আগন্তুক লোকসভা নিৰ্বাচনত উত্তৰ-পূৰ্বাঞ্চলৰ দুখন ৰাজ্য অসম আৰু মণিপুৰত প্ৰতিদ্বন্দ্বিতা আগবঢ়াব বিহাৰৰ শাসকীয় জনতা দল য়ুনাইটেডে।
সংবাদ প্ৰতিষ্ঠানক দলৰ সাধাৰণ সম্পাদক আফাক আহমেদ খানে জানিবলৈ দিয়া মতে দলে এই দুখন ৰাজ্যত প্ৰাৰ্থিত্ব প্ৰদান কৰিব। অৱশ্যে কিমানখন আসনত প্ৰাৰ্থিত্ব আগবঢ়াব সেয়া তেওঁ সদৰী কৰা নাই। মূলত: তেওঁলোকে ধৰ্মনিৰপেক্ষতা আৰু উন্নয়নৰ কাৰ্যসূচীৰে নিৰ্বাচনত অৱতীৰ্ণ হ’ব।
জে ডি য়ুৱে উত্তৰ-পূৰ্বাঞ্চলত নাগালেণ্ডৰ এনডিপিপি নেতৃত্বাধীন চৰকাৰখন অংশ হোৱাৰ লগতে উত্তৰ-পূৰ্বাঞ্চলৰ ৰাজ্যসমূহৰ লগতে অসমত ব্যাপকৰূপত সৃষ্টি হোৱা নাগৰিকত্ব সংশোধনী বিধেয়ক বিৰোধী আন্দোলনলৈও সমৰ্থন আগবঢ়াইছে।
দলটোৰ প্ৰতিনিধিয়ে গুৱাহাটীলৈ আহি বিধেয়ক বিৰোধী আন্দোলনৰ সৈতে জড়িত বিভিন্ন দল-সংগঠনৰ সৈতে মিলিত হোৱাৰ উপৰি ৰাজ্যসভাত বিধেয়কখনৰ বিৰুদ্ধে ভোট দিয়াৰ কথা ঘোষণা কৰিছিল।
ইপিনে, খানে শনিবাৰে সংবাদ প্ৰতিষ্ঠানৰ আগত বিধেয়ক বিৰোধী আন্দোলনত তেওঁলোকক সহযোগ কৰা সকলোকে অভিনন্দন জনাই কয় যে এয়া মাথোঁ সাময়িক সকাহহে আৰু সাম্প্ৰদায়িক শক্তিৰ বিৰুদ্ধে যুঁজ এতিয়াও শেষ হোৱা নাই। তেওঁ লগতে উত্তৰ-পূৰ্বাঞ্চলৰ জনসাধাৰণে এই শক্তিসমূহৰ বিৰুদ্ধে সতৰ্ক আৰু ঐক্যবদ্ধ হৈ থাকিব লাগিব বুলিও কয়।