North Korean missile had the range to reach US mainland উত্তৰ কোৰিয়াই জাপান সাগৰত নিক্ষেপ কৰা আন্তঃমহাদেশীয় বেলিষ্টিক মিছাইল আমেৰিকা যুক্তৰাষ্ট্ৰৰ মূল ভূখণ্ডত আঘাত হানিবলৈ সক্ষম। জাপানৰ প্ৰতিৰক্ষা মন্ত্ৰালয়ে এইকথা সদৰী কৰিছে।
মিছাইলটো হোক্কাইডোৰ পৰা ২১০ কিলোমিটাৰ পশ্চিমে জাপান সাগৰত পৰিছিল। আমেৰিকা যুক্তৰাষ্ট্ৰই ইয়াক তীব্ৰ গৰিহণা দিছে। ইপিনে, দক্ষিণ কোৰিয়াই সংশ্লিষ্ট কৰ্তৃপক্ষক শক্তিশালী প্ৰতি-ব্যৱস্থা ল’বলৈ নিৰ্দেশ দিছে।
বৃহস্পতিবাৰে, উত্তৰ কোৰিয়াৰ বৈদেশিক মন্ত্ৰীয়ে আমেৰিকা যুক্তৰাষ্ট্ৰৰ সামৰিক উপস্থিতি বৃদ্ধি কৰাৰ পৰিকল্পনাৰ বিষয়ে সতৰ্ক কৰি দিয়ে। পিছত দেওবাৰে আমেৰিকা যুক্তৰাষ্ট্ৰৰ ৰাষ্ট্ৰপতি জো বিডেনে জাপানৰ প্ৰধানমন্ত্ৰীৰ সৈতে এক বৈঠক কৰিব।
আমেৰিকা যুক্তৰাষ্ট্ৰৰ ৰাষ্ট্ৰীয় সুৰক্ষা পৰিষদৰ মুখপাত্ৰ এড্ৰিয়েন ৱাটছনে শুকুৰবাৰে কয় যে জো বিডেনক সকলো বিষয়ে অৱগত কৰা হৈছে আৰু আমেৰিকাই ইয়াৰ অংশীদাৰসকলৰ সৈতে আলোচনা কৰিব।
উত্তৰ কোৰিয়াই যোৱা দুমাহত ৫০ টাতকৈও অধিক মিছাইল নিক্ষেপ কৰিছে। অৱশ্যে, তেওঁলোকৰ বেছিভাগেই কম দূৰত্বভেদী। দীৰ্ঘ দূৰত্বৰ মিছাইল উৎক্ষেপণ বিৰল আৰু এইটো পোনপটীয়াকৈ আমেৰিকা যুক্তৰাষ্ট্ৰৰ বাবে এক ভাবুকিস্বৰূপ। কিয়নো এই মিছাইলবোৰে আমেৰিকা যুক্তৰাষ্ট্ৰৰ যিকোনো ঠাইত পাৰমাণৱিক অস্ত্ৰ কঢ়িয়াই নিবলৈ আৰু আঘাত কৰিবলৈ সক্ষম।
দক্ষিণ কোৰিয়াৰ সামৰিক বাহিনীয়ে কয় যে স্থানীয় সময় অনুসৰি ৰাতিপুৱা ১০:১৫ বজাত নিক্ষেপ কৰা অন্তিম আন্তঃমহাদেশীয় বেলিষ্টিক মিছাইলটো পিয়ংইয়ংৰ পৰা নিক্ষেপ কৰা হৈছিল। ই প্ৰায় ৬,১০০ কিলোমিটাৰ উচ্চতাৰে প্ৰায় ১,০০০কিলোমিটাৰ অতিক্ৰম কৰিছে। ই মহাকাশৰ বহু ওপৰেৰে উৰি গৈছিল।
জাপানৰ প্ৰতিৰক্ষা মন্ত্ৰী য়াচুকাজু হামাদাই কৈছে যে মিছাইলটোৰ আমেৰিকা যুক্তৰাষ্ট্ৰত আঘাত কৰাৰ ক্ষমতা আছে। সকলো পৰ্যালোচনা কৰাৰ পিছত তেওঁলোকে দেখিছে যে ই আনকি ১৫,০০০ কিলোমিটাৰ দূৰত আঘাত কৰিব পাৰে। অৱশ্যে, ই নিৰ্ভৰ কৰে ই কিমান ওজনৰ অস্ত্ৰ বহন কৰি নিয়ে তাৰ ওপৰত।
