৰ কৰ্তৃপক্ষৰ মতে, দিব্যা চৌধৰীয়ে তেওঁৰ ‘বন্ধু’ তথা সহযোগী কনিষ্টবল ছোনিয়া চৌধাৰীৰ সৈতে কয়দী দুগৰাকীৰ সৈতে জেলৰ পৰা ওলাই আহিবলৈ চেষ্টা কৰিছিল যদিও গেটত আন কৰ্মীৰ সৈতে কাজিয়াত লিপ্ত হয়। বিষয়াসকলে কয় যে মহিলা কাৰাগাৰৰ মূল গেটত কৰ্তব্যৰত আন জেলৰ কৰ্মচাৰীৰ আপত্তি সত্ত্বেও দিব্যা চৌধুৰী আৰু ছোনিয়াই কৰ্মচাৰীসকলক “ভীতি প্ৰদৰ্শন” কৰিছিল।
ৰাজস্থানৰ ভিলৱাৰাৰ বাসিন্দা চৌধৰীয়ে আজমীৰত ভাড়াঘৰত বাস কৰিছিল, আনহাতে তেওঁৰ স্বামী (যিজনো জেইলাৰ) কোটাত কাম কৰিছিল। আজমীৰৰ উপ আৰক্ষী অধীক্ষক শিৱম যোশীয়ে কয়, ‘তেওঁৰ ছোৱালীকেইজনী খুব সৰু। তেওঁ বিচাৰিছিল যে কয়দীসকলে তেওঁৰ ছোৱালীকেইজনীক চোৱা-চিতা কৰক আৰু লগতে চাফাই কামো কৰক।
জেলৰ পৰা বাহিৰ হোৱাৰ লগে লগেই বিষয়টো পোহৰলৈ আহে। আৰক্ষীয়ে জনোৱা মতে, কয়দী দুগৰাকী “এঘণ্টা বা দুঘণ্টা” বাহিৰত আছিল আৰু তাৰ পিছত তেওঁলোকক ভিতৰলৈ ঘূৰাই অনা হৈছিল। ডি এছ পি গৰাকীয়ে কয়, “তেওঁৰ কাৰ্যকলাপ অবৈধ আৰু অসাংবিধানিক আছিল; যিহেতু কয়দীসকলক আদালতৰ সুৰক্ষাত জেলত ৰখা হয়। সেয়েহে গোচৰ পঞ্জীয়ন কৰা হৈছে আৰু তদন্ত আৰম্ভ হৈছে।”
আভ্যন্তৰীণ তদন্ত সম্পূৰ্ণ হোৱাৰ পিছত আৰু তেওঁৰ দোষ প্ৰমাণিত হোৱাৰ পিছত আজমীৰ কেন্দ্ৰীয় কাৰাগাৰৰ প্ৰহৰী মহিপাল মংগলোদাৰ প্ৰতিবেদনৰ ভিত্তিত ৫ আগষ্টত আজমীৰৰ চিভিল লাইন থানাত গোচৰ ৰুজু কৰা হয়। অৱশ্যে এফআইআৰ দাখিল কৰাৰ পিছতে গ্ৰেপ্তাৰৰ পৰা হাত সাৰিবলৈ চৌধুৰীয়ে আত্মগোপন কৰিছিল।
অতিৰিক্ত আৰক্ষী অধীক্ষক হিমাংশু জাংগীৰ আৰু উপ আৰক্ষী অধীক্ষক শিৱম যোশীৰ নিৰ্দেশনাত চিভিল লাইনছ থানাৰ এছ এইচ অ’ শম্ভু সিঙৰ নেতৃত্বত এটা বিশেষ আৰক্ষী দল গঠন কৰা হয়। দলটোত নিয়মীয়া আৰক্ষী জোৱানৰ উপৰিও চাইবাৰ চেলৰ বিষয়াও আছিল।
এজন বিষয়াই কয়, “আৰক্ষীৰ দলটোৱে ঘটনাৰ স্থানৰ পৰা লাভ কৰা চিচিটিভি ফুটেজ, কাৰিকৰী প্ৰমাণ আৰু নথি-পত্ৰসমূহ ভালদৰে বিশ্লেষণ কৰি চাইবাৰ চেলৰ সহায়ত তেওঁৰ সন্ধান আৰু অনুসৰণ আৰম্ভ কৰে। মঙলবাৰে (৬ অক্টোবৰ) আজমীৰ আৰক্ষীৰ এটা বিশেষ দলে কোটা জিলাৰ এটা আৱাসিক ফ্লেটত অভিযান চলাই তেওঁক গ্ৰেপ্তাৰ কৰে।”
আজমীৰৰ চিভিল লাইনছ আৰক্ষী থানাৰ এ এছ আই মইনুদ্দিনে কয় যে, “তেওঁ স্বামীয়ে ভাড়াত লোৱা এটা ফ্লেটত আছিল। তেওঁৰ স্বামীয়ে কোটাত জেইলাৰ হিচাপে কাম কৰে। ইয়াৰ পূৰ্বে দুয়োগৰাকী কন্যাই তেওঁৰ লগত আজমীৰত আছিল। আমি তেওঁৰ মোবাইল নম্বৰৰ ভিত্তিত তেওঁৰ অৱস্থান নিশ্চিত কৰিছিলো… আমি যেতিয়া কোটাৰ ফ্লেটটোলৈ গৈছিলো তেতিয়া তেওঁৰ স্বামী তেওঁৰ গাঁৱৰ ঘৰত আছিল।”
মইনুদ্দিনে লগতে কয়, “তেওঁৰ পক্ষত থিয় দি তেওঁ দাবী কৰিছিল যে তেওঁ ঘৰটো চাফা কৰিবলৈ সহায় বিচাৰিছিল আৰু তেওঁৰ অধীনস্থ (ছোনিয়া)ক ‘অপেন জেইল’ৰ পৰা কেইগৰাকীমান মহিলাক আনিবলৈ কৈছিল কাৰণ তাত থকা বন্দীসকলক বাহিৰলৈ ওলাই যাবলৈ অনুমতি দিয়া হয়। কিন্তু কৰ্মীগৰাকীয়ে তাৰ পৰিৱৰ্তে আন দুগৰাকী মহিলাক লৈ আনিছিল। অৱশ্যেই এতিয়া তেওঁতো নিজকে নিৰ্দোষী বুলি দাবী কৰিবই…”
অস্বাভাৱিক এই ঘটনাৰ পৰিণতিও যথেষ্ট ব্যতিক্ৰমী আছিল। ডি এছ পি শিৱম যোশীৰ ভাষাত, “তেওঁ নিজে কাম কৰা কাৰাগাৰতে এতিয়া তেওঁক ৰখা হৈছে।”
