ৰাজ্যৰ শিক্ষিত নিবনুৱা যুৱক-যুৱতীসকলক অসম চৰকাৰে পুনৰ প্ৰতাৰণা কৰিছে। স্বাস্থ্য বিভাগত নিযুক্তিৰ নামত আন এক প্রতাৰণা কৰিছে অসম চৰকাৰে৷ এই অভিযোগ তুলি আজি অসম চৰকাৰৰ বিৰুদ্ধে সোচ্চাৰ হৈ পৰিছে ৰাইজৰ দলৰ ছাত্ৰ সংগঠন জাতীয় যুৱ বাহিনী।
আজি অনুষ্ঠিত হোৱা স্বাস্থ্য বিভাগৰ তৃতীয় বৰ্গ নিযুক্তি পৰীক্ষাৰ পিছতে সামাজিক মাধ্যমত ভাইৰেল হৈ পৰা এখন বিশেষ ফটোক কেন্দ্ৰ কৰি ৰাজ্য চৰকাৰৰ বিৰুদ্ধে এই অভিযোগ তুলিছে জাতীয় যুৱ বাহিনীয়ে।
এক বিবৃতি যোগে ছাত্ৰ সংগঠনটোৱে অসম চৰকাৰক সমালোচনা কৰি নিকা, স্বচ্ছ নিযুক্তি প্রক্ৰিয়া অবিহনে পৰীক্ষা অনুষ্ঠিত কৰি সমগ্ৰ বিষয়টোৱেই এক ভালুকৰ সাঙীত পৰিণত কৰা চৰকাৰে নিযুক্তিৰ নামত কিমান নাটক ৰচিব বুলি কটাক্ষ কৰে।
বিবৃতিটোত জাতীয় যুৱ বাহিনীয়ে কয়, “PNRD, DIPR, Irrigation, Foreigners Tribunal আৰু লখিমপুৰ চিকিৎসা মহাবিদ্যালয় হাস্পতালৰ নিযুক্তি সম্পৰ্কীয় ব্যাপক খেলিমেলিৰ পাছত এইবাৰ দেখা গ’ল অসম চৰকাৰৰ স্বাস্থ্য বিভাগৰ তৃতীয় বৰ্গ নিযুক্তি পৰীক্ষাত বিসংগতি।”
বিবৃতিটোত লগতে কোৱা হৈছে, “ইতিমধ্যে সামাজিক মাধ্যমত আজি হৈ যোৱা তৃতীয় বৰ্গৰ নিযুক্তি পৰীক্ষাৰ প্রশ্ন কাকতৰ আৰু OMR Sheet সংলগ্ন দুখন ফটো ভাইৰেল হৈ পৰিছে। স্বচ্ছ আৰু নিকা পদ্ধতিৰে অনুষ্ঠিত কৰা এটা পৰীক্ষা কেন্দ্ৰত পৰীক্ষাৰ্থীয়ে মোবাইল লৈ যোৱা ঘটনাই এক নজিৰ সৃষ্টি কৰিছে।”
ৰাজ্যৰ লক্ষাধিক নিবনুৱাৰ সৈতে চৰকাৰে ল’ৰা-ধেমালি কৰা বুলি অভিযোগ কৰি জাতীয় যুৱ বাহিনীয়ে ধিক্কাৰ দিয়াৰ লগতে যদি সঠিক সময়ত ইয়াৰ সু-ব্যৱস্থা নলয় তেন্তে অনাগত দিনত যোগ্য শিক্ষিত নিবনুৱা লোকসকলে এই সংস্থাপনৰ পৰা যে বঞ্চিত হ’ব সেয়া নিশ্চিত বুলি দাবী কৰে।
“সেয়েহে আমি অসম চৰকাৰৰ মুখ্যমন্ত্ৰীৰ লগতে শিক্ষা বিভাগৰ মন্ত্ৰী ডাঙৰীয়াক এই প্ৰেছ বিজ্ঞপ্তিৰ জৰিয়তে ইয়াৰ সঠিক তদন্ত কৰিবলৈ দাবী জনাইছোঁ।”— প্ৰকাশিত বিবৃতিটোত জাতীয় যুৱ বাহিনীয়ে লগতে কয়।