যোৰহাট চিকিৎসা মহাবিদ্যালয়ত যোৱা ৯ দিনত ১৮টাকৈ নৱজাতকৰ মৃত্যু হোৱা ঘটনাৰ প্ৰতিবেদনত কৰ্তৃপক্ষই নিজক বচোৱাৰ চেষ্টাৰে প্ৰসূতিসকল পলমকৈ চিকিৎসালয়ত ভৰ্তি হোৱাটোকে মূল কাৰণ হিচাপে দেখুৱাইছে। এই কথাই ভুক্তভোগী আৰু সচেতন নাগৰিকৰ মাজত প্ৰতিক্ৰিয়াৰ সৃষ্টি কৰিছে।
উল্লেখযোগ্য যে যোৱা ১ নৱেম্বৰৰ পৰা ৭ নৱেম্বৰলৈকে চিকিৎসালয়খনত ১৫টিকৈ নৱজাতকৰ মৃত্যু হৈছিল। ইয়াৰ ভিতৰত ৬ নৱেম্বৰৰ দিনাই ৬টি শিশুৰ মৃত্যু হৈছিল। আনহাতে ৭ আৰু ৯ নৱেম্বৰৰ মাজতো পুনৰ ৩টি শিশুৰ মৃত্যু হয়। স্থানীয় দল-সংগঠন আৰু মৃত শিশুকেইটিৰ আত্মীয়ৰ প্ৰতিবাদৰ ফলত চিকিৎসালয় কৰ্তৃপক্ষই বিষয়টো তদন্তৰ বাবে এখন ৬জনীয়া কমিটী গঠন কৰি দিছিল।
তদন্তৰ প্ৰতিবেদনত কোৱা হৈছে যে মৃত্যু হোৱা আটাইকেইটি শিশুৰ মাককেইগৰাকীক পলমকৈ ভৰ্তি কৰোৱা হৈছিল আৰু তেওঁলোকৰ প্ৰাক-প্ৰসৱকালীন পৰীক্ষা (pre-natal) কৰোৱাৰ কোনো তথ্য নাছিল।
ইফালে চিকিৎসালয় কৰ্তৃপক্ষৰ এই অভিযোগ অস্বীকাৰ কৰিছে অভিভাৱকসকলে। ইয়াক চিকিৎসালয়খনে নিজক বচোৱাৰ কৌশল বুলি অভিহিত কৰে তেওঁলোকে।
আকৌ প্ৰতিবেদনত কোৱা হৈছে যে চিকিৎসালয়খনৰ নৱজাতকৰ বিশেষ যতন শাখাটোত (Special Care Newborn Unit (SCNU)) ৪০টি শিশুহে ৰখাৰ ব্যৱস্থা আছে যদিও তাত এই কেইদিনত ৮০টা পৰ্য্যন্ত শিশু ৰাখিব লগীয়া হৈছিল।
গতিকে এই শাখাটোৰ সক্ষমতা বৃদ্ধি কৰিবলৈ চৰকাৰক অনুৰোধ জনাবলৈ প্ৰতিবেদনত প্ৰস্তাৱ দিয়া হৈছে।
তদন্ত কমিটীখন শিশুৰোগ বিভাগৰ মুৰব্বী ডাঃ প্ৰনৱজিৎ বিশ্বনাথ, পূৰ্ণিমা শইকীয়া, সদস্য সচিব, বিষ্ণুৰাম দাস কমিউনিটি মেডিচিন, প্ৰসূতি বিভাগৰ ভাৰপ্ৰাপ্ত চিকিৎসক প্ৰনৱিকা মহন্ত আৰু এম এন বৰুৱাৰে গঠিত আছিল।